Baa mangand momasôna ma nlémél Djob?

Yéhôva a ngwés le di kon maséé ni niñ, di tégbaha ki mangéda malam. Ndi baa, mangand momasôna mon ma nlélém nye? Lelaa di nla éba Yéhôva le di ngwés nye mu mangéda ma?

1. Inyuki ngandak mangand i nlémél bé Yéhôva?

Hala a nla hélés we i yi le ngandak mangand i nkiha bé ni i yom Bibel i nkal. I bôt ba bé bégés bé Yéhôva bon ba bi bot mangand ma, ni ki le mangand ma, ma gwé maada ni mimbuu mimbe. Ma nit biniigana bi kwéha base kiki bo le mbuu u nwo bé. Ma niiga ki le mam momasôna mut a nla kôs ma mpémél nye inyule a gwé masoda. (Yésaya 65:11) Jon Yéhôva a bi ti bagwélél bé mabéhna mana le: “Pama mu ipôla yap . . . ni waa yak tihba yom nyega.”​—2 Korintô 6:17.a

2. Lelaa Yéhôva a ntehe mangand ma ma mbégés bôt ba binam?

Yéhôva a mbéhe bés le i ta bé loñge i ‘bôdôl bôt ba binam ñem’ (Añ Yérémia 17:5.) Ndi ngim mangand i mbégés bôt ba m’bô ni bisônda. Mangand mape ma mbégés hilo hi kunde hi loñ, ni biyimbne gwobisôna bi loñ i. (1 Yôhanes 5:21) Mangand mape ma nit minlôñ mi m’bô ni minlôñ mi mi nyéñ kunde. Ndi kii Yéhôva a ga nôgda ibale di mbégés ngim mut, tole di nit ngim ntôñ u u niiga mam ma ma nkiha bé ni sômbôl yé?

3. Kii i nla boñ le ngim ngand i ba ibe?

Bibel i nsôña “ngandak nyôba, mangand ma nyega ni bilôñ bi nyôba.” (1 Pétrô 4:3) Mangand mape ma nhôñôs ngandak je ni nyega malal. Inyu ba liwanda li Yéhôva, di nlama yoñ yihe ni nyega malal.

KÔNDE TÉM

4. Tjél mangand momasôna ma ma nlémél bé Yéhôva

Añ Éfésô 5:10, i mbus ni kwélél mambadga mana:

• Ilole u neebe ke i ngim ngand, kii u nlama ndugi wan?

• Mambe mangand bôt ba mbéna boñ i libôga joñ?

• Baa u nhoñol le mangand ma, ma nlémél Yéhôva?

Kiki ’héga, baa u ma badba too ngand i ligwéé i nlémél Yéhôva? Ikété Bibel, di nkoba bé homa nye ki nye i het ngwélél Yéhôva a bi boñ ngand yé i ligwéé. Ndi Bibel i mpôdôl mangand ma ligwéé ma bôt iba, ba ba bé gwélél bé Yéhôva. Añ Bibôdle 40:20-22 ni Matéô 14:6-10. I mbus, ni kwélél mambadga mana:

• Limbe jam li bi bôña mu mangand ma mo ima?

• Inoñnaga ni miñañ mini, kii Yéhôva a nhoñol inyu mangand ma ligwéé?

Baa u ma badba too ‘hala a nlémél Yéhôva le u kee i ngand i ligwéé tole’ i ngand i i nhôñôs biniigana bi bi nlémél bé nye? Añ Manyodi 32:1-8. I mbus, tuk VIDÉÔ i mbus ni kwélél mambadga mana:

VIDÉÔ: Mangañd ma ma nlémél bé Yéhôva (5:07)

• Inyuki di nlama tibil wan inyu yi too ngim ngand i nlémél Yéhôva?

• Lelaa di nla yi le ini ngand, i nlémél Yéhôva?

