Mbañ Bibel i i yéne bés nseñ

1. I ngéda Adam bo Éva ba bi boñ béba kii Yéhôva a bi boñ? (Bibôdle 3:15)

I NGÉDA Adam bo Éva ba bi boñ béba, Yéhôva a bi pot ngim mbañ i i bi ti mbôda yap botñem. I mbañ i i yé i kaat Bibôdle 3:15.—Añ.

2. Kii i nlémél we munu i mbañ ini?

² I mbañ i i yé i kaat Bibôdle. Ndi bii bikaat bi Bibel bipe gwobisôna bi gwé maada ni yo. Kiki nkôô u ba ngwélél inyu kañ mbañg babobla, i mbañ i i yé i kaat Bibôdle 3:15, i ñat bikaat bi Bibel gwobisôna, inyule gwobisôna bi mpôdôl ndik jam jada, le ntohol a ga loo inyu tjé Nsohop ni bibéba bi bôt gwobisôna.b I jam li li ga lona bagwélél ba Yéhôva ngandak bisai.

3. Kii di ga pôdôl munu i yigil ini?

³ Munu i yigil ini, di ga timbhe mana mambadga, ma ma mbéñge kaat Bibôdle 3:15: Bonjee ba mpôdôl mu? Lelaa i mbañ i i nyon munu i ngéda yés? Kii i mbañ i i nlona bés?

BONJEE BA MPÔDÔL MU I MBAÑ I?

4. Njee a yé “nyoo,” kii i ñunda hala?

⁴ Kaat Bibôdle 3:14, 15 i mpôdôl “nyoo,” “mbôô” i nyoo, “muda” ni “mbôô” i muda. Bibel i ñunda bés bonjee ba yé i bôt ba.c Njee a yé “nyoo”? Ibale yañga nyoo yon Yéhôva a bé pôdôs i wom Éden, ki i bi nok bé i yom a bi kal. Jon añgel yon Yéhôva a bé pôdôs ha nuga bé. Njee a yé i añgel i? Kaat Masoola 12:9 i ntimbhe i mbadga i. I ñunda le “nlômbi nyoo” u yé Satan Nsohop. Ndi njee a yé mbôô i nyoo?

5. Bonjee ba yé mbôô i nyoo?

⁵ I ngéda Bibel i mpôdôl mbôô, i mbéna pôdôl bôt ba ba nigle mahoñol ni maboñok ma ngim mut. Jon mbôô i nyoo i yé biañgel ni bôt ba binam ba ba gwé mahoñol ni maboñok ma Satan, ba kolbaga Yéhôva ni bagwélél bé. Hala wee biañgel bi, bi bi nyodi nyoo i ngii i dilo di Nôa, ni bôt ba binam ba ba gwé maboñok ma Nsohop.—Bibôdle 6:1, 2; Yôhanes 8:44; 1 Yôhanes 5:19; Yuda 6.

6. Inyuki di yé le di kal le “muda” kaat Bibôdle i mpôdôl a bé bé Éva?

⁶ Nano njee a yé “muda”? Éva bé nu. Inyuki? Di béñge njom yada. Mbañ i kaat Bibôdle yada i ñéba le mbôô i muda i nlama “nyagat” nyoo i ño. Kiki di mbôk di tehe, nyoo i yé Satan Nsohop. Jon mbôda i Éva hala wee kwéha i mut yo ki yo i bé le i nyagat nye. Mut numpe nyen a bé le a boñ i jam li.

7. Inoñnaga ni kaat Masoola 12:1, 2, 5, 10, njee a yé muda kaat Bibôdle 3:15 i mpôdôl?

⁷ Kaat Masoola i ñéba njee a yé muda kaat Bibôdle 3:15 i mpôdôl. (Añ Masoola 12:1, 2, 5, 10.) A ta bé mut binam! Sôñ i yé isi makôô mé, a gwé ki 12 tjôdôt i ño wé. A ngwal man nu a ta bé kiki bana bon bape, hala wee Ane i Djob. Kiki Ane i Djob i yéne i ngii, nyoo nyen yak muda a nlama ba. Muda a yé ntôñ u Yéhôva u u yé nyoo i ngii, hala wee biañgel gwobisôna.—Galatia 4:26.

