I nwin u nlôôha ba mahee ikété Bibel u yé nwin u u mpôdôl Ane Djob. Yéhôva a ga gwélél Ane yé inyu yilha hisi hiosôna Paradis, sômbôl yé i inyu hisi. Kii yé Ane Djob? Lelaa di nyi le i mbôdôl énél? Kii i Ane i ma boñ? Kii i ga boñ i dilo di nlo? I yigil ini, ni gwigil biba bi noñ ha, bi ga timbhe mambadga ma.

1. Kii i yé Ane Djob, njee a ñane yo?

Ane Djob i yé ngim énél Yéhôva nyemede a bi téé. Yésu Kristô, Kiñe i Ane i, a ñane nyoo i ngii. (Matéô 4:17; Yôhanes 18:36) Bibel i nkal inyu Yésu le: “A’ ba Kiñe . . . i boga ni boga.” (Lukas 1:32, 33) Yésu a ga énél bôt bobasôna hana ’isi.

2. Bonjee ba ga ane ni Yésu?

Yésu a ga énél bé nyetama. Bôt ba lôlak i ‘hiki lihaa, hiki hilémb, hiki litén, hiki loñ . . . ba ga ane hisi.’ (Masoola 5:9, 10) I bôt ba ga ane ni Kristô ba ga ba bôt bañen? Ibôdôl i ngéda Yésu a bi lo hana ’isi, ipam i len ini, didun di bôt di bi yila banigil bé. Ndi, ndik 144 000 bôt ikété yap bon ba ga ane ni Yésu nyoo i ngii. (Añ Masoola 14:1-4.) Bini bikristen bipe bi ga kôdôl Ane Djob hana ’isi.—Tjémbi 37:29.

3. Inyuki Ane Djob i nloo biane bi bôt ba binam?

To i ngéda ngim baane i mboñ mam malam, ba nla bé boñ mam momasôna kiki i nsômbla inyule ba gwé bé ngui i. Mangéda mape, ba yé ba héñha bo ni ngim baane i i ntôñ bé bôt bape. Ndi kekikel, ba ga héñha bé Ñénél Ane Djob le Yésu Kristô. Djob a “ntéé ngim Ane i i ga tjiba bé kekikel.” (Daniel 2:44) Yésu a ga énél hisi hiosôna, a ga todol bé bôt. A ngwés, a gwé loñge ñem, a téé ki sép. Isi énél yé, a ga niiga bôt bobasôna i bana minlélém mi bilem kiki nye hala wee, gwéha, loñgeñem, ni telepsép.—Añ Yésaya 11:9.

4. I ga énél nkoñ ’isi wonsôna

Yésu a gwé ngui iloo i bôt bobasôna ba bi ane munu nkoñ ’isi ibôdôl behee ipam nano. Añ Matéô 28:18, i mbus ni kwélél mbadga ini:

• Mambe maselna ma yé ipôla Ane i Yésu Kristô ni i bana baane bape?

I nkoñ ’isi, ba nhéñha baane hiki ngéda, ni le hiki ñane a ñénél yé loñ, ndi lelaa mam m’a bôña i Ane Djob? Añ Daniel 7:14, i mbus ni kwélél mambadga mana:

• Ane Djob “i ga tjiba bé kekikel,” inyuki hala a yé loñge jam?

• Inyuki hala a yé ki loñge jam i yi le yotama yon i ga énél hisi hiosôna?

5. Ane Djob i nlama héñha biane bi nkoñ ’isi

Inyuki Ane Djob yon i kôli i héñha bini biane gwobisôna? Tuk VIDÉÔ, i mbus, ni kwélél mbadga ini:

VIDÉÔ: Kii i yé Ane Djob?—Dinyo malép (1:41)

• I ngéda bôt ba binam bon ba ñénél, kii i ntagbe?

Añ Ñañal 8:9, i mbus ni kwélél mambadga mana:

• Baa u nhoñol le Ane Djob i nlama héñha biane bi bôt ba binam? Inyuki?

