“Nano me ngwés likalô!”

ME NIMIS MASÉÉ MEM

Ngoo le, ngéda me bi yila njohok, me bi nimis makénd me bééna i nson u Yéhôva. I bé pôna wee solôñ yem i suklu i bééna kunde iloo me. Me bé nôgda wee mambén ma bagwal bem ni matiñ ma Bibel ma bé ha me i mok, kayéle i yoñ ngaba i mam ma mbuu i bé lédél me. Tolakii me bé pééna bé le Yéhôva a yé, me bééna ha bé ngôñ i gwélél nye.

Me bé yoñ ngaba i nson likalô, ndik inyu ti ñañga i lisuk li sôñ. Kiki me bé kôôba ha bé likalô, me bé yi bé lelaa me bôdôl nkwel ni bôt, tole lelaa me kena wo ni bisu. Sôk i nsôk, me bé ha bé maséé likalô, yak nson wem u bé num ha bé matam malam. Me bé badba le: ‘Lelaa bôt bape ba mboñ inyu ke ni bisu i téé likalô hiki sonde ni hiki sôñ?’

Ngéda me bi bolna 17 nwii, me bé gwés ha bé le mut a ti me oda. Jon me bi pam i ndap, me ke i loñ Ôstrélia. Hala a bi tééñga bagwal bem ngandak, ndi ba bé yi le me ga ke ni bisu i gwélél Yéhôva.

I Ôstrélia, maada mem ni Yéhôva ma bi kônde ôbi. Me bé ke ha bé makoda momasôna. Mawanda mem ma bé boñge ba wanda ba ba bé boñ wee ba ngwélél Yéhôva, ndi i mbus ni mbus ba kenek masak ni i nyôba ni juu. Ngéda me nhoñol jam li, me nléba le me bééna kôô wada i maliga, kôô umpe i nkoñ ’isi, ndi homa to wada a bé lémél bé me

ME ÑÔT BINIIGANA BI NGUI

Mbus nwii ima, me bi boma sita yada i i bi hôla me i tehe le niñ yem ha ngéda i i bé bé ilam. Me ni bisita bitan di bé yén nlélém ndap. Di bi yoñ bitelbene le ngwélél makiiña bo nwaa Tamara ba tégbaha ngim sonde ni bés. Ngéda nlôm a bé a pégi ni minson mi likoda, Tamara a bé tégbaha loñge ngéda ni bés. Me bé gwés mangéda ma. A bé liyômba ngandak ni minyaô. Hala a bi hélés me i tehe mut a pégi ngandak i nson u Yéhôva, ndi nlélém ngéda, a tuguk ni bôt bape.

Tamara a bééna makénd kiyaga. A bé gwés maliga ni nson likalô ngandak, kayéle a bé ti bôt bape ngôñ i boñ nlélém. A bé maséé i boñ kii yosôna a bé la i nson u Yéhôva, ndi me me bé tômbôs moo. Gwéha yé inyu Yéhôva ni maséé mé, ma bi lôôha tihba me. Ndémbél yé ilam i bi hôñlaha me bibañga bini: Yéhôva a gwé ngôñ le di gwélél nye “ni maséé,” “lôñni tjémbi.”​—Tjémbi 100:2.

ME NTÉMBNA MASÉÉ MEM INYU LIKALÔ

Me bé sômbôl nôgda minlélém mi maséé kiki Tamara, ndi inyu pam ha likala li, me bé lama lona mahéñha makeñi mu niñ yem. Hala a bi yoñ me nwii maa. Me bi bôdôl kôôba ilole me nke i téé likalô, ngim mangéda me bé yoñ bôlô i nsañal inyu pes ngéda. Hala a bi hôla me i témbna makénd mem inyu likalô. Kiki me bé béna gwélél Bibel likalô, hala nyen me bi kahal gwés likalô. Mbus, me yoñ bôlô nsañal i pes ngéda inyu ngandak sôñ.

Me bi bôdôl kiha ni mintén mi bôt nwominsôna mi mi bééna maada malam ni Yéhôva, ba boñok bisesema inyu gwélél nye. Ndémbél yap ilam i bi hôla me i tehe kii i nlôôha ba nseñ i niñ yem, i hôla ki me i bana lem i añ Bibel hiki kel. Nson likalô u bi sôk lémél me ngandak, kayéle me yoñ bôlô nsañal nu ngéda yosôna. Mbus ngandak nwii, me bi témb me nôgda le ntôñ Djob u yé homa me nlama ba.

