Mbôô i pes mahoñol

Bibel i mbéhe le di keñgle mahoñol mabe, ndi di bana mahoñol malam.

HIUN

LITIÑ LI BIBEL: “Nu a mpala bé nyai a nloo mpémba mut.”—Bingéngén 16:32.

KII HALA A NKOBLA: Di nkôhna nseñ ngéda di nhôlôs lem i gwel bésbomede. Ngim mangéda di nla bana manjom i unup, ndi ibale di ngwel bé bésbomede, hiun hi nla lona bés bikuu. Minyiña mi bi unda le bôt ba mbéna tam mam ba mboñ ikété hiun.

YOM U NLA BOÑ: U neebe bañ le hiun hi ane we, ndi iloo hala nigil i gwel wemede. Tolakii ngim bôt i nhoñol le ngéda mut a ñunup wee a gwé ngui, ni maliga hiun hié hi ñunda ndigi le a yé bomba. Bibel i nkal le: “Nu a nla bé ane mbuu wé, a yé kiki nkuubaga nkoñ, u u gwé ha bé mapénd.” (Bingéngén 25:28) I bana lem i ôt mahoñol ilole u mpot tole u mboñ jam i nla hôla we i tibil gwel wemede. “Mut yihe a mpala bé nyai.” (Bingéngén 19:11) Ibale u nyoñ ngéda i tibil wan makas momasôna ma ngim jam, hala a nla hôla we i bana litehge lilam inyu jam li, ni i gwel wemede.

I TI MAYÉGA

LITIÑ LI BIBEL: “Ni yi ki ti mayéga.” —Kôlôsé 3:15, MN.

KII HALA A NKOBLA: I nkéla le i bet ba gwé lem i ti mayéga ba mbéna ba maséé. To bet ba bi nimis mut tole mam ba bé gwés, yak bo ba yé mu kiñ i. Ba nkal le yom i nhôla bo i tééda mahoñol malam i yé le ba mbok bé mis map i ngii mam ba bi nimis, ndi ba yé maséé ni mam ba gwé.

YOM U NLA BOÑ: Hiki kel, sima mam ma nkônha we maséé. To ibale mam ma, ma yé matitigi. Bigda disii di mam di niñ yoñ, kiki bo manañle ma hiañgaa, loñge nkwel ni mut u ngwés, tole nsima u gwé i tehe mapubi ma kel. Ibale u nyoñ ngéda i yimbe ni i ti mayéga inyu mam mana, hala a nla hôla we i ba mbôô i pes mahoñol.

I yi ti mayéga inyu maada malam u gwé ni bôt boñ ba lihaa yak ni mawanda moñ i nla hôla we i ba maséé. Ngéda u nléba mam ma nlémél we yak bôt bape, kal bo mo, u nla ki boñ hala ni njel léta, internet tole téléfôn. I boñ hala i ga lédés maada moñ ni bôt bape, u ga ba ki maséé inyule u gwé lem i ti.—Minson mi baôma 20:35.

MATIÑ MA BIBEL MAPE

Nyañ mbai wada a ñemble Bibel ni njel internet ngéda a mbok mbot i ngond yé — U nla yoñ lisoñgol li Bibel ni hilémb hi u nok ni njel internet. Lisoñgol li, li mpam ikété yom kiki bo 40 ma dilémb i jw.org

KEÑGLE JOMOL.

“Bibôdle bi ndañ bi yé kikii mut le a nyibil jegi; jon kehba, bisañ gwo ngi bôdôl.”—BINGÉNGÉN 17:14.

U TÔÑ BAÑ NGANDAK INYU BILÔL.

“Jon ni tôñ bañ inyu yani, inyule yani y’a bana yé nduña. Ndutu kel yada i nkola yokel i.”—MATÉÔ 6:34.

YOÑ NGÉDA I ÔT PÉK ILOLE U BOÑ NGIM JAM.

“Pék i bagal mam y’a tééda we; tibil yi yon y’a tat we.”—BINGÉNGÉN 2:11.