Ngandak bôt i nke ha bé i base inyule ba nkôhna bé mandimbhe i mambadga makeñi ma niñ, to hogbe ba gwé bé. Inyuki ni u nlama ke makoda ma Mbôgi Yéhôva? Umbe nseñ w’a kôhna nyoo?

Maséé i ba ipôla bôt ba ngwés we, ba tôñôg ki we. I hiai bisu, bikristen bi bé ntjegek ikété makoda. Ba bé bomna inyu ti Djob bibégés, inyu nigil Bitilna, ni inyu lédés wada ni nuu. (Lôk Héber 10:24, 25) Gwéha i bé ipôla yap, kayéle ba bé nôgda le ba yé toi i pôla mawanda ma ñem nyuu, ni bañga lihaa li hémle. (2 Tésalônika 1:3; 3 Yôhanes 14) Di noñ nlélém ndémbél, jon di nkôhna minlélém mi maséé.

Nigil i bii biniigana bi Bibel i bisélél. Kiki i bé bôña i ngéda Bibel i tilba, bôlôm, bôda, ni boñge batitigi ba nkodba i len ini. Minhôôlak mi baniiga mi ngwélél Bibel inyu niiga bés i tibil nok lelaa di nla bôñôl biniigana bi Bibel hiki kel. (Ndiimba Mbén 31:12; Néhémia 8:8) Hiki mut a nla timbhe i yigil, ni tôp tjémbi. Ni i njel i yon di mpahal hémle yés.​—Lôk Héber 10:23.

Masooda i bana hémle ngui. I ngéda yé, ñôma Paul a tilna likoda jada le ‘ngôñ i gwé nye i tehe bo inyu lédés bo.’ A kônde ki le: “hala a yé ndigi le, me kôs hogbe ikété nan lôñ yada ni bé hi wada wés inyu hémle i numpe, i nan ni yem ki.” (Rôma 1:11, 12) Makoda ma nlédés hémle yés, ma nti ki bés makénd i niñ inoñnaga ni biniigana bi Bibel.

Baa u nla lo likoda jés li noñ ha, le yak we u tehe ni jis joñ kiki mam ma ntagbe? D’a ba maséé i leege we. U gwé bé le u saa to jam i makoda més. Njañgi yo ki yo i ta bé.

• Makoda més ma noñ imbe ndémbél?

• Umbe nseñ di nkôs i lo makoda més?

To ibale di nlama yap put lipan, to i si nop nkeñi, di ntôl bé makoda més ma bikristen. Ndi inyuki mandutu ma niñ, to waa i bôlô, bi nkéñ bé Mbôgi Yéhôva i kodba ni lôktata yap i hémle?

I nhôla bés i ba maséé. Paul a bi tila le: ‘Di béngnaga ki bés ni bés.’ (Lôk Héber 10:24) A bé pôdôl inyu lôktata yés i likoda. Hala a nkobla le “di ha bo ikété mahoñol més loñge loñge,” tole, di yéñ i yina wada ni nuu. Ni bibañga bini, ñôma Paul a ntinde bés i bana nduña inyu bape. Ngéda di nyéñ njel i yi mahaa mape i likoda, di nléba le mahogi ma mpam i yémbél minlélém mi mandutu di nkôs. Mahaa ma, ma nla ki hôla bés i yémbél més mandutu.

I nhôla i bana bañga mawanda. I makoda més, lôktata di mboma i ta ndig bé bôt di meya. Ba yé bés mawanda ma ñem nyuu. Di gwé ki mangéda mape di ntégbaha i mintuk minlam. Bilôñ bi, bi gwéne bés umbe nseñ? Di nigil i tina lipém bés ni bés, ni i lédés gwéha ikété yés. Ni hala, ngéda bilôk bikéé gwés bi gwé mandutu, di mpala lôl bo mahôla inyule ba yé bañga mawanda. (Bingéngén 17:17) Ngeñ di yé lôñ ni bijô gwobisôna bi likoda, di ñunda le ‘di ntôñna kayada.’​—1 Korintô 12:25, 26.

Di nti we makénd i tep mawanda moñ ipôla bet ba mboñ sômbôl Djob. U nla léba i nya mawanda ikété ntôñ u Mbôgi Yéhôva. Di nsoohe we le u nwas bañ jam jo ki jo le li sôña we i kodba ni bés.

