Léta i Juu li bakena ntôñ

‘Ni nlama ba baniiga.’ (Lôk Héber 5:12, MN.) Hoñol ki! Yéhôva​—Nniiga Nunkeñi i ngiinda yosôna​—a naña bés i niiga bape njee a yé! Hiki ngéda di niiga maliga inyu Yéhôva​—ikété lihaa, ikété likoda, tole i likalô​—nson u, u yé bisai bi tôbôtôbô, u bak ki mbegee keñi. Lelaa di nla gwel nson unu loñge?

Di nléba ndimbhe munu bibañga bini ñôma Paul a tilna Timôtéô le: “Letee me lo, kônde boñ biliya i lisoñgol i mbamba, i ti maéba, i niiga.” Paul a bi kônde ki le: “Inyule kiki u mboñ hala nyen w’a tohol wemede lôñni i bôt ba ñemble we.” (1 Timôtéô 4:13, 16, MN) U gwé nwin u tohi le u nlama legel. Jon i nlôôha ba nseñ le u lémés lisoñgol joñ ni likeñge joñ i niiga. I man kaat nunu a ntilba inyu hôla we i yônôs i njômbi i. Di wan le ndék mam i i nlébna mu:

Hiki lipep li gwé nlôñ u Bibel wada ba nsima inyu toñol litode li yigil, tole hihéga hi hi ñunda lelaa mut a nla gwélél litode li yigil

Yéhôva a yé ‘Nniiga Nunkeñi.’ (Yésaya 30:20, MN) Mu kiki man kaat nunu a ga hôla we i hôlôs likeñge joñ i añ ni i niiga, u hôiga bañ le Yéhôva nyen a yé Liñgen li nwin di ñañal, ni le nyen a ñôt bôt. (Yôhanes 6:44) Jon, bana lem i soohe inyu bana mbuu mpubi. Bana ki lem i gwélél Bañga i Nyambe. Hôla bôt i bok mis map yak Yéhôva, ha i ngii yoñ wemede bé. Boñ biliya i tinde baemble we i hôlôs bañga gwéha inyu yé mu miñem nwap.

U gwé nsima i niiga nwin u u nlôôha ba mahee bôt ba binam ba mah bé kôhna. Di yé nkwoog nkaa le mu kiki u nha botñem yoñ mu “ngui Nyambe a nti” bôt, w’a pam i yônôs nson u loñge.​—1 Pétrô 4:11, MN.

Baso balét boñ,

Juu li bakena ntôñ li Mbôgi Yéhôva