LEM 6

A nlama yi loñge ni béba

LOÑGE NI BÉBA WEE KII?

I bôt ba gwé bilem bilam ba ntibil yi kii i yé loñge ni kii i yé béba. I yi i, i niñne bé i mahoñol map bomede. Ndi i umne ngii matiñ ma ma ñéga bo—to i ngéda ba yé botama.

INYUKI I YI LOÑGE NI BÉBA I YÉ NSEÑ?

Nkoñ ’isi u mbéna umbe boñge minkoda mi biniigana, bo i suklu, bo minsik ba ñemble, bo bisinima tole mu mam mape ba mbéñge i télé. Biniigana bi, bi nla héñha litehge jap inyu loñge ni béba.

Hala a mbéna nene téntén yak mañge wanda. Inoñnaga ni i kaat ba nsébél le Beyond the Big Talk, ha ngéda i nyen ba “nlama tibil nok le bisega gwap ni biniigana bi nkoñ ’isi bi nsômbôl tinde bo i yiba ni i kadba. Ba nlama ki nigil i yoñ makidik ma ma nkiha ni biniigana ba bi kôs to ibale hala a nlémél bé bisega gwap.” Ntiik, ba nlama bôdôl niiga bo i mam mana ilole ba nyila boñge ba wanda.

LELAA U NLA NIIGA MAN WOÑ KII I YÉ LOÑGE NI BÉBA?

Unda nye kii i yé loñge ni kii i yé béba.

LITIÑ LI BIBEL: “Binéñha bi bôt . . . bi nhianda ikété mahoñol map le ba yi bagal jam lilam ni jam libe.”—Lôk Héber 5:14.

Niiga nye i pohol bibuk a nlama gwélél. Hiki kel, gwélél mam a mboma inyu tibil bagal mam. Kal nye le: “Lini jam li yé maliga, lini li yé malôga.” Tole “lini li téé sép, lini li téé bé sép.” Tole “lini li yé loñge, lini li bak béba.” Kiki ngéda i mba i ntagbe, hala nyen man woñ a ga yi maboñok ma ma yé loñge, ni ma ma yé béba.
Toñle nye inyuki i yé nseñ i yi kii i yé loñge ni kii i yé béba. Kiki hihéga, bat nye mambadga kiki bo: Inyuki i nlôôha ba nseñ i ba maliga? Lelaa malôga ma nla sagal mawanda? Inyuki wip u yé mbe? Hôla man woñ i niiga kiñ yé ñem ni i ôt pék.
Yigye nseñ i yi loñge ni béba. U nla kal nye le: “Ibale u yé maliga, bôt bape ba ga bôdôl we ñem” tole “ibale u yé minyaô, bôt ba mba ba nkwo we i nyuu.”

Boñ le i yi loñge ni béba i ba yimbne i lihaa joñ.

LITIÑ LI BIBEL: “Wana yaga bébomede.”—2 Korintô 13:5.

Bilem bilam bi nlama nene mu lihaa joñ inyu boñ le u laa pot ni makénd le:
- “I yem mbai bitembee bi ta bé.”
- “I bésni nyayak u ta bé to ndôm.”
- “Bisol bi ta bé i bésni.”

Man woñ a ga tehe le bilem bilam bi tane bé nye nkôô i kiñ, ndi bi yé ndigi matéak ma ma yé yimbne i lihaa linan.

Bana lem i kwel ni man woñ inyu bilem bilam bi lihaa linan. Gwélél mam a mboma hiki kel inyu niiga nye. U nla hégha i mam u niiga nye lôñni biniigana bi nkoñ ’isi tole bi a mboma i suklu. Bat nye mambadga kiki bo: “Kii u bak le u boñ?” “Lelaa lihaa jés li bak le li leege i jam lini?”

Hôlôs makidik mé i yi loñge ni béba.

LITIÑ LI BIBEL: “Ni ban-ga loñge kiññem.”—1 Pétrô 3:16.

Bégés bihiumul bilam. Ibale man woñ a ñunda lem ilam mu maboñok mé, bégés nye inyu jam li, u toñle ki nye inyuki u mbégés nye. Kiki hihéga, baa u nla kal nye le: “Hala kiki u mba maliga, u nkônha me maséé.” Ibale man woñ a nkal we le a mboñ hihôha, bégés nye bañga libéghak inyu libak jé li maliga ilole u nkodol nye.
Kodol maboñok mabe. Hôla man woñ i neebe dihôha tjé tole maboñok mé mabe. Boñge ba nlama yi dihôha ba mboñ ni lelaa dihôha ti, di ntihba lihaa. Ngim bagwal i mbéna segde inyu boñ le bon bap ba ‘nôgda bañ’ i ndutu dihôha tjap di nla lona. Ndi i kwel we ni man woñ inyu dihôha tjé a mboñ, i ga hôla nye i lémés kiññem yé inyu yi kii i yé ibe ni kii i yé ilam.

Inyu kôhna biniigana bipe, bagwal ba nla ke i jw.org, tole ba nla ôt kôd.

I yom di bi boñ . . .

“Di bi gwélél pék i bôt bape ba bi unda inyu kwés bon bés nkaa le i bana bilem bilam i yé loñge, di hégha ki i yéñe ba bi kôs lôñni bikuu bôt bape ba bi boma inyule ba bi yoñ bé makidik malam. Ngéda bon bés ba bi kal bés le liwanda jap jada li bi yoñ makidik mabe, di bi kwel ni bo inyu unda bo le ba nlama bé nigle i nya ndémbél i.”—Nicole.

“Ngéda ngond yés i bé i ngi yii njohok, di bé béna kal nye le a gwé kunde i pohol ipôla mam ima: I boñ loñge tole i boñ béba. Di bé ki di tibil toñle nye limbe lisuk hiki makidik a nyoñ ma ga lona nye. Liboñok li, li bi hôla nye i yi yoñ makidik malam. Hala a bé suklu ilam kiyaga inyule to i ba ya lelaa, to di ngwés, to di ngwés bé, ikété niñ yés, di nlama ndigi yoñ makidik.”—Yolanda.