YIGIL 2
Rébéka a bé gwés kônha Yéhôva maséé
Rébéka a bé muda a ngwés Yéhôva. Jôl li nlô wé li bé Isak. Yak nye a bé a ngwés Yéhôva. Lelaa Rébéka a bi boma Isak? Lelaa a bi unda le a bééna ngôñ i kônha Yéhôva maséé? Di kônde nigil mam ma mbéñge nye.
Bagwal ba Isak ba bé Abraham bo Sara. Ba bé ba niñ i nkoñ u Kanaan, i het bôt ba bé bé ba mbégés Yéhôva. Ndi Abraham a bé gwés le man wé a bii muda nu a mbégés Yéhôva. Inyu hala, a bi ep ngwélél wé, bebeg Éliézer, i tôñôl Isak nwaa i Haran, i homa bôt ba lihaa li Abraham ba bé niñil.
Rébéka a bé bebee i sal ni ngui inyu ti kamél malép
Éliézer a bi ke liké ni bagwélél ba Abraham bape. Hala a bé ntandaa liké. Ba bi kena jôm li kamél i bééga bijek ni makébla. Lelaa Éliézer a bé le a yi numbe muda a pohol inyu Isak? I ngéda Éliézer ni ba bagwélél bape ba bi pam i Haran, ba bi telbene i bee malép inyule Éliézer a bé yi le bôt ba bé bebee ni lo i ap malép. A bi soohe Yéhôva, a kal le: ‘Ibale me mbat hingonda le a ti me malép, ni nye a ti me malép, me ni kamél yem, m’a yi le muda nu nyen u mpohol.’
Ndi hingonda hini le Rébéka hi lo i bee. Bibel i nkal le a bé nlam ngandak. Éliézer a bi bat nye malép ma nyo. Rébéka a kal le: ‘Ñ, nyok, a nwet. Me ga ti we malép, mbus me ti yak kamél yoñ.’ Hoñol ki! Kamél i mbéna nyo malép ngandak, ngéda nyus malép i gwé yo. Inyu hala Rébéka a bé a kenek, a lok, ngwéé ni ngwéé. Baa u yé tehe i titii kiki a yé sal ni ngui?— Éliézer a bé nhelek mu kiki a bi tehe lelaa Yéhôva a ntimbhe masoohe mé.
Éliézer a bi ti Rébéka ngandak makébla malam. Rébéka a bi kena Éliézer ni ba bagwélél bape i ndap isañ. Éliézer a kal bo inyuki Abraham a bi ep nye ha, ni lelaa Yéhôva a ntimbhe masoohe mé. Lihaa li Rébéka li bé maséé i ep nye libii yak Isak.
Rébéka a bi ke i Kanaan ni Éliézer inyu biiba ni Isak
Baa u nhoñol le Rébéka a bééna ngôñ i biiba ni Isak?— Rébéka a bé yi le Yéhôva nyen a bi om Éliézer i boni. Jon, ngéda lihaa li Rébéka li bat nye ibale a ngwés ke i Kanaan inyu biiba ni Isak, a kal le: ‘Ñ, me ngwés.’ Nlélém ngéda, a nyodi ni Éliézer. Ngéda ba bi pam i Kanaan, a biiba ni Isak.
Lakii Rébéka a bi boñ jam Yéhôva a bé gwés le a boñ, Yéhôva a bi tééda nye loñge. mbus ngandak ñwii, Yésu a bi gwéé i lihaa jé! Ibale u yé kiki Rébéka, ndi u kônha Yéhôva maséé, a ga tééda yak we loñge.