6. Yésu ni i bet ba ga ane ni nye ba nok bôt ba binam

Kiki Kiñe yés Yésu a bé ndugi mut binam, jon a “nok bibomb gwés.” (Lôk Héber 4:15) Yéhôva a bi pohol i 144 000 bôlôm ni bôda i i ga énél ni Yésu “ikété hiki lihaa, hiki hilémb, hiki litén, hiki loñ.”—Masoola 5:9.

• Baa hala a nhôgbaha we i yi le Yésu ni i bôt ba ga ane ni nye ba bé ndugi bôt ba binam? Inyuki?

7. Mambén ma Ane Djob ma nlôôha ba malam

Baane ba bôt ba binam ba ntéé mambén inyu tat bôt bap. Yak Ane Djob i mboñ nlélém. Añ 1 Korintô 6:9-11, i mbus ni kwélél mambadga mana:

• I ngéda bôt ba binam bobasôna ba mba ba nôgôl mambén ma Djob, u nhoñol le nkoñ ’isi u ga ba lelaa?a

• Baa u nhoñol le Yéhôva a kôli bat bagwélél bé le ba nôgôl matiñ mé? Inyuki?

• Kii ñéba le i bôt ba nôgôl bé matiñ ma Djob nano, ba nla héñha?—Béñge nlôñ 11.

I SEM KWEP

Ane Djob i yé ngim énél i i yé i ngii, yon i ga énél hisi hiosôna.

Mambadga ma mbigda

• Mu Ane Djob, bonjee ba ga énél?

• Inyuki Ane Djob i nloo biane bi bôt ba binam gwobisôna?

• Yéhôva a mbem le i bôt ba ga niñ isi Ane yé ba boñ mambe mam?

KÔNDE YÉÑ

Béñge i mam Yésu a bi niiga ma ma mbéñge Ane Djob.

“Baa Ane Djob i yéne ikété ñem woñ?” (Kee i jw.org)

Inyuki Mbôgi Yéhôva i nit Ane Djob iloole i nit biane bi bôt ba binam?

Ba nke ni bisu i nit Ane Djob (1:43)

Béñge i jam Bibel i nkal inyu 144 000 bôt Yéhôva a bi pohol inyu énél ni Yésu.

“Bonjee ba ga ke i ngii?” (Kee i jw.org)

Kii i bi hôla muda wada nu a bé i ndap mok i nok le ndik Ane Djob yotama yon i nla lona telepsép i nkoñ ’isi?

“J’ai découvert la solution à l’injustice” (Réveillez-vous! Novembre 2011)

Ane Djob i bi bôdôl énél i ngii i nwii 1914. I nwii u won dilo di nsôk di énél i bôt ba binam di bi bôdôl. Kii nyis bés hala? Di béñge mbañ i Bibel i i yé yon, ni maboñok ma bôt ba binam ibôdôl i nwii 1914.

1. Kii Bibel i bi bôk i legel?

Kaat i Daniel i nkal le Ane i Djob i ga bôdôl énél i lisuk li “mangéda masaambok.” (Daniel 4:16, 17) Ngandak nwii i mbus, Yésu a bi pôdôl i ngéda i, a bi sébél yo le “ntéak ngéda u biloñ,” a kal ki le i ngéda i, i yé ngi tagbe. (Lukas 21:24) Munu yigil ini, di ga tehe le mangéda masaambok ma bi kola i nwii 1914.

2. Mambe mam mabe ma yé nnayak ibôdôl i nwii 1914?

Banigil ba Yésu ba bi bat nye le: “Kii y’a ba ki yimbne le u yé ha ni le i nkoñ ’isi unu u yé i mamélél?” (Matéô 24:3) Inyu timbhe, Yésu a bi pôdôl ngim mam i i bé lama bôña hana isi i ngéda nyemede a bé lama bôdôl ane nyoo i ngii. A bi pôdôl gwét, njal, nyeñg disi. (Añ Matéô 24:7.) Bibel i bi kal ki le i “dilo di nsôk” bôt b’a bana ngim maboñok i i ga boñ le ‘niñ i ba nledek kiyaga.’ (2 Timôtéô 3:1-5) I mam ma, ma yé nayak ibôdôl i nwii 1914.