Béñge i mam ma nla hôla bés i yi too ngand i nlémél Djob

• Baa i ngand i, i nit biniigana bi bi nkiha bé ni Bibel? Inyu yi i jam li, tibil wan inyu yi hee i ngand i, i nlôl.

• Baa i ngand i, i mbégés bôt, ngim mintôñ tole biyimbne bi ngim loñ? Di nti Yéhôva lipém, di gwé ki botñem le nyetama nyen a ga mélés mandutu ma nkoñ ’isi.

• Baa i ngand i, i nhôñôs ngim mam i i nkiha bé ni Bibel? Di nlama ba bapubhaga.

5. Hôla bôt bape i diihe i mam u nhémle

VIDÉÔ: Kal bôt i yom u nhémle ni bibuk bilam (2:01)

Añ Matéô 7:12, i mbus ni kwélél mambadga mana:

• Inoñnaga ni litiñ lini, baa wen u nlama yoñ makidik inyu bôt ba ndap yoñ ba ba ta bé Mbôgi Yéhôva inyu ngim ngand?

• Lelaa u nla tibil nôgha bôt ba lihaa joñ le to ibale u nyoñ bé ngaba i ngim ngand, u nginda gwéhék bo ngandak?

6. Yéhôva a ngwés le di ba maséé

Yéhôva a ngwés le di tégbaha loñge ngéda ni bôt bés ba lihaa, ni mawanda més. Añ Ñañal 8:15, i mbus ni kwélél mbadga ini:

• Kii ñéba munu nlôñ Bibel unu le Yéhôva a ngwés le bagwélél bé ba ba maséé?

Yéhôva a ngwés le bagwélél bé ba ba maséé, ba tégbaha ki mangéda malam. Tuk VIDÉÔ i i ñéba mangéda malam ma yé ma ba i makoda més makeñi.

VIDÉÔ: I leege bakén i makoda ma ndôn ma ma nkot ngandak biloñ (5:40)

Añ Galatia 6:10, i mbus ni kwélél mambadga mana:

• Baa u nhoñol le u nlama ke i ngim mangand inyu bôñôl bôt bape “loñge”?

• Kii i nkônha toi we maséé? I ti mut likébla inyule ngim ngand yon i nyégsa we i boñ hala tole inyule u ngwés nye?

• Ngandak bôt i ntégbaha mangéda malam ni bon bap, i tinak ki bôt bape makébla. Ibale u gwé bon, lelaa u nla kônha bo maséé?

I SEM KWEP

Yéhôva a ngwés le di tégbaha mangéda malam ni lihaa jés ni mawanda més. Ndi, a ngwés bé le di yoñ ngaba i mangand ma ma nlémél bé nye.

Mambadga ma mbigda

• Mambe mambadga ma nla hôla we i yi too ngim ngand i nlémél Yéhôva tole i nlémél bé nye?

• Lelaa u nla hôla lihaa joñ tole mawanda moñ i nok inyuki u nyoñ bé ngaba i ngim mangand?

• Kii nyis we le Yéhôva a ngwés le di ba maséé?

KÔNDE YÉÑ

Béñge ngim mangand i het kristen i nla bé yoñ ngaba.

“Inyuki Mbôgi Yéhôva i nyoñ bé ngaba i ngim mangand?” (Kee i jw.org)

Béñge manjom ma-na ma ma ñéba inyuki mangand ma ligwéé ma nlémél bé Djob.

“Inyuki Mbôgi Yéhôva i ntégbaha bé mangand ma ligwéé?” (Kee i jw.org)

Béñge lelaa boñge batitigi ba ba ngwés Yéhôva ba nla kônha nye maséé i ngéda mangand.

U yé tik i mis ma Yéhôva (11:35)

Didun di didun di bikristen di mpohol le di ntégbaha bé ngand kristak. Inyuki ba nyoñ makidik ma?

“Ba nléba jam li mahee” (Nkum Ntat, 1 Libuy li nyéé, 2012)