Ibale u yé maséé ni ntén mut u yé, to mbebi i nhôñ lelaa, u ga piñgla bé
INYU BOÑGE BA WANDA
9 Libak
KII HALA A NKOBLA
Libak joñ li ta bé ndik jôl joñ, li ta bé ki to kiki u nene i bitéé bi mis. Ndi hala a yé yak mam u ndiihe, mam u nhémle ni liboñok joñ li mam. Ni maliga, libak joñ li yé mam momasôna ma mboñ le u ba ntén mut u yé—ikété ni i mbédgé.
INYUKI HALA A YÉ NSEÑ
Ibale u yé maséé ni ntén mut u yé, hala wee ni libak joñ, u ga neebe bé le biséga gwoñ gwon bi yôñôl we makidik, ndi u ga sôñ mam u nhémle ni makénd.
“Ngandak bôt i yé kiki ôñgba i mut het téla a nhégél mambot. I ôñgba i bé yon i mpohol mambot i nhaba; ndi bôt.”—Adrian.
“Me bi nigil i boñ mam ma téé sép to ibale hala a yé a nlet. Me nyil bañga yem mawanda i bibôñôl gwap, ni i yom me mbôñôl bo.”—Courtney.
LITIÑ LI BIBEL: “Ni pôôna bañ hiai hini, ndi ni héña héña yosôna mu yila mahoñol manan ma nyila yondo.”—Rôma 12:2.
JAM U NLA BOÑ
Ibale u gwé ngôñ i ba maséé ni ntén mut u yé hanano, ni ntén mut u nsômbôl ba yani, u nlama yi bilem gwoñ bilam, bibomb gwoñ ni mam u nhémle. Inyu boñ hala, njel lam yada i yé le u timbhe mambadga ma ma noñ.
Bilem bilam: Kii me nyi boñ, bimbe bibôlô me nla sal? Bimbe bilem bilam me gwé? (Kiki hihéga: Baa me yé mut a noñ ngeñ? Mut hôtnyu? Mut bôlô? Mut likap?) Mambe mam malam me mboñ?
NDÉK MAÉBA: Baa u gwé ndutu i yi bilem bilam u gwé? Bat mut woñ lihaa, tole liwanda joñ u mbôdôl ñem le li kal we bimbe bilem bilam a ntehe le u gwé, ni inyuki a nhoñol le u gwé gwo.
LITIÑ LI BIBEL: “Hi mut a wan ndigi wé wé nson, ha ni nyen a’ bana yé yadbene inyu yé nyetama, ndi ha inyu numpe bé.”—Galatia 6:4.
Bibomb gwoñ: Bimbe bilem bilam ikété libak jem me nlama sal ni ngui inyu bana? Imbe ngéda me yé le me pala kwo ikété manoodana? Inyu mambe mam i mbéda me ngandak hôtnyu?
LITIÑ LI BIBEL: “Ibale di nkal le di gwé bé béba, wee di nlôk bésbomede.”—1 Yôhanes 1:8.
Mam u nhémle: Mambe mam me ntehe kiki loñge tole béba, ni inyuki me ntehe mo hala? Baa me nhémle Djob? Kii i bi kwés me nkaa le Djob a yé? Mambe maboñok me ntehe le ma téé bé sép, ni inyuki me ntehe mo hala? Inyu yem, i dilo ti di nlo di ga ba lelaa?
LITIÑ LI BIBEL: “Pék i bagal mam y’a tééda we, tibil yi yoñ y’a tat we.”—Bingéngén 2:11.