Baa Mbôgi Yéhôva yañen u nyi? Bahogi ba nyééne we i pañ, bape ba nsal ni we, tole ba yé i suklu ni we. I nla ki ba le u nigil Bibel ni bo. Ndi i maliga, mimbe mintén mi bôt di yé, ni inyuki di mpahal hémle yés i mbamba?

Di yé kiki bôt bobasô. Di nlôl matén momasô ni mahaa momasô. Bahogi ikété yés ba bé bibase bipe, bape ba bé hémle bé to le Djob a yé. Ilole di nyila Mbôgi Yéhôva, hiki wada ikété yés a bi tibil wan biniigana bi Bibel. (Minson mi baôma 17:11) Di bi kwo nkaa ni mam di bi nigil, jon di bi yoñ makidik i bôdôl gwélél Yéhôva Djob.

Di ntehe nseñ i nigil Bibel. Kiki hi mut, di mboma més mandutu. Di gwé ki gwés bibomb. Ndi kiki di nligip i noñ biniigana bi Bibel hiki kel, di ntehe mahéñha malam i niñ yés. (Tjémbi 128:1, 2) Njom yada i yon i ntinde bés le di añle bôt mam malam ma di nigil ikété Bibel.

Di ndiihe biniigana bi Djob i niñ yés. Bi biniigana, bi nhôla bés i kôs maséé, i ti bôt bape lipém, ni i bana bilem kiki bo ba maliga ni bana loñge ñem. Bi nhôla ki i ba mbôô, i ba bôt ba bôlô, i at mahaa ni i bana bilem bilam. Di yé nkwoog nkaa le Djob “a ta bé ntodol bôt.” Jon di yé bañga lihaa li mbuu ntjamak ni nkoñ isi wonsôna, ibabé mbagla matén to minlôñ mi m’bô. To la kii hi wada wés a yé yañga mut, bés bobasôna di yé litén li yé tôbôtôbô.​—Minson mi baôma 4:13; 10:34, 35.

• Kii i mboñ le Mbôgi Yéhôva i yé kiki bôt bobasôna?

• Bimbe biniigana bi Bibel Mbôgi Yéhôva i ndiihe?

Ngandak bôt i nhoñol le Mbôgi Yéhôva i yé base i mondo. Iloo 2 700 ñwii i len ini, bagwélél ba Bañga mpom Djob ba bé yiba kiki “mbôgi” yé. (Yésaya 43:10-12) I ngéda bisu, di bé sébla le Banigil Bibel. Ndi i ñwii 1931 nyen di bi yoñ jôl le Mbôgi Yéhôva. Inyuki di bi yoñ jôl di?

Jôl di li nyis bôt njee a yé Djob jés. Noñnaga ni bitilna bi kwañ, jôl li Djob le Yéhôva li bé lébna yom kiki bo 7 000 ngélé ikété Bibel. Ngandak ngobol i Bibel i bi héñha i jôl di lôñni mangédi, kiki Djob tole Nyambe. Ndi bañga Djob a yelene Môsé jôl jé, le Yéhôva, a kal nye le: “Lini jon li yé jôl jem mba ni mba.” (Manyodi 3:15) Hala nyen a unda maselna i pôla nye ni bikwéha bi mob. Jon di mbép woo tôl le di béga ni jôl lipubi li Djob.

Jôl di li ntoñol nson wés. Ntandaa nlôñ u bôt ba kwañ, bôdôl ni mut telepsép le Abel, ba bi bok mbôgi le ba nhémle Yéhôva. I mbus ñwii ndi ñwii, Nôa, Abraham, Sara, Môsé, David ni bape ki, ba bi kôndba mu “limut li mbôgi kiki ont.” (Lôk Héber 11:4–12:1) Nlélém kiki mut a nla ti mbôgi i ndap bikéhene inyu sôñ mut nu a yé ngi nsohi, hala nyen yak bés di ntéñbe i yis bôt maliga inyu Djob jés.

Di noñ ndémbél Yésu. Bibel i nsébél nye le “mut maliga ni bañga mbokmbôgi.” (Masoola 3:14) Yésu nyemede a bi kal le a ‘bi yis bôt jôl li Djob,’ ni le a bi ‘bok mbôgi inyu maliga.’ (Yôhanes 17:26; 18:37) Jon bañga banigil ba Yésu ba nlama begel ni yis jôl li Yéhôva. Jam li jon Mbôgi Yéhôva i nligip i boñ.

• Inyuki Banigil Bibel ba bi yoñ jôl le Mbôgi Yéhôva?

• Ngéda mbe Yéhôva a bi bôdôl bana mbôgi hana isi?

• Njee a yé Mbôgi Yéhôva i bôk ni sôk?