8. Njee a yé pes i bisu i mbôô muda, ngéda imbe a bi yila pes i bisu? (Bibôdle 22:15-18)

⁸ Bibel i ñunda yak bés njee a yé pes i bisu i mbôô i muda. Mbañ i Bibel i ñéba le a nlama ba mbôda i Abraham. (Añ Bibôdle 22:15-18.) I mbañ i i bi yon, inyule Yésu a yé mbôda i Abraham. (Lukas 3:23, 34) Ndi a nlel bôt ba binam inyule nyen a nyagat Satan Nsohop. I ngéda Yésu a bééna bebee le 30 ma nwii, Yéhôva a bi hoo nye ni mbuu mpubi. I ngéda Yéhôva a bi hoo nye, Yésu a bi yila pes i bisu i mbôô i muda. (Galatia 3:16) I ngéda Yésu a bi wo a tuge ki, Nyambe a bi ha nye “ntut u lipém ni u bibégés,” a ti nye “kunde yosôna i ngii ni ’isi” yak ni kunde “i tjé minson mi Nsohop.”—Lôk Héber 2:7; Matéô 28:18; 1 Yôhanes 3:8.

9-10. (a) Bonjee ba yé pes i yônôs iba i mbôô i muda, ngéda imbe ba nyila hala? (b) Kii di nke tehe hanano?

⁹ Ndi yak pes i nyônôs iba i mbôô muda i yé. Paul a bi unda bonjee ba yé pes i nyônôs iba i ngéda a kal minhook mi mi bé bon ba Lôk Yuda ni bôt ba matén mape le: “Ibale ni yé ba Kristô wee ni yé yaga mbôda i Abraham, ni bak bakôdôlbum inoñnaga ni mbônga.” (Galatia 3:28, 29) I ngéda mut a nyila nhoo u kristen, ha nyen a nyila pes i nyônôs iba i mbôô i muda. Jon mbôô i muda i yé Yésu ni 144 000. (Masoola 14:1) Bobasôna ba nigle Isañ wap Yéhôva.

¹⁰ Di ntehe bonjee kaat Bibôdle 3:15 i mpôdôl. Nano di tehe lelaa i mbañ i i yé yon ni bisai di nkôs.

LELAA I MBAÑ INI I YÉ YON?

11. Lelaa ba bi babaa mbôô i muda “i tindi”?

¹¹ Mbañ i kaat Bibôdle 3:15 i ñéba le nyoo i bé lama babaa mbôô i muda “i tindi.” I mbañ i i bi yon i ngéda Satan a bi tinde Lôk Yuda ni Lôk Rôma i nol Yésu. (Lukas 23:13, 20-24) I ngéda mut a mbabaa i tindi, a nla boñ ngim dilo ibabé le a kee, hala nyen Yésu a bi boñ dilo diaa i soñ i ngéda Satan a bi babaa nye i tindi.—Matéô 16:21.

12. Lelaa ba ga nyagat ño nyoo, ngéda imbe hala a ga bôña?

¹² Inyu boñ le mbañ i Bibôdle 3:15 i yon, i bé béda le Yésu a tuge. Inyuki? Inyule mbañ i ñéba le mbôô i muda i nlama nyagat nyoo i ño. Hala a nkobla le Yésu a bé lama tuge. Hala ki nyen i bi bôña! I mbus dilo diaa, Yésu a bi tuge, a bet i ngii, a yila añgel i i nla ha bé wo. I ngéda ngéda Yéhôva a bi téé y’a kola, Yésu a ga nyagat Satan. (Lôk Héber 2:14) Kristô ni i bôt ba ga ane ni nye, ba ga tjé baoo ba Djob bobasôna hana ’isi hala wee mbôô i nyoo.—Masoola 17:14; 20:4, 10.d

BIMBE BISAI I MBAÑ INI I NLONA BÉS?

13. Bimbe bisai biyônôl bi mbañ ini bi nlona bés?

¹³ Ibale u yé ngwélél Yéhôva, yi le yak we u yé i sal inyu boñ le i mbañ ini i yon. I ngéda Yésu a bi lo hana ’isi a bé mut binam, a bééna bilem gwobisôna bi Isañ. (Yôhanes 14:9) A bi hôla bés i yi Yéhôva ni i gwés nye. Kiki Yésu nyen a nkena likoda nunu i ngéda yés, a ñéga bés, a niiga ki bés. A niiga bés lelaa di nla niñ i nya i nlémél Yéhôva. Di nkôs ki ngandak bisai hala kiki Nsohop a bi babaa Yésu i tindi hala wee a bi boñ le a wo. Bimbe bisai? I ngéda Yésu a bi tuge, a bi ti Yéhôva sesema i matjél mé inyu yés, ma ma ‘mpubus bés inyu bibéba gwobisôna.’—1 Yôhanes 1:7.