• Umbe nseñ di nkôs i ba lôñni bilôk bikéé?

• Kekii w’a gwés meyna ni bôt ba likoda jés?

Makoda ma bikristen ma bisu ma bééna tjémbi ni masoohe. Ba bé añ bitilna, ba koblak ki gwo, i ba bé binjénjé gwo ki gwo. (1 Korintô 14:26) Hala nyen yak makoda més ma ntagbe i len ini.

Biniigana bi mahee bi nlôl i Bibel. I lisuk li sonde, hiki likoda li ñemble nkwel u mbamba u 30 ma manut u mpémél i Bibel. Nkwel u, u ñunda lelaa Bitilna bi nkiha ni mangéda di niñil. Hiki mut a nla emble nkwel ni Bibel yé. Li li noñ ha li yé yigil mambadga ni mandimbhe, i nom ngeñ yada, i mpémél i mbamble di ngwélél inyu yigil. Ba nsébél wo le “La Tour de Garde” (Nkum Ntat). Hiki mut a nla yoñ ngaba mu yigil i, kingéda ngôñ yé. I yigil i, i nhôla bés i bii biniigana bi Bibel bibôñôl. Nlélém nkwel u mbôña Ikété iloo 120 000 di makoda més i nkoñ isi.

Di nkôhna mahôla inyu yi niiga. I ñemkété sonde, di gwé likoda lipe li maboñ imaa, li gwé jôl le, Niñ yés ni nson wés u bikristen; li umne i biniigana di nkôs hiki sôñ ni njel mapep ma Niñ yés ni nson wés u bikristen​—Likoda li ñem sonde. Liboñ li bisu li likoda li gwé ño le, “Masôô ma nkus ma Bibel;” li nhôla bés i meya ni lisoñgol li Bibel li di ban-ga le di añ i bisu bi yigil. Liboñ li li noñ ha li yé “Ligip yaga i nson u ñañ nlam;” u gwé mandémbél ma ñunda lelaa di nla bana minkwel mi Bibel ni bôt bape. Mankéé wada a nti maéba inyu yi añ ni ti minkwel minlam. (1 Timôtéô 4:13) Liboñ li nsôk li gwé ño le, “Di niñik kiki bikristen;” li ñunda manjel ma tôbôtôbô di nla noñ matiñ ma Bibel i niñ yés i hiki kel, inyu nseñ wés. Li gwé ki nkwel u mambadga ni mandimbhe u u nhôla bés i tibil nok Bibel.

Ibale u nlo makoda més, u ga kôhna biniigana bilam bi Bibel. Di yé nkwoog nkaa le bi ga hélés we.​—Yésaya 54:13.

• Baa kii u nla nok i makoda ma Mbôgi Yéhôva?

• Baa limbe likoda jés wa gwés lo?

Baa u ntehe ni njel bititii bi nene munu man kaat lelaa Mbôgi Yéhôva i ñengep loñge ngéda ba nke makoda map? Inyuki di nyoñ ngéda i ba mapubi i nyuu ni mambot?

Inyu unda le di nti Djob jés lipém. I yé ntiig le Yéhôva a mbéñge bé ndig bitéé bi mis. (1 Samuel 16:7) Ndi ngéda di kodba inyu bégés nye, bañga yés ngôñ i yé le di ti nye, ni lôktata yés lipém. Ibale ba nsébél bés i telep bisu bi Ngomén ikeñi, di ga yoñ yihe ni haba wés inyu boñ le i ba bañ wengoñle di nyan nye. Jon di nhaba loñge inyu ti Yéhôva lipém kiki “Nkéés nu hisi hiosôna,” ni inyu diihe ndap yés likoda.​—Bibôdle 18:25.

