Baa u mbôdôl Yéhôva ñem?

1-2. (a) Inyuki hala a nlédél bôt i bôdôl baane ñem i len ini? (b) Kii di ga tehe munu yigil ini?

I LEN ini, hala a nlédél ngandak bôt i bôdôl baane ñem. Ba nyimbe le baane ba mbéna emble mingwañ mi bôt ni bôt ba gwé bitel bikeñi, ba yanak diyeyeba. Bibel i mpôdôl i jam li, i nkal le: “Mut wada a ntét nu-mpe i boñ nye béba.” (Ñañal 8:9) Jam lipe li yé le, ngim baéga bibase i gwé bilem bibe ngandak, inyu hala nyen ngim bôt i mbôdôl ha bé Nyambe ñem. Jon ngéda di nkahal niiga mut Bibel, i mbéda le di hôla nye i bôdôl Yéhôva ñem, ni i bôdôl ntôñ wé ñem.

² Ndi ndik i bôt di niiga Bibel bé bon ba nlama bôdôl Yéhôva ñem ni ntôñ wé. To i bôt ba ngwélél Yéhôva ibôdôl behee ba nlama bé hôya le i yom Yéhôva a niiga bés yon i téé. Ngim mangéda, di mboma mandutu ma ma nla boñ le hala a lédél bés i neebe i jam li. Munu yigil ini, di ga tehe manoodana maa di yé le di boma: (1) ngéda di ñañ ngim miñañ i Bibel, (2) ngéda ntôñ Yéhôva u nti ngim biniigana, (3) ngéda d’a boma mandutu i dilo di nlo.

BÔDÔL YÉHÔVA ÑEM I NGÉDA U ÑAÑ BIBEL

3. Mimbe miñañ mi Bibel mi nla tinde bés i badba ngim mambadga?

³ Ngéda di ñañ Bibel, di nla kahal badba mambadga inyu i yom Yéhôva a bi boñ inyu bagwélél bé ba kôba, ni makidik a bi yoñ. Kiki hihéga, kaat Ñañga bôt i ñéba le, man Lôk Israel wada a bi ke i bada tjéé i kel Sabat, Yéhôva a kal le a nôla. I mbus ngandak nwii, kaat Samuel i nyônôs iba i ñéba le Yéhôva a bi nwéhél Kiñe David nu a bi ke i ndéñg, a nol mut. (Ñañga bôt 15:32, 35; 2 Samuel 12:9, 13) Di nla badba le: ‘Inyuki Yéhôva a bi nwéhél David nu a bi ke i ndéñg a nol mut, ndi a kal le ba nol man Lôk Israel nu a bi boñ béba i i nene isii?’ Inyu timbhe i mbadga ini, di béñge mam maa di nlama bigda ngéda di ñañ Bibel.

4. Lelaa kaat Bibôdle 18:20, 21 ni kaat Ndiimba Mbén 10:17 bi nhôla bés i bôdôl Yéhôva ñem?

⁴ Bibel i nyelel bé mam momasôna i ngéda i mpôdôl ngim jam. Kiki hihéga, di nyi le David a bi tam toi bibéba gwé. (Tjémbi 51:4-6) Ndi di nyi bé kiki i mut a bi bôk mbén i Sabat a bé. Baa a bi bat nwéhél inyu béba yé? Baa a bi bôk a ndogbene Yéhôva? Baa ba bi bôk ba béhe nye a nok bé? Bibel i ntimbhe bé mambadga mana. Ndi di nlama yi le: “Liboñok libe li ta bé” yak Yéhôva. (Ndiimba Mbén 32:4) Ilole a mpémés mbagi, a nwan ndugi i mam momasôna ma bi tagbe, a nkéés bé inoñnaga ni yom a nok, a ntodol bé bôt, mahoñol mé ma kôdi bé to kiki ma bôt ba binam. (Añ Bibôdle 18:20, 21; Ndiimba Mbén 10:17.) Kiki di nke ni bisu i yi Yéhôva ni mambén mé, hala nyen di nkônde bôdôl nye ñem. To ibale di ñañ ngim ñañ u Bibel di kahal badba ngim mambadga, ndi di kôhna bé ndimbhe nano, di nyi Yéhôva, di nyi le “a tée sép mu manjel mé momasôna.”​—Tjémbi 145:17.

5. Kiki di bi gwééne ikété béba, hala a ntinde bés i boñ kii? (Béñge yak minkéñék mi matila mini le: “Kiki di bi gwééne ikété béba, di nkéés bé i nya i kôli.”)