3. Inyuki nkoñ ’isi u mbep ndigi bep ni bep ibôdôl nu Ane Djob i bi tééba?

Ndék ngéda i mbus le Yésu a bi yila Kiñe i Ane Djob, a bi jôs Satan ni mimbuu nwé mimbe nyoo i ngii, a yémbél ki bo. Bibel i nkal le “a bi léña i nkoñ ’isi, yak biañgel gwé bi léña lôñni nye.” (Masoola 12:9, 10, 12) Ibôdôl ha, Satan a yé ñunbak ngandak inyule a nyi le ndék ngéda wee a ntjiba. Jon a mboñ le bôt ba binam ba nok ndutu i nkoñ ’isi wonsôna! Ndi Ane Djob i ga mélés mandutu ma momasôna.

KÔNDE TÉM

4. Kii i nyis bés le Ane Djob i bi bôdôl énél i nwii 1914?

VIDÉÔ: Ane Djob i bi bôdôl énél i nwii 1914 (5:02)

Djob a bi boñ le Nébukadnézar, kiñe Babilôn a emel. I eem i, i bé éba i jam li bé lama pémél Kiñe Nébukadnézar, ndi i bé pôdôl ki Ane Djob.—Añ Daniel 4:17.a

Añ Daniel 4:20-26, i mbus gwélél bititii inyu timbhe mambadga mana:

• (A) Kii Nébukadnézar a bi tehe mu eem yé?—Béñge minlôñ 20 ni 21.

• (B) Kii bé lama pémél e?—Béñge nlôñ 23.

• (C) Kii bé lama tagbe i mamélél ma “mangéda masaambok”?—Béñge nlôñ 26.

Maada ipôla e Nébukadnézar a bi tehe mu eem ni Ane Djob

MBAÑ (Daniel 4:20-36)

Ane

(A) Soso e

Énél i mal inyu ndék ngéda

(B) “Ni kit e,” “mangéda masaambok ma ntagbe”

Ane i ntiimba bôdôl

(C) “U ga tiimba yila kiñe”

I biyônôl bi bisu bi mbañ . . .

• (D) E i yé yimbne i njee?—Béñge nlôñ 22.

• (E) Lelaa énél yé i bi mal inyu ndék ngéda?—Añ Daniel 4:29-33.

• (F) Kii i bi pémél Nébukadnézar i lisuk li “mangéda masaambok”?—Añ Daniel 4:34-36.

BIYÔNÔL BI BISU BI MBAÑ

Ane

(D) Nébukadnézar, kiñe i Babilôn

Énél i mal inyu ndék ngéda

(E) I mbus nwii 606 B.N.Y., Nébukadnézar a bi kônd njék, a la ha bé énél letee nwii minsaambok mi tagbe

Ane i ntiimba bôdôl

(F) Nébukadnézar a mbôôp, a tiimba bôdôl énél

I biyônôl bi mbañ bi nyônôs biba . . .

• (G) E i yé yimbne i njee?—Añ 1 Miñañ 29:23.

• (H) Imbe ngéda ane yap i bi mal ndugi inyu ndék ngéda? Kii i nyis bés le i ngéda Yésu a bé hana ’isi, bikiñe bi Israel bi bé ngi tiimba bôdôl énél?—Añ Lukas 21:24.

• (I) Hee, ni imbe ngéda i Ane i, i bi témb i tééba?

BIYÔNÔL BI NYÔNÔS BIBA BI MBAÑ

Ane

(G) Bikiñe bi Israel bi bi yé yimbne i Ane Djob

Énél i mal inyu ndék ngéda

(H) Ba ntjé Yérusalem, énél i bikiñe bi bon ba Israel i ntelep jam kiki bo 2 520 nwii

Ane i ntiimba bôdôl

(I) I ngii, Yésu a nyila Kiñe i Ane Djob

5. Nkoñ ’isi u bi héñha ibôdôl i nwii 1914

Tuk VIDÉÔ.

VIDÉÔ: Nkoñ ’isi u bi héñha ibôdôl i nwii 1914 (1:10)

Yésu a bi kal i mam ma bé lama bôña i nkoñ ’isi i ngéda a bé lama yila Kiñe. Añ Lukas 21:9-11, i mbus ni kwélél mbadga ini:

• Munu mam ba nsima, mambe wemede u ma tehe tole u ma nok le ma mbôña?