Inyu unda le di noñ bitilna bi Bibel. Bibel i mbat bikristen le “ba engep mbot nya i kôli.” (1 Timôtéô 2:9, 10) Hala a nkobla le di tjél mintén mi mambot mi nyungul mahoñol mabe, i i nyelel ngim bijô bi nyuu, tole mbot ba nhaba ndig inyu nene. Hala a nkobla ki le di tep mambot malam, ma ma ta bé bipéda, tole ma pôn-ga ma bakona njék. Biniigana bini bi ngi tinak bés pôla i pohol ngandak mintén mi mambot. To ibale di mpot bé, loñge yés haba i nla “lémés maéba ma Nyambe Ntohol wés” ni “ti Nyambe lipém.” (Titô 2:10; 1 Pétrô 2:12) Ngéda u ntep mbot i ne we inyu makoda, u nhôla bôt i tehe le bégés Yéhôva i ta bé minjôha.

U ñwas bañ jam li mambot le li nsôña we i lo i Ndap Ane. Mambot més ma gwé bé le ma ba diye to tôbôtôbô. I mbéda ndig le ma ba mapubi ni le ma nenge loñge.

• Inyuki haba wés u yé nseñ inyu bégés Djob?

• Bimbe biniigana bi Bibel bi ñéga bés inyu jam li mambot ni bienk gwés?

Ibale u nigil Bibel ni Mbôgi Yéhôva, we u mboñ bilia inyu kôôba yigil yoñ ilole u nigil. I yé we nseñ i boñ nlélém jam inyu makoda més. Ibale hala a nyila we kiki lem, wa ga bumbul matam malam.

Yéñ loñge ngéda ni loñge homa inyu kôôba. Imbe ngéda u nla ba ñwee inyu nigil? Baa kegla ilole u mbôdôl bibôlô gwoñ, tole kôkôa, ngéda boñge ba nañal? To ibale u nla bé nom, téé ngéda u nla tégbaha i kôôba yigil. Nwas bañ le jam jo ki jo li téñga we.Yéñ homa a yé ñwee, haa ni liyô. Lém nkuu mahop, ni nkuu biliñgeliñge, ni téléfôn. Ilole u mbôdôl yigil, soohe. Hala a ga hôla we le u hôya mandutu ma kel, ni le u ôt mahoñol moñ momasôna i yigil.​—Filipi 4:6, 7.

Tand nlôn i si mandimbhe moñ, u kôôba ki inyu yoñ ngaba. Inyu bôdôl, yéñ le u nok njom i yigil. Wan ño nkwel, ni lelaa maben ma nit ño nkwel u. Béñge yak bititii ni mambadga ma mbigda. I mbus, añ hiki liboñ ni mbadga yé i si lipep, inyu yéñ ndimbhe. Añ bipes bi bikaat bi Bibel bi u mboma, ndi u wan lelaa bi nit nkwel (Minson mi baôma 17:11) Ngéda u nléba ndimbhe inyu ngim mbadga, tand nlôñ tole yimbe ndigi ndég bibuk bi ga hôñlaha ndimbhe i. Hala ni nyen, i kel likoda, w’a la téé hinoo ibale u ngwés le ndi u ti ndimbhe yoñ lôñni bibuk gwoñ wemede.

Hiki sonde, kiki u mba u nkôôba makoda momasôna, yi yoñ i Bibel i mba i nhol, hol ni hol, nlélém kiki mut le a nkônde gwom bi mondo ikété “lisôô jé li nkus.”​—Matéô 13:51, 52.

• Bimbe bilem bilam u nla bana inyu kôôba makoda?

• Lelaa u nla kôôba wemede inyu timbhe i makoda?

I ngéda kôba, Yéhôva a ba sômbôl le hiki ndap lihaa i tégbaha ngéda inyu lédés maada mé ni nye, ni inyu lédés bomede wada ni nuu. (Ndiimba Mbén 6:6, 7) Jon Mbôgi Yéhôva i ntjek ngim ngéda hiki sonde, le ndap lihaa i kodba inyu bégés Djob ntôñ. Ba ntep minkwel mi mbuu mi mbéñge bo tôbôtôbô, ba kwéélak ki nwo ikété ngandak minyaô ni liyômba. To ibale u niñ wetama, yak we u nla tégbaha ngim ngéda i yigil i Bibel. Tep nkwel u nla hôla we i kôôge Djob bebee.