⁵ Kiki di bi gwééne ikété béba, di nla bé kéés mam i nya i kôli. Di yé i pôna Nyambe, jon di gwé ngôñ le telepsép i ba. (Bibôdle 1:26) Ndi kiki di bi gwééne ikété béba, di nla bep kéés ngim hop, to ibale di nhoñol le di nyi mam momasôna. Di bigda lelaa Yôna a bi unup i ngéda Yéhôva a bi kit le a ñéba bôt ba Ninivé konangoo. (Yôna 3:10–4:1) Ndi, mam ma bi sôk lelaa? Iloo 120 000 bôt ba Ninivé ba bi pei! Sôk i nsôk, di ntehe le Yôna nyen a bi yoba, he Yéhôva bé.

6. Inyuki Yéhôva a gwé bé le a kal bés inyuki a nyoñ ngim makidik?

⁶ Yéhôva a gwé bé le a bat bés yom yo ki yo ngéda a nyoñ makidik mé. I yé mbale le Yéhôva a bi nwas le ngim ba-gwélél yé i kôba i kal nye i mam ma bé tééñga bo mu makidik a bi yoñ, tole ma a bé sômbôl yoñ. (Bibôdle 18:25; Yôna 4:2, 3) Mangéda mahogi, a bé a toñle yak bagwélél bé inyuki a nyoñ ngim makidik. (Yôna 4:10, 11) Ndi Yéhôva a ta bé nyégsaga i toñle bés hiki yom a mboñ. Nyen a bi hek bés, jon a gwé bé le a bat bés mahoñol més ilole a mboñ jam, tole i ngéda a mal boñ jo.​—Yésaya 40:13, 14; 55:9.

BÔDÔL YÉHÔVA ÑEM I NGÉDA NTÔÑ U NYOÑ MAKIDIK

7. Imbe ndutu di yé le di boma, inyuki?

⁷ Bésbobasôna di nyi le i yom Yéhôva a nkal yon i téé. Ndutu yés i yé i bane i nôgôl bôt Yéhôva a mpohol inyu éga bés. Di yé le di kahal badba too i bôt Yéhôva a ntep inyu éga bés ba mboñ toi sômbôl i Yéhôva tole sômbôl yap yon ba mboñ. I ngéda kôba, bôt ba bé le ba bana i nya mahoñol i. Di bigda miñañ di mpôdôl i liben 3. I mut a bi ke i bada tjéé i kel Sabat, mut wé lihaa a bé le a badba too Môsi a nkwel toi ni Yéhôva ilole a nyoñ makidik le ba nol i mut nu. Liwa-nda li Uria man Lôk Hét nu David a bi ke i ndéñg ni nwaa wé, li bé le li kal le David a ngwélél tel yé i kiñe inyu so kogse. Ndi i pot maliga, di nla bé kal le di mbôdôl Yéhôva ñem ibale i bôt a bi pohol inyu éga bés, di mbôdôl bé bo ñem.

8. Inoñnaga ni Minson mi baôma 16:4, 5, inyuki likoda li hiai hi bisu li mpôna likoda li ngéda yés?

⁸ I len ini, “nkol u maliga ni u pék” won Yéhôva a ngwélél inyu éga ntôñ wé. (Matéô 24:45) Kiki juu li bakena ntôñ li hiai hi bisu, nkol u maliga ni u pék u ñéga nson i nkoñ ’isi wonsôna, u tinak mimañ biniigana. (Añ Minson mi baôma 16:4, 5.) Mimañ mi ngwélél biniigana bi i makoda. I ngéda di noñ biniigana bi Juu li bakena ntôñ ni mimañ, wee di mbôdôl Yéhôva ñem.

9. Mambe makidik ma mimañ ma nla lédél bés i noñ, inyuki?

⁹ Ngim mangéda, di yé le di bana ndutu i neebe makidik mimañ mi nyoñ. Kiki hihéga, munu nwii mini ba bi héñha ngandak mam ikété ngim makoda ni makiiña. Mimañ mi bi kal ngim lôk kéé le ba kee makoda mape inyu boñ le di tibil gwélél mandap ma Ane. Ibale ba ñep bés likoda lipe, hala a nla lédél bés i yék mawanda més ni bôt bés ba lihaa. Baa Nyambe nyen a nkal mimañ imbe lôk kéé ba nlama ep makoda mape? To. Inyu hala nyen di yé le di bana ndutu i neebe makidik ma nyôña. Ndi di nlama yi le ngéda mimañ mi nyoñ makidik, Yéhôva a mbôdôl bo ñem, jon yak bés di nlama bôdôl bo ñem.b

10. Inoñnaga ni kaat Lôk Héber 13:17, inyuki di nlama nôgôl mimañ?

¹⁰ Inyuki di nlama nôgôl mimañ, di neebe ki makidik ba nyoñ to ibale ma nlémél bé bés? Inyule i ngéda di mboñ hala, adna i nkônde ba ikété ntôñ Djob. (Éfésô 4:2, 3) Ngeñ lôk kéé i nit makidik ma mimañ ni suhulnyuu, mam momasôna ma nke loñge i makoda. (Añ Lôk Héber 13:17.) Jam li nlôôha nseñ li yé le, ngeñ di nôgôl bôt Yéhôva a mpohol inyu éga bés, wee di mbôdôl Yéhôva ñem.​—Minson mi baôma 20:28.