Ñôma Paul a bi kal lelaa bôt ba ga ba i dilo di nsôk. Añ 2 Timôtéô 3:1-5, i mbus ni kwélél mambadga mana:

• Munu maboñok ba mpôdôl hana, mambe u mbéna tehe bôt ba gwé?

6. Ane Djob i nti bés makénd

Añ Matéô 24:3, 14, i mbus ni kwélél mambadga mana:

• I len ini, umbe nson u ñéba le Ane Djob i bi bôdôl énél?

• Lelaa yak we u nla yoñ ngaba munu nson unu?

Ane Djob i mbôdôl ane, ndék ngéda i ga ane hisi hiosôna. Añ Lôk Héber 10:24, 25, i mbus ni kwélél mbadga ini:

• Kii hiki wada wés a nlama boñ kiki di “ntehe i kel i i yé kôôge bebee”?

I SEM KWEP

Mbañ i Bibel, minsoñgi mi nwii, ni mam ma ntagbe i nkoñ ’isi, ma ñéba le Ane Djob i mbôdôl énél. Di ñéba le di yé nkwoog nkaa ni jam li i ngéda di ñañal ñañ nlam u Ane ni i ngéda di nke makoda.

Mambadga ma mbigda

• Kii i bi tagbe i mamélél ma mangéda masaambok Bibel i mpôdôl i kaat Daniel?

• Kii i nkwés we nkaa le Ane Djob i bi bôdôl énél i nwii 1914?

• Lelaa u nla éba le u nhémle le Ane Djob i mbôdôl énél?

KÔNDE YÉÑ

Béñge jam bôt ba miñañ ba nkal inyu mahéñha di ntehe i nkoñ ’isi ibôdôl i nwii 1914.

“Depuis quand ce déclin brutal” (Réveillez-vous! avril 2007)

Béñge lelaa mbañ i di nléba i kaat Matéô 24:14 i bi héñha niñ i mut wada.

“J’aimais le baseball plus que tout au monde!” (La Tour de Garde No. 3 2017)

Kii i nyis bés le i mbañ i yé i kaat Daniel pes 4 i mpôdôl Ane Djob?

“Quand le Royaume de Dieu a-t-il commencé à régner? (1re partie)” (La Tour de Garde, 1^er octobre 2014)

Kii i ñéba le “mangéda masaambok” kaat Daniel pes 4 i mpôdôl ma bi mélél i nwii 1914?

“Quand le Royaume de Dieu a-t-il commencé à régner? (2e partie)” (La Tour de Garde, 1^er novembre 2014)

Ane Djob i mbôdôl énél. Ndék ngéda, i ga héñha ngandak mam munu nkoñ ’isi. Di béñge i mam malam i ga lona.

1. Lelaa Ane Djob i ga lona nsañ munu ’isi?

Yésu, Kiñe i Ane Djob a ga tjé bibéba bi bôt ni biane gwobisôna i gwét bi Armagédôn. (Masoola 16:14, 16) Ha ngéda i nyen nlôñ kaat unu, u ga yon i nya i yôni: “Ndék ngéda ndigi, bibéba bi bôt bi ga ba ha bé.” (Tjémbi 37:10) Ni njel Ane, Yésu a ga boñ le nsañ ni telepsép bi ba i nkoñ ’isi wonsôna.—Añ Yésaya 11:4.

2. Niñ i mba lelaa i ngéda sômbôl i Nyambe i ga bôña hana ’isi?

Isi Ane i Djob, “bôt ba téé sép ba ga kôdôl hisi, ba niñ ki mu i boga ni boga.” (Tjémbi 37:29) Kinje jam! Bôt bobasôna b’a ba ba téé sép, ba boñok mam ma téé sép! Bôt bobasôna b’a ba ba ngwés Yéhôva, ba gwéhék bôt bape. Bôt ba ga kon ha bé, ba ga niñ i boga ni boga.