Ngéda inyu kôôge Yéhôva bebee. ‘Kôôgana bebee ni Nyambe, ndi yak nye a’ kôôge bé bebee.’ (Yakôbô 4:8) Di ntibil yi Yéhôva ngéda di nigil maboñok mé ni bilem gwé ikété Bibel. Njel lam yada inyu bôdôl i yé i añ Bibel ntôñ, wada i mbus nunu. Lihaa li nla pohol i noñ lisoñgol li likoda li “Niñ yés ni nson wés.” Mbus hala, lihaa jolisô li nla kwélél mam ma mahee ba nléba mu lisongol jap.

Ngéda inyu lédés maada ma ndap lihaa. Balôm ni baa bap, bagwal ni bon bap, bobasô ba nlédés maada map ikété ndap lihaa ngéda ba nigil Bibel ntôñ. Yigil i nlama tagbe ikété nsañ, ngeñ tôbôtôbô hiki wada a mbem ni maséé. Bagwal ba nla tep minkwel mi nkiha ni ñwii bon bap ba gwé. Ba nla léba nya minkwel i, ikété La Tour de Garde (Nkum Ntat) ni Réveillez-vous! (Tode ’ilo!) tole i site yés i internet, le jw.org. U nla ki kwélél manoodana bon boñ ba mboma i suklu, ni lelaa ba yémbél mo. Baa u nla bé tjek le ni béñge ngim biliñge-liñge bitôbôtôbô, ni njel nkuu wés bititii le, JW Télédiffusion (tv.jw.org), inyu kwélél mu i mbus, we ni bo? Ni nla ki nigil tjémbi di ga tuba i makoda. I mbus yigil, ni nla kabna bineene.

Ngéda tôbôtôbô ni ntégbaha hiki sonde inyu bégés Yéhôva ntôñ y’a hôla hiki wada i ndap lihaa i nok line li yigil Bibel. Yak Yéhôva a ga sayap bilia binan.​—Tjémbi 1:1-3.

• Inyuki di ntjek ngéda inyu bégés Djob ikété ndap lihaa?

• Lelaa bagwal ba nla boñ le yigil i ndap lihaa i ba ngéda nsañ ni maséé?

Inyuki bôt ba yé munu i bititii bini, ba yé maséé? Inyule ba yé i likoda jés likeñi jada. Kiki bagwélél ba Yéhôva ba kwañ ba bi kôhna biniigana i bomna ngélé iaa hiki ñwii, yak bés di mbomna i makoda makeñi. (Ndiimba Mbén 16:16) Hiki ñwii, di gwé makoda makeñi imaa. Makoda ma makiiña ima, hiki likoda mu li nom hilo hiada. Ni likoda li ndôn jada. Li nom dilo diaa. Umbe nseñ makoda ma ma gwéne bés?

Ma nlédés maada més ni bilôk bikéé bi mbuu. Nlélém kiki Lôk Israél i bé nok maséé i bégés Yéhôva ikété “makoda,” yak bés i len ini di mbégés Yéhôva ntôñ i makoda makeñi. (Tjémbi 26:12; 111:1) Biboma bi bi nti bés pôla i ba lôñ yada ni Mbôgi Yéhôva i nlôl makoda mape tole biloñ bipe. I noi i kosi, di mbegna man koga ikété maséé ni minkwel minlam. (Minson mi baôma 2:42) Mu makoda makeñi mana, hiki mut a nôgda gwéha i ñat lôktata i nkoñ isi wonsôna.​—1 Pétrô 2:17.

Ma nhôla bés i pes mbuu. Lôk Israél i bé kon ki maséé i “tibil nok bibañga” bi kaat mbén ba bé toñle bo. (Néhémia 8:8, 12) Kiki bo, yak bés di ndiihe biniigana di nkôs makoda makeñi. Hiki boma i gwé ño buk u nlôl i Bibel. Ni njel minkwel minlam, minkwel mi maboñ, ni dihéga, di nigil lelaa di boñ sômbôl Djob i niñ yés. Ngéda di ñemble ki mbôgi i lôktata i bi yémbél mandutu i niñ yap, hala a nti bés makénd inyu nihbe nledek ngéda unu. I makoda ma ndôn, minkôôbaga mi mintuk mi nyilha miñañ mi Bibel ntiik i mis més. Mi nti ki bés biniigana bi nseñ. Hiki likoda likeñi, i bet ba nti bomede nkikip inyu boñ sômbôl Djob, ba nla sôblana.