11. Kii i nla hôla bés i kônde bôdôl mimañ ñem?

¹¹ Inyu kônde bôdôl mimañ ñem, di nlama bigda le ilole ba nyoñ makidik, ba yé ba bat Yéhôva mbuu mpubi wé. Ba nyéñ ki maéba ikété Bañga i Djob, ba noñok biniigana bi ntôñ. Ba gwé ngôñ i lémél Yéhôva, ni i hôla lôk kéé i bôda ni i bôlôm i lédés hémle yap. Ba nyi le ba ga timbhe bisu bi Yéhôva inyu makidik ba nyoñ. (1 Pétrô 5:2, 3) Hoñol ki, mbagla i yé nnayak i nkoñ ’isi, mbagla matén, mbagla ikété bibase ni mam ma m’bô, ndi bagwélél ba Yéhôva ba mbégés nye ikété adna. Ibale Yéhôva a bak bé ni ntôñ unu, ki i jam lini li nla bé bôña!

12. Kii mimañ mi nlama wan inyu yi too mut a ntam béba yé?

¹² Yéhôva a bi bééga mimañ mbegee ikeñi le ba boñ le likoda li hooba bañ mahindi. I ngéda mut a mboñ béba ikeñi, sômbôl i Yéhôva i yé le mimañ mi wan inyu tehe too i mut nu a nlama yégle i ntôñ. Ikété mam ba mbéñge, jada li yé le ba tehe too i mut nu a ntam toi béba yé. A nla kal le a ntam, ndi baa a ñoo i jam a mboñ? Baa a nyoñ makidik le a mboñ ha bé i béba i? Ibale bilôñ bibe gwon bi bi boñ nye le a kwo i béba, baa a nwas bilôñ bi? I ngéda mimañ mi nwan i jam li, mi nsoohe Yéhôva, mi gwélél ki Bitilna, mi tibil béñge inyu yi too i mut nu a ntam toi béba yé. Ha nyen ba nkit too i mut a mboñ béda ikeñi a nlama yégle i ntôñ. Ngim mangéda, ba yé ba kit le ba mpémés nye i ntôñ.​—1 Korintô 5:11-13.

13. Kii i nla tééñga bés ibale ba mpémés liwanda jés tole mut wés lihaa i ntôñ?

¹³ Kii i nla boñ le di bana ndutu i bôdôl mimañ ñem? Ibale i mut ba mpémés i ntôñ a ta bé liwanda jés tole mut wés lihaa, di yé le di hoo neebe i jam li. Ndi ibale ba mpémés liwanda jés tole mut wés lihaa i ntôñ, di nla hoñol le mimañ mi ntibil bé wan inyu yi kiki mam ma bi tagbe. Tole di nla badba too ba nkéés i hop u kiki Yéhôva a bak le a kéés wo. Kii i nla hôla bés i neebe makidik mimañ mi nyoñ?

14. Kii i nla hôla bés i neebe makidik mimañ mi nyoñ i mpémés liwanda jés tole mut wés lihaa i ntôñ?

¹⁴ Di hôya bañ le Yéhôva nyen a bi kit le ibale mut a mboñ béba a tam bé, ba nlama pémés nye i ntôñ, ni le hala a yé inyu loñge i mut a mboñ béba, ni i likoda. Ibale mut a mboñ béba ikeñi a tam bé, ndi ba héya bé nye ntôñ, a nla yumus ini lôk kéé ipe. (Galatia 5:9) I nla ki pam le nyemede a ntehe bé le i jam a mboñ li yé béba, ni le bebek a ta bé bebee i héñha mahoñol mé ni maboñok mé inyu lémél Yéhôva. (Ñañal 8:11) Di nlama yi le ilole mimañ mi nkit le mi mpémés mut i ntôñ, mi ntibil ôt pék mu jam li. Kiki bakéés ba ba bé i loñ Israel i ngéda kôba, ba nyi le ba “mpémés bé mbagi inyu mut, ndi ndik inyu Yéhôva.”​—2 Miñañ 19:6, 7.