ME NLÉBA SOLÔÑ INYU BÔLÔ NSAÑAL

Mbus nwii wada, me bi boma Alex, a bé gwés Yéhôva ni likalô, a bak minyaô. Hala a bé nwii minsamal le a bé nsañal nu ngéda yosôna, a bak nhôla nson. Alex a bi tégbaha sôñ isaambok tole juem i Malawi i het ngôñ i batéé likalô i bé ikeñi. Nyoo, a bi bot liwanda ni bilôk bikéé bi bi bé missionnaire, bi bi bi ti nye makénd i bii nson u Yéhôva kiki jam li bisu i niñ yé.

I nwii 2003, me ni Alex di bi biiba, di ngi yii bagwel nson ba ngéda yosôna. Mu ngéda i yosôna, di bi nigil ngandak mam malam, Yéhôva a kôp ki bés bisai bi mbuma ñañ.

BISAI BI NYAMB MAYOO

I nwii 2009, ba bi naña bés i sal kiki missionnaire i Timor-Leste, man loñ yada i biôn bi Indônésia. Hala a bi kônha bés maséé, nlélém ngéda di konok woñi. Mbus sôñ itan, di bi pam i nyañ tison le Dili.

Niñ yés nyoo i bé maselna ni i niñ di bééna ngéda bisu. I bé sômbla le di meya bilem gwap, bijek gwap, hilémb ni niñ yap. Ngéda di bé téé likalô, di bé béna boma bôt ba ba bé yep, ba ba bi ke bé suklu bañga, ni ba ba bé tét. Ngandak i i bi niñ i ngéda gwét, i bééna mandôndôô i nyuu, i bén-ga kon woñi.a

I téé likalô i bé hélha jam! Kiki hihéga, kel yada me bi boma Maria nu a bé mañge muda nu 13 nwii.b Nyañ a bi wo ndék nwii i bisu bi ngéda, to isañ, a bé tehe bé hiki ngéda. Kiki ngandak boñge ba wanda, Maria a bé yi bé lelaa niñ yé y’a ba. Me mbigda le kel yada a bi bôdôl ee ngéda a bé kwélés me. Ndi, me bé yi bé i yom me kal nye, inyule me bé pot bé hilémb hié loñge. Me bi soohe Yéhôva, me bat nye le a hôla me i lédés nye, ha nyen me bi éñél nye minlôñ mi Bibel mi mi ntina makénd. Mbus ndék nwii ndigi, maliga ma bi héñha niñ i Maria héñha yosôna. A bi sôblana, nano yak nye a ntégbaha gwigil bi Bibel. I len ini, Maria a yé ikété ntôñ u Yéhôva, i het a nôgda le bôt ba ngwés nye.

Yéhôva a bi sayap nson wés i loñ i Timor-Leste. Libim li lôk kéé li bi sôblana mu jôm li nwii li ntagbe, ngandak i yé basañal, bahôla nson, tole mimañ. Bape ba nsal i muu ma ngobol. Me bé maséé i tehe bo ba ntôp tjémbi i makoda, i tehe bo ba nwemla, ni i tehe bo ba nhol i pes mbuu.

ME BÉ EMEL BÉ I NYA NIÑ ILAM I

Ngéda di bi tégbaha i loñ i Timor-Leste i bé maselna ngandak ni i di bééna i loñ Ôstrélia, ndi i bé lôôha ba ilam. Ngim mangéda, di bé di pak matôa inyu ke liké, mimbambak mi tjobi ni bikai bôt ba bi somb, bi bak mukété. Ngéda ihogi, di bé di nigil ni bôt ikété hipogdo ndap, i i bééna mbônji i mahindi ni kôp. Ndi tolakii di bé boma mandutu ma, me bé tehe hala kiki nsima nkeñi.

Ngéda me mbéñge niñ yem, me nti bagwal bem mayéga inyule ba bi niiga me maliga, ba hônba ki me mu libak jem li njohok. Bibuk bi kaat Bingéngén 22:6 bi nyônôl toi i ngii yem. Pua bo m’ma ba nkônôl me ni Alex maséé; ba yé maséé i tehe kiki Yéhôva a ngwélél bés. Ibôdôl nwii 2016, di yé nson makiiña mu biloñ hikuu hi Australasia hi ñéga.

Hala a nhélés me ngéda me nhoñol le likalô li bé lôlôô me. Nano me ngwés likalô! Me nsôk me nok le tolakii di mboma mam malam ni mabe mu niñ yés, bañga maséé i nlôl mu kiki di ngwélél Yéhôva ni ñem wés wonsôna. Ñ, i 18 nwii me ntégbaha ni Alex i gwélél Yéhôva, mi nlôôha lémél me. Nano, me yé kiñ yada ni David ntôp tjémbi i ngéda a bi kal Yéhôva le: “Ndi ba ba nsolbene weeni ba hagak; ba kéhi nséñgé nyo. . . . Ba ki ba ngwés jôl joñ ba konok maséé inyu yoñ.”​—Tjémbi 5:12.