• Inyuki makoda makeñi ma yé mangéda ma maséé?

• Umbe nseñ u nla kôs i lo likoda likeñi?

Ilole Yésu a nwo, a kal le: “Miñañ minlam mi ane mini, nw’a añlana nkoñ ‘isi wonsôna i ba biloñ gwobisôna mbôgi; ndi tole lisuk li nlo.” (Matéô 24:14) Ndi lelaa nunu soso bôlô i miñañ minlam i ga séla? Ni njel ndémbél Yésu a bi yék ngéda a bé hana isi.​—Lukas 8:1.

Ndi mboma bôt i mandap map. Yésu a niiga banigil bé i añal ñañ nlam mandap ni mandap. (Matéô 10:11-13; Minson mi baôma 5:42; 20:20) Bikristen bi bisu bi bééna mintjegek mi mabôga inyu téé likalô. (Matéô 10:5, 6; 2 Korintô 10:13) Nlélém jam i len ini, bôlô yés i añal ñañ nlam i yé ntjegek. Hiki likoda li nsal i libôga jé. Ni liboñok li, di nla “añle bôt” ñañ nlam, ni “bok mbôgi” kiki Yésu a ti ndak.​—Minson mi baôma 10:42.

Di ngwélél manjel mape inyu boma bôt het ba yéne. Yésu a kônde ti ndémbél inyu añal ñañ nlam i mbamba, kiki i ngwañ lom, tole i lingen. (Markô 4:1; Yôhanes 4:5-15) Yak bés i len ini, di mpôdôs bôt Bibel to hee homa di mboma bo, i minloñ, i bibôm, i bahoma ba nyôñôl matôwa, tole ni njel nsiñga. Di nkwélés ki mawanda més ma bôlô ni ma suklu, bôt bés ba libôga ni mahaa més. Bilia bi gwobisôna bi mboñ le didun di bôt di emble ñañ nlam u tohi ni nkoñ isi wonsôna.​—Tjémbi 96:2.

Njee u nla ba maséé i añle ñañ nlam u Ane Djob? Unu nwin nlam u botñem, u tééda bañ wo inyu wetama. Añal wo kiki la yoñ.

• Umbe ñañ nlam bôt bobasô ba nlama nok?

• Imbe ndémbél i Yésu Mbôgi Yéhôva i nigle i len ini inyu añal ñañ nlam?

“Nsañal mapan” a yé mut a mbéna bôk mapan inyu yible bôt bape njel. Yésu a bé kiki nsañal mapan. A bi lo hana isi inyu añal ñwin u niñ, ni yible bôt bape njel tohi. (Matéô 20:28) I len ini, banigil ba noñ ndémbél yé. Ba ntégbaha ngandak ngéda kiki la yap i ‘yilha bôt bape banigil.’ (Matéô 28:19, 20) Bahogi ba ntep nson di nsébél le nsañal.

Nsañal a yé ñañal ñañ nlam nu ngéda yosôna. Mbôgi Yéhôva yosôna i ñañal ñañ nlam. Ndi bape ba bi bok niñ yap inyu ba basañal ba ngéda yosôna. Hala we, ba ntégbaha 70 ma ngeñ hiki sôñ i likalô. Inyu nyônôs njômbi i, ngandak yap i nhubus ngéda ba ntégbaha inyu yéñ likala li kel. I mambog batéé likalô ba ta bé ngandak, ntôñ wés u ñom bape kiki basañal ba tôbôtôbô. Ba ñañal i ndég yosôna 130 ma ngeñ ngim sôñ. Basañal ba ba yé maséé i suhus likala jap li niñ, ba ban-ga botñem le Yéhôva a ga kônde bo gwom gwobisôna bi mbéda bo inyu niñ. (Matéô 6:31-33; 1 Timôtéô 6:6-8) Bet ba nla bé ba basañal mapan ba ngéda yosôna, ba nla ba basañal ba pes ngéda. Ba nla pohol i tégbaha 30 tole 50 ma ngeñ i ngim sôñ i téé likalô.

