Njômbi i yé kiki ngim ntjegek jam; ibale ni mboñ biliya ni nla yônôs yo
INYU BOÑGE BA WANDA
12 Njômbi
KII HALA A NKOBLA
Njômbi i ta bé i emel le u nkôs ngim jam u nsômbôl bana. Ndi bañga njômbi i nlama tjéga, i nlama kiha ki ni mam ma mpémél we, u nlama ki sal ni ngui inyu yônôs yo.
Njômbi i nla nom dilo, sonde, sôñ tole ngandak nwii. Inyu yônôs njômbi i i nom ntandaa ngéda, i mbéda le ni yônôs ndugi njômbi i i nom ndék ngéda.
INYUKI HALA A YÉ NSEÑ
Ibale u nyônôs njômbi yoñ, hala a nla kéñbaha botñem yoñ, a lédés maada u gwé ni mawanda moñ, a lona ki we ngandak maséé.
Bana makénd: Ngéda u nyônôs bon boñ ba njômbi, hala a nti we makénd i bana njômbi ikeñi ipe. U ga nôgda le makénd moñ ma nkônde let ngéda manoodana ma mpémél we—téntén i ngéda biséga gwoñ bi nyégsa we i boñ jam libe.
I bot mawanda: Bôt ba ngwés ba nkiha ni bôt bape ba ba gwé njômbi ilam, ba boñok ki biliya i yônôs yo—hala wee i bet ba nyi i yom ba nyéñ boñ. Ni ki le inyu lédés maada més ni bôt bape, i yé loñge le di sal ntoñ ni mut nu a gwé nlélém njômbi kiki bés.
Bana maséé: I ngéda u nyônôs njômbi yoñ, u ga nôgda le jam u mboñ li nkônha we maséé.
“I bana njômbi i me nla yônôs i nkôhna me maséé. I nti ki me pôla i boñ ngandak minyiña. I ngéda u nyônôs njômbi yada, ndi u béñge mbus yoñ, hala a nla hélés we, kayéle u badba le: ‘Baa me toi nyen me mboñ jam lini? Ñ!’”—Kristôfer.
LITIÑ LI BIBEL: “Nu a ntoñol mbebi a’ nwas bé mbôô; nu ki a mbéñge ond a’ bumbul bé.”—Ñañal 11:4.
JAM U NLA BOÑ
Inyu bana njômbi ni yônôs yo, boñ haana:
Yéñ yi kii i yé njômbi yoñ. Tila yosôna i lipep, u pohol i i nlôôha ba mahee. U bok ki yo—imbe i mbôdôl, imbe i noñ? Hala ni hala.
Tjek mam. Inyu hôla we i yônôs hiki njômbi, u béñge matode ma ma noñ:
U nlama téé ngéda i kôli inyu yônôs njômbi yoñ.
U tjek ki mam momasôna inyu yônôs yo.
Hégda mandutu ma u nla boma mu njel, ni lelaa u nla keñgle mo.
Jôp bôlô. U bem bañ letee mam momasôna ma ba kiki u ngwés. Badba le: ‘Limbe jam li bisu me nlama bôk boñ inyu yônôs njômbi yem?’ U boñ ki jo. Kiki u mba u nke ni bisu i yônôs njômbi yoñ, u béñgege mbus inyu tehe mahol moñ.
LITIÑ LI BIBEL: “Mahoñol ma mut nu a nyamnda ma nyamb nyambak.”—Bingéngén 21:5.