3. I ngéda bibéba bi bôt bi ga ba ha bé, kii Ane Djob i ga boñ?

I ngéda a ga mal tjé bibéba bi bôt, Yésu a ga ke ni bisu i ane nkoñ ’isi inyu 1 000 nwii. Ha ngéda i, nye ni 144 000 bôt ba ga ane, ba ga hôla bôt ba binam i yila peles. I mbus hikôô hi nwii, hisi hi ga yila paradis, nyonok ni bôt ba ba ga ba ndik maséé, ba nôglak mambén ma Yéhôva. Ha ni nyen Yésu a ga timbhe Isañ énél inyu boñ le ‘jôl li [Yéhôva] li tééba lipubi’ ngélé yada inyu ngélé yosôna (Matéô 6:9, 10) Bôt bobasôna ba ga yi le Yéhôva nyetama nyen a kôli énél ni le nyen a nyoñ ndun ni bagwélél bé. I mbus, Yéhôva a ga tjé Satan ni mimbuu nwé mimbe ni ba bobasôna ba mpohol i kolba énél yé. (Masoola 20:7-10) Biloñge bi mam gwobisôna Ane Djob i ga lona, bi ga nom i boga ni boga.

KÔNDE TÉM

4. Ane Djob i ga mélés biane bi bôt ba binam

“Mut a ñane mut inyu boñ nye béba.” (Ñañal 8:9) Ni njel Ane yé, Yéhôva a ga mélés i ngitelepsép ini.

Añ Daniel 2:44 ni 2 Tésalônika 1:6-8, i mbus ni nkwélél mambadga mana:

• Kii Yéhôva bo Man wé Yésu, ba ga boñ biane bi bôt ba binam ni i bôt ba nit gwo?

• Inyuki i mam u nyi inyu Yéhôva bo Yésu ma ntinde we i hoñol le makidik ma, ma téé sép?

5. Yésu a yé Kiñe i i nlôôha loñge

Isi Ane Djob, Yésu a ga bôñôl bôt mam malam hana ’isi. Tuk VIDÉÔ i i ñéba le Yésu a gwé ngôñ i hôla bôt ni le Djob a bi ti nye ngui i boñ hala.

VIDÉÔ: Yésu a bi unda i mam Ane i Djob i ga boñ (1:13)

I ngéda a bé hana isi, Yésu a bi ti dinyo malép di mam Ane i Djob i ga boñ. Munu bisai ba nsima hana, bimbe u gwé ngôñ i pala tehe? Añ minlôñ mi Bibel mi mi mpôdôl bisai bi.

6. Loñge niñ isi Ane Djob

VIDÉÔ: Dinyo malép di mam malam m’a lo (4:38)

Añ Tjémbi 145:16, i mbus ni nkwélél i mbadga ini:

• Kii u nôgda i ngéda u nok le ndék ngéda Yéhôva a ga “yônôs ngôñ bihégél gwobisôna bi niñ”?

I SEM KWEP

Ane i Djob i ga boñ le sômbôl yé i bôña hana ’isi. Y’a yilha hisi hiosôna paradis, i het bôt bobasôna b’a mba ba mbégés ndigi Yéhôva.

Mambadga ma mbigda

• Lelaa énél i Djob i ga pubus jôl li Yéhôva?

• Inyuki di nlama ba nkwoog nkaa le, Ane i Djob i ga yônôs mimbônga nwominsôna mi yé ikété Bibel?

• Umbe mbônga u tôbôtôbô u mbem le u yon?

KÔNDE YÉÑ

Béñge ngobol i buk ini le Armagédôn.

“Kii i yé Armagédôn?” (Kee i jw.org)

Mambe mam ma ga bôña mu “njiiha ikeñi” Yésu a bi pôdôl?—Matéô 24:21.

“Qu’est-ce que la grande tribulation ?” (Kee i jw.org)

Lihaa li yé i hégda lelaa b’a ba ba niñ ikété paradis.

Hégda le u yé i niñ i Paradis (1:50)

“Me bé badba ngandak mambagda.” Béñge lelaa mut pôlitik wada a ntoñol lelaa a bi léba mandimbhe i mambadga a bé badba.

“La Bible transforme des vies” (La Tour de Garde, 1^er janvier, 2012)