Nsañal a yé mut nu a ngwés Yéhôva ni mut wé libôk. Kiki Yésu, di ntehe le ngandak bôt i len ini i yé nheleg, inyule ba nyi bé maliga inyu Djob to mimbônga nwé. (Markô 6:34) Ndi bés di gwé yi i nla hôla bo i len ini, ni ti bo bañga botñem inyu bilôl. Gwéha inyu mut wé libôk i nyuge nsañal i ti ngéda yé ni ngui yé inyu hôla bôt i yi ñañ nlam. (Matéô 22:39; 1 Tésalônika 2:8) Hala a nlédés hémle i nsañal. A nkônde kôôge Djob bebee, ni kôhna ngandak maséé.​—Minson mi baôma 20:35.

• Lelaa u nla toñol njee a yé nsañal?

• Kii i ntinde bahogi i yila basañal ba ngéda yosôna?

Bisuklu bi Ane bi yé yimbne i Mbôgi Yéhôva i bôdôl behee. Ndi bisuklu bi tôbôtôbô bi yé inyu bet ba ntéé likalô ngéda yosôna, inyu hôla bo i ‘yônôs nson wap’ u ñañal ñañ nlam u Ane.​—2 Timôtéô 4:5.

Suklu basañal ba ngéda yosôna. Ngéda nsañal a mélés ñwii wé bisu, ba nsébél nye i suklu i nom dilo disamal. I suklu i ntagbe ikété Ndap Ane i yéne nye bebee. I nhôla nsañal i kôôge Yéhôva bebee, i yi gwélél manjel momasôna di ntééne likalô, ni i nom ikété nson wé u nsañal.

Suklu baañal ñañ nlam u Ane. I suklu ini i nom sôñ iba. I yé inyu niiga minhôlag mi basañgal mi mi neebe i nyodi homa wap liyééne, ni i ke to hee homa ntôñ u ñep bo. Ba nkal le: “Me nunu, om me,” ba noñog ndémbél Yésu Kristô, nu a yé ñañal ñañ nlam u Ane nu bisu hana isi. (Yésaya 6:8; Yôhanes 7:29) Ngéda ba ñep bo haa ni mambai map, ngim mangéda, i nsômbla le ba suhus likala jap li niñ. Bebeg le bijek, mahéñha ma ngéda, ni bilem bi bôt, bi yé maselna ni bi ba meya. I nla ki ba bo nseñ i nigil hilémb hi mondo. I suklu ini i yé inyu basañal ba yé ipôla ñwii 23 ni 65. I nleege bôlôm ni bôda, ba ba yé mbiibaga, ni ba ba ta bé mbiibaga. I suklu i i nhôla bo i num matam ma mbuu ma ma mbéda bo ikété nson wap, ni kôs bilem bi bôlô bi ga hôla le Yéhôva ni ntôñ wé ba kônde gwélél bo.

Suklu i Giléad inyu yigil Bibel. “Giléad” ni hop Lôk Héber a nkobla le “nwind inyu mbôgi.” I Suklu i, i bi bôdôl i ñwii 1943. Ipam len ini, basañal ba nloo 8 000 le ba ma tagbene munu i suklu ini. Ba ñep ki bo kiki basañal ba tôbôtôbô i biloñ bipe. Ni mahôla map mbôgi i ntina “letee ni lisuk li ’isi.” (Minson mi baôma 13:47) Ngéda baudu ba Giléad ba bol i loñ yada i Amérika nwel mbok ba nsébél le Péru, likoda li Mbôgi Yéhôva to jada li bé bé. I len ini makoda ma nloo 1 000. Ngéda basañal ba Giléad ba bi bol i loñ ba nsébél le Yapan, Mbôgi Yéhôva i bé pam bé to jôm. I len ini, ba nloo 200 000. Suklu i Giléad i nom sôñ itan. Baudu ba nkôs njip biniigana bi Bibel. Ntôñ u nla sébél basañal ba tôbôtôbô, bagwélél ba makiiña, bagwelnson i Bétel, i suklu i Giléad. Ba nsébél bo inyu kônde ungus bo le yak bo ba lédés ntôñ u Yéhôva ni nkoñ isi wonsôna.

• Inyuki bisuklu bi basañal bi yé?

• Suklu i bañañal ñañ nlam u Ane i yé inyu bo njee?