PES 46

Inyuki di nlama ti bésbomede nkikip, di kôs ki sôble?

Kiki kaat i mapep

I ti wemede nkikip yak Yéhôva hala a nkobla le, ikété masoohe, u mbôn nye le u ga gwélél ndik nyetama, le sômbôl yé yon y’a ba jam li bisu i niñ yoñ. (Tjémbi 40:8) I mbus, u nkôs sôble inyu unda i mbamba le u nti wemede nkikip yak Yéhôva. Makidik i ti wemede nkikip yak Yéhôva ma yé jam li nlôôha ba nseñ i niñ yoñ. Kii i nla tinde we i yoñ makidik ma ngui ma?

1. Kii i nla tinde mut i ti nyemede nkikip yak Yéhôva?

Gwéha yon i ntinde mut i yoñ makidik ma. (1 Yôhanes 4:10, 19) Bibel i nti bés makénd le: “U nlama ki gwés Yéhôva Nyambe woñ ni ñem woñ wonsôna, ni niñ yoñ yosôna, ni mahoñol moñ momasôna, yak ni ngui yoñ yosôna.” (Markô 12:30) Di ñéba le di ngwés Djob he ndik ni bibuk bé, ndi yak ni maboñok més. Nlélém kiki gwéha i ntinde mut i bii muda, hala yak nyen gwéha yon i ntinde bés i ti bésbomede nkikip yak Yéhôva ni i kôs sôble.

2. Bimbe bisai Yéhôva a nti bagwélél bé ba ba bi kôs sôble?

Sôble i nti we pôla i jôp i lihaa li Yéhôva li li yé maséé. I ngéda u nkôs sôble, u ntehe gwéha i Yéhôva ikété ngandak manjel, u nkônde ki kôôge bebee ni nye (Añ Malaki 3:16-18.) U héya hala, Yéhôva a nyila Isañ woñ, u njôp ki ikété lihaa li lôk kéé i i ngwés Yéhôva, i gwéhék ki we. (Añ Markô 10:29, 30.) Ndi ilole u nkôs sôble, u nlama ndugi boñ ngim mam. U nlama nigil i yi Yéhôva, u gwés ki nye. I mbus, u hémle ki Man wé. Sôk i nsôk, u ti wemede nkikip yak Yéhôva. I ngéda u mboñ i mam mana momasôna, ha nyen u nla kôs sôble, u bôdôl kil i njel i nkena i niñ boga. Bibel i nkal le: “Sôble . . . , yo ki yon i yé i tohol bé.”—1 Pétrô 3:21.

KÔNDE TÉM

Di béñge inyuki i yé nseñ i ti wemede nkikip yak Yéhôva ni i kôs sôble.

3. Bésbobasôna di nlama pohol njee di ngwés gwélél

I ngéda kôba, bon ba Israel ba bé hoñol le ba nla gwélél Yéhôva i nlélém ngéda ba gwéélak Baal. Ndi, Yéhôva a bi om mpôdôl wé Éliya le a kodol litehge jap li mam. Añ 1 Bikiñe 18:21, i mbus, ni kwélél mbadga ini:

Mambe makidik bon ba Israel ba bé lama yoñ?

Nlélém kiki bon ba Israel, yak bés di nlama pohol njee di nsômbôl gwélél. Añ Lukas 16:13, i mbus, ni kwélél mambadga mana:

Inyuki di nla bé kal le di ngwélél Yéhôva, i nlélém ngéda di gwéélak yom ipe?
Lelaa u nla éba Yéhôva le nyetama nyen u mpohol?

4. Tibil ôt pék mu mam ma ñéba le Yéhôva a ngwés we

Collage: Mut wada a mbigda i mam Djob a ma ti nye. 1. Gwéha i nene mu ndémbél i nyañ man. 2. Bijek bilam, ngandak bijek ni bitatam. 3. Bibel. 4. Yésu a yé ti niñ yé kiki binoñ.

Yéhôva a bi ti bés ngandak makébla. Lelaa yak bés di nla éba le di ngwés nye? Tuk VIDÉÔ.

VIDÉÔ: Ti Nyambe makébla moñ (3:04)

Kii di nla boñ ibale di ngwés Yéhôva? Añ Tjémbi 104:14, 15 ni 1 Yôhanes 4:9, 10, i mbus ni kwélél mambadga mana:

Mambe makébla ma Yéhôva ma nlémél we ngandak?
I ngéda u nhoñol makébla ma momasôna, kii u nôgda?

I ngéda mut a nti we likébla li li nlémél we, hala a yé a tinde nga we i ti nye mayéga? Añ Ndiimba Mbén 16:17, i mbus ni kwélél mbadga ini:

I ngéda u nhoñol i mam malam momasôna Yéhôva a ma bôñôl we, kii u nsômbôl ti nye?

5. I ti wemede nkikip yak Yéhôva i nlona ngandak bisai

Ngandak bôt i nhoñol le i ba mut a nyiba, i bana loñge bôlô, tole ngandak moni yon i nlona maséé. Baa maliga ma? Tuk VIDÉÔ, i mbus ni kwélél mambadga mana:

VIDÉÔ: Me bé niñ inyu ntuk bol (5:45)

Collage: Bititii bi vidéô le ‘Me bé niñ inyu ntuk bol.’ 1. Andrey a yé kôôba yigil yé Bibel. 2. Andrey a ntéé likalô.

To hala kiki Andrey a bé gwés bol, inyuki a bi tjôô yo?
A bi yoñ makidik i gwélél Yéhôva iloole a kee ni bisu i tuk bol. Baa makidik ma, ma bé malam? Inyuki?

Ilole ñôma Paul a nyila kristen, a bé noñ mam makeñi. Malét nkeñi wada nyen a bi niiga nye biniigana bi Lôk Yuda. A bé lama yila mut nkeñi, ndi a bi tjôô i gwom bi, a yila kristen? Añ Filipi 3:8, i mbus, ni kwélél mambadga mana: