Baa u ma hoñol le u yé wetama, u konok ki woñi?

Béñge sii mañge munlôm i titii. I nene le a nhoñol le a yé nyetama, ni le a nkon woñi, hala nga? Baa yak we u ma hoñol hala?— Hala a ma pémél hiki mut. Bibel i mpôdôl mawanda ma Yéhôva ma yak mo, ma bi hoñol le ma bé motama, ma kon ki woñi. Wada ikété yap a bé Élia. Di nigil mam ma mbéñge nye.

Élia a bi niñ i loñ Israél behee behee, ilole Yésu a bé gwéé. Ahab, kiñe i Israél, a bé bégés bé bañga Djob le Yéhôva. Ahab bo nwaa wé Yézabel, ba bé bégés kwéha djob le Baal. Jon yak ngandak bôt i loñ Israél i bi bôdôl bégés Baal. Yézabel, kiñe muda, a bé béba ngandak. A bééna ngôñ i nol Élia ni ba bobasô ba bé bégés Yéhôva! Baa u nyi kii Élia a bi boñ?—

Élia a bi ke ngwéé! A ke haa i ñoñ, a solop i hôk liaa. U nhoñol le a bi boñ hala inyuki?— A bé a nkon woñi. Ndi Élia a bé lama bé kon woñi. Inyuki? Inyule a bé a nyi le Yéhôva a nla hôla nye. Yéhôva a bé a ma unda Élia ngui yé. Kel yada, Yéhôva a bi emble masoohe ma Élia, a ep hié hi lôlak i ngii. Jon Yéhôva a bé le a hôla Élia hanano!

Mu kiki Élia a bé i hôk liaa, Yéhôva a pôdôs nye, a bat ki nye le: ‘U mboñ kii hana?’ Élia a timbhe le: ‘Metama nunu nyen me ngi béghak we. Me nkon woñi inyule ba nyéñ nol me.’ Élia a bé a nhoñol le bagwélél ba Yéhôva bobasô ba bi nôla. Ndi Yéhôva a kal Élia le: ‘Mbale bé i. Dikôô di bôt disaambok dipe di ngi béghak me. Ba makénd. Me ngi gwéé bôlô inyu yoñ!’ Baa u nhoñol le Élia a bé maséé i nok hala?—

Ñañ u Élia u niiga we kii?— U hoñlak bañ kekikel le u yé wetama, to woñi u kon bañ. U gwéé mawanda ma ngwés Yéhôva, ma gwéhék ki we. Ni le Yéhôva a gwé ngui ngandak. A mba a nhôla we hiki ngéda! Baa u yé maséé i yi le u mah ba bé wetama?—