Bibel i bi bôk pot le i mbus nyemb Yésu, baniiga ba bitembee ba ga pémél ikété bikristen bi bisu inyu ôbôs maliga ma Bibel. (Minson mi baôma 20:29, 30) Kiki i bi pôda, hala nyen i bi bôña. Bôt ba, ba bi pôdna biniigana bi Yésu ni biyi bi bibase bi bitembee. Hala nyen kwéha base i ndôk bikristen i bi gwéé. (2 Timôtéô 4:3, 4) Kii i nkwés bés nkaa, i len ini, le di ntibil nok i yom Bibel i niiga toi?

Ngéda bi pam le Yéhôva a yelel maliga. Yéhôva a bi bôk pot le i masuk ma ngéda, bañga ‘yi y’a hol nholok.’ (Daniel 12:4) I ñwii 1870, man juu li bôt li bé yéñ maliga. Ba léba le, libim li biniigana bi bibase bi bé kiha bé ni Bibel. Jon ba bi bôdôl wan biniigana bi bisu bi Bibel. Yéhôva a sayap bo le ba nok Bitilna.

Bañga liwanak li Bibel. Banigil Bibel ba bééna liboñok li yak bés di nigle i len ini inyu wan Bibel. Ba bé wan nkwel wada i mbus unu. Ngéda ba mboma pes kaat i nlet i nok, ba nyéñ bipes bi bikaat bipe bi nti ndoñol. Ngéda ba nkôs nokna i yé maada ni bitilna gwobisôna, ba nsugus, ba tila yo. Hala ni nyen Bibel i ntoñol ni yomede. Ba bi témb ba léba maliga inyu jôl li Djob ni Ane yé, bitééne gwé inyu bôt ba binam ni hisi, libak li bawoga, ni botñem i bitugne. Liwanak jap li bi kobol bo minkôm mi bikwéha bi biniigana, ni maboñok mabe.​—Yôhanes 8:31, 32.

I ñwii 1879, Banigil Bibel ba bi pam i nok le ngéda i nkola le nkoñ isi wonsôna u yi maliga. Jon i ñwii u, ba bi bôdôl pémés mbamble, di ngi pémhak i len ini, ba nsébél ni hop pulasi le La Tour de Garde annonce le Royaume de Jéhovah (Nkum Ntat u ñañal Ane i Yéhôva). Di ñañal ñañ lam ikété 240 biloñ ni ikété bebee le 900 i dilémb. Bañga yi i maa bé hol i nya i.

• I mbus nyemb Yésu, kii ba bi boñ ni biniigana bi Bibel?

• Lelaa maliga ma bi tiimba nene?

I bôdôl ñwii ndi ñwii, Mbôgi Yéhôva i bi gwélél, i tila, i kap ngandak i ngobol i Bibel. Mbus ngéda, di bi tehe nseñ i pémés ngobol i Bibel mondo i nhôla bôt le ba kôhna bañga yi i maliga. Hala a yé sômbôl Djob inyu hiki wada wés. (1 Timôtéô 2:3, 4) Jon i ñwii 1950, di bi bôdôl pémés Bibel ni hop ngisi bipes bipes. Di nsébél yo ni pulasi le Traduction du Monde Nouveau (Ngobol i Mbok Yondo). Di ma kobol i Bibel ini iloo 160 ma dilémb. I ngobol ini, i yé maliga i bak ki bañga. I gwé ki bibuk bi mpôda i len ini.

Bibel i nôga loñge i bé béda. Dilémb di nhéñha kiki ngéda i ntagbe. Jon ngandak ngobol i bi sôk bana minlômbi mi bibuk tole bibanga le bôt ba nok ha bé. Bôt ki, ba bi léba minlômbi mi Bibel ni hop Lôk Héber, Aramic ni Grikia. Minlômbi mi Bibel mi, mi ntiige bebee ni bitilna bi bisu bi batila Bibel bomede. Hala a bi hôla bés i kobol Bibel loñge.

Ngobol Bibel i i gwé bé maselna ni bitilna bi bisu. Bakobol Bibel ba ta bé kunde i héya to héñha jam ikété Bitilna bipubi. Ba nlama adbe bas bas i lipôdôl li Nyambe. Ndi ba bi héya jôl li Yéhôva ikété ngandak ngobol.

Bibel i i nti jôl li Nwet wé lipém. (2 Samuel 23:2) Ngobol i Mbok Yondo i bi timbis jôl li Yéhôva bebee le 7 000 di ngélé kiki i ba i bitilna bi kwañ, nlélém kiki titii i ñunda i si lipep. (Tjémbi 83:19) Hala a bi bat ngandak ñwii inyu tibil wan bibuk bi bi ntibil ntoñol mahoñol ma Djob. Jon ngobol i i yé lam i añ. To ibale u gwé bé Ngobol i Mbok Yondo i hop woñ, di nti we makénd i bana lem i añ lipôdôl li Yéhôva hiki kel.​—Yôsua 1:8; Tjémbi 1:2, 3.

• Inyuki di bi kit le ngobol i Bibel i mondo i mbéda?

• Imbe lem lam di nlama bana hiki kel inyu yi sômbôl Djob?