14. Baa i mbañ Yéhôva a bi pot i wom Éden i bé lama yon i nlélém ngéda? Toñol.

¹⁴ Bibañga Yéhôva a bi pot i wom Éden bi bé éba le ngéda i bé nlama tagbe inyu boñ le i mbañ i i yon. I bé béda ngéda inyu boñ le muda a gwal, Nsohop a bana mbôda yé ni le mintôñ mi bôt mi nwo ima mi oona. I mbañ ini i yéne bés nseñ inyule i nyis bés le nkoñ ’isi u Satan u ga oo bagwélél ba Yéhôva. Yak Yésu a bi yis banigil bé i jam li. (Markô 13:13; Yôhanes 17:14) Di ntehe toi le i mbañ i i yé yon, téntén munu i 100 nwii i ntagbe. Lelaa?

15. Inyuki nkoñ ’isi u nlôôha oo bés, inyuki di nlama bé kon Satan woñi?

¹⁵ I ngéda Yésu a bi yila Kiñe Ane Djob i nwii 1914, a bi leñ Satan hana ’isi. Nano a nla ha bé bet i ngii, a mbem ndik tjiba yé. (Masoola 12:9, 12) Ndi a nkééha bé moo. Satan a yé ñunbak. Inyu hala nyen a nkolba bagwélél ba Djob. (Masoola 12:13, 17) I jam li jon li mboñ le bôt ba nlôôha oo bés munu nkoñ ’isi unu. Ndi di nlama bé kon Satan woñi to bagwélél bé. Di nlama bana minlélém mahoñol kiki ñôma Paul nu a kal le: “Ibale Nyambe a yé lôñni bés, njee a’ kolba bés?” (Rôma 8:31) Di mbôdôl Yéhôva ñem inyule di ntehe ngandak mam mu mbañ i yé i kaat Bibôdle 3:15 i mal yon.

16-18. Bimbe bisai Curtis, Ursula ni Jessika ba bi kôs i ngéda ba bi nok mbañ i kaat Bibôdle 3:15?

¹⁶ Mbañ i i yé i kaat Bibôdle 3:15 i nla hôla bés i ngéda di mboma mandutu. Curtis nu a yé missionnaire i loñ yada le Gwam a nkal le: “Me bi boma ngandak mandutu i ntôñ u Yéhôva, ndi i ngéda me bi ôt pék mu mbañ i yé i kaat Bibôdle 3:15, hala a bi hôla me i bôdôl Yéhôva ñem.” Curtis a mbem i ngéda Yéhôva a ga mélés mandutu més momasôna.

¹⁷ Sita yada le Ursula nu a yé i Bavaria i loñ Jaman a nkal le i ngéda a bi nok kaat Bibôdle 3:15, hala a bi hôla nye i nok le Bibel i yé toi Bañga i Djob. A bi tehe lelaa mbañ i Bibel ipe i nkiha ni mbañ ini, hala a bi lôôha tihba nye. A nkal le: “I ngéda me bi tehe le i mbus béba i Adam, Yéhôva a bi hoo yoñ bitelbene inyu boñ le bôt ba binam ba tohlana, hala a bi lôôha lémél me.”

¹⁸ Jessika nu a yé i Mikrônésia a nkal le: “Me ngi hoñlak i ngeñ me bi yi maliga! Mbañ i i yé i kaat Bibôdle 3:15 i bé yon me tehge. I bi hôla me i nok le niñ di niñ i len ini, i ta bé bañga niñ. I mbañ i i bi éba me le i ngéda me ngwélél Yéhôva hala a mboñ le me bana niñ ilam nano ni dilo di lo.”

19. Kii i nyis bés le pes i nsôk i mbañ i i yé i kaat Bibôdle 3:15 i ga yon?

¹⁹ Di ntehe le mbañ i i yé i kaat Bibôdle 3:15 i yé yon. Di nyi mbôô i muda ni mbôô i nyoo. Yésu nu a yé pes i bisu i mbôô i muda a bi wo, a tuge, nano a yé Kiñe i i nwo bé. I bôt ba yé pes i nyônôs iba i mbôô i muda nsoñgi wap u yé bebee ni yon. Kiki pes i bisu i mbañ ini i bi yon, di nyi le yak pes i nsôk i ga yon. Yésu a ga nyagat nyoo i ño. Bôt ba binam ba ba ngwélél Yéhôva ba ga ba maséé ngandak i ngéda Satan a ga tjiba! I nwaa le di mbol nyoo di tomb bañ, Nyambe wés a ntembee bé. A ga kôp “biloñ gwobisôna hana ’isi” bisai ni njel mbôô i muda.—Bibôdle 22:18.