I BÔDÔL YÉHÔVA ÑEM NANO I GA HÔLA BÉS DILO DI NLO

15. Inyuki di nlama lôôha bôdôl Yéhôva ñem nano iloo i ngéda bisu?

¹⁵ Kiki lisuk li hiai hini li nkôôge bebee, di nlama lôôha bôdôl Yéhôva ñem nano iloo i ngéda bisu. Inyuki? I ngéda njiiha keñi y’a bôdôl, ba yé le ba ti bés biniigana bi d’a nok bé, tole bi d’a bana ndutu i nôgôl. Di nyi le Yéhôva nyemede bé nyen a ga pôdôs bés. Bebek a ga ti bés biniigana ni njel i bôt a ntep inyu éga bés. I ga béda bé le di kahal pééna biniigana bi, tole di kahal badba le: ‘Baa Yéhôva toi nyen a nti biniigana bini, tole lôk kéé yomede yon i mbot gwo?’ Baa w’a bôdôl Yéhôva ni ntôñ wé ñem ha ngéda i? Ibale u mbôdôl bo ñem nano, wee w’a bôdôl bo ñem yak i ngéda njiiha keñi y’a bôdôl.​—Lukas 16:10.

16. Inyuki i yé le i bane bés ndutu i bôdôl Yéhôva ñem dilo di nlo?

¹⁶ Di nlama yak yoñ ngéda i ôt pék mu mbagi Yéhôva a ga pémés i lisuk li nkoñ ’isi unu. I len ini, di mbot ñem le ngandak bôt i i ngwélél bé Yéhôva kiki bo bôt bés ba lihaa, ba ga bôdôl gwélél nye nwaa le lisuk li nkola. Ndi i gwét bi Armagédôn, Yéhôva a ga ep Yésu i pémés mbagi inyu yap. (Matéô 25:31-33; 2 Tésalônika 1:7-9) Bés bé bon d’a kit too mut a nlama pei i gwét bi, too a nlama bé pei. (Matéô 25:34, 41, 46) Baa d’a ba maséé ni mbagi Yéhôva a ga pémés, tole d’a unup? Di nlama bôdôl Yéhôva ñem nano, inyu boñ le di kônde bôdôl nye ñem dilo di nlo.

17. Bimbe bisai di ga kôs i ngéda Yéhôva a ga pémés mbagi i lisuk li hiai hini?

¹⁷ Hégda maséé di ga nok i mbok yondo, ngeñ d’a tehe bisai Yéhôva a ga kôp bés ngéda a mal pémés mbagi munu nkoñ ’isi unu. Kwéha base y’a ba ha bé, yak bôt ba nyuñga ni bôt ba m’bô ba ba bi tét bôt ba binam nwii ndi nwii, ba ga ba ha bé. Makon, nyemb, ni biuni bi ga ba ha bé. Satan ni mi-mbuu mimbe, ba ga ba i mok hikôô hi nwii. I mam mabe momasôna ba bi lona munu nkoñ ’isi ma ga ba ha bé. (Masoola 20:2, 3) Kinje maséé di ga nok ha ngéda i, inyule di bi bôdôl Yéhôva ñem!

18. Bimbe biniigana di ñôt mu ñañ u Lôk Israel u u yé i kaat Ñañga bôt 11:4-6 ni 21:5?

¹⁸ Baa di yé le di boma mandutu i mbok yondo, ma ma nla boñ le hala a lédél bés i bôdôl Yéhôva ñem? Di bigda le jam li bi bôña ndék ngéda i mbus mapam ma Lôk Israel i Égiptô. Bahogi ba bi kahal tjelel inyule ba bé hoñol bijek bilam ba bi yék nyoo i Égiptô, ba yan mana Yéhôva a bi ti bo. (Añ Ñañga bôt 11:4-6; 21:5.) Baa yak bés di yé le di bana mahoñol ma ngeñ njiiha keñi y’a mal? Di nyi bé lelaa bôlô y’a ba i ngéda d’a ba di mpubus hisi, inyu boñ le ndék ni ndék hi yila paradis. Bôlô i yé le i ba ngandak, bebek d’a boma yak mandutu. Baa d’a tjelel ibale Yéhôva a nti bé bés i yom di nsômbôl ha ngéda i? I yom di nyi i yé le, ibale di nkon maséé ni yom Yéhôva a nti bés nano, d’a ba maséé ni i a’ ti bés ha ngéda i.

19. I sem kwep, kii u ntéda munu yigil?

¹⁹ Hiki yom Yéhôva a nkal bés le di boñ, i téé ndigi. Di nlama bé pééna i jam li. Yak lôk kéé i Yéhôva a ntep inyu éga bés, di nlama bôdôl bo ñem. Di hôya bañ bibañga bi Yéhôva bini mpôdôl Yésaya a bi pot le: “Ngui nan y’a ba le ni yén nwee, ni bôdôl ki me ñem.”​—Yésaya 30:15, MN.