Baa u yik hala?

Inyuki bon ba Israel ba bé ti likil ngéda kôba?

I NGÉDA kôba, i munlôm nu a bé sômbôl bii muda a bé a ti lihaa li muda likil. Ba bé ti gwom, binuga, tole moni. Ngim mangéda, mut a bé a sal ngim bôlô inyu saa likil, kiki Yakôb, nu a bi sélél Laban nwii minsaa-mbok inyu bii Rahel. (Bibôdle 29:17, 18, 20) Njômbi i likil i bé le kii?

Nyimam wada le Carol Meyers a nkal le: “I ngandak mahaa i ngéda kôba, likil li bé yiha i bôlô yosôna ngond i i bé ke libii a bé lama sal i lôk yé.” Likil li bé lédés yak ma-ada ipôla lihaa li munlôm ni li muda. Mahaa ma mo ima, ma bé lama hôlna i ngéda mandutu. U héya hala, i likil munlôm a bé ti, li bé unda le i muda nu a yé nwaa wé, ni le i munlôm a bi ti likil nyen a bé lama yoñ ndun ni nye.

Likil li bé sômbôl bé kal le muda a yé yom ba nuñul tole ba nsomb. Kaat nyiña yada ni hop Ngisi le Ancient Israel​—Its Life and Institutions i nkal le: “I lem Lôk Israel i bééna i ti likil i bé pôna ndik wee muda a yé yom i nyuñga. Ndi i nene wee ba bé yoñ likil kiki ngim likébla ba bé ti lihaa li muda, he bé kiki ngim nyuñga.”

I len ini, i biloñ bihogi, bôt ba nke ni bisu i ti likil. I ngéda bagwal ba ba yé bikristen ba mbat likil, ba nlôôha bé bédés ndamba i likil inyu boñ le ‘lem yap ini le ba nai bé ni litehge jap li mam i yiba ni bôt bobasôna.’ (Filipi 4:5; 1 Korintô 10:32, 33) Ni njel i, ba ga éba le ba ‘ngwés bé moni,’ tole ba gwé bé huluk ñem. (2 Timôtéô 3:2) U héya hala, i ngéda bagwal ba ba yé bikristen ba nlôôha bédés likil, i munlôm a nsômbôl biiba a yé nyégsaga i timbis libii jé ni mbus letee a kot i mam momasôna ba mbat inyu likil. Tole mankéé nu munlôm a ga ba nyégsaga i téé bôlô nsañal inyu yéñ bôlô i i ga hôla nye i kot nkus wonsôna ba mbat inyu likil.

I biloñ bipe, ngomin nyen a bi téé likil. Ibale hala, bagwal ba ba yé bikristen ba noñ i mbén i. Inyuki? Yéhôva a nsômbôl le bikristen ‘bi suhus gwomede isi baane’ ni ki le ba nôgôl mambén ma loñ ma ma mbôk bé matiñ ma Bibel.​—Rôma 13:1; Minson mi baôma 5:29.