PES 47

Baa u yé bebee i kôs sôble?

Kiki kaat i mapep

Ni njel yigil yoñ i Bibel, u nigil ngandak mam inyu Yéhôva. U mboñ yak ngandak mahéñha i niñ yoñ. Ndi bebek, ngim yom i ngi kéñék we i ti wemede nkikip yak Yéhôva, ni i kôs sôble. I yigil ini i mpôdôl mandutu ngandak bôt i bi boma ni lelaa ba bi yémbél mo.

1. Baa i mbéda le u yi Bibel yosôna ilole u kôs sôble?

Inyu kôs sôble, i mbéda le u “bana bañga yi i maliga.” (1 Timôtéô 2:4) Hala a nkobla bé le u nlama yi timbhe mambadga momasôna bôt ba yé le ba bat we, inyule yak bikristen bi bi yé nsôblege hala a yé ngandak nwii, bi nke ni bisu i nigil. (Kôlôsé 1:9, 10) Ndi to hala, di nlama yi biniigana bi bisu bi Bibel. Mimañ mi ga bat we mambadga inyu yi too u nok biniigana bi bisu bi Bibel.

2. Mambe mam u nlama boñ ilole u nkôs sôble?

Ilole u nkôs sôble, u nlama ‘tam bibéba gwoñ . . . u hiel ki ñem.’ (Añ Minson mi baôma 3:19.) Hala a nkobla le u nlama tam bibéba u bi boñ behee, u soohe ki Yéhôva le a nwéhél we. Hala a ngwés ki kal le u mboñ biliya i nwas maboñok ma behee, u nke ni bisu i boñ sômbôl i Djob. U héya hala, u nlama ke makoda, u yoñ ngaba i minson mi likoda, u yila ki ntéé likalô nu ngi sôblana.

3. Inyuki u nlama bé nwas le woñi u kéñ we i kôs sôble?

Ngim bôt i nhoñol le i ga la bé yônôs mbônga ba bi ti Yéhôva. I yé maliga le ngim mangéda, u ga boñ mahôha. Bibel i mpôdôl bôlôm ni bôda ba ba bééna hémle ikeñi, yak bo ba bi boñ mahôha. Yéhôva a mbem bé le bagwélél bé ba ba peles! (Añ Tjémbi 103:13, 14.) A yé maséé i ngéda u mboñ kii yosôna u nla. A ga hôla we. Bibel i nkal le yom yo ki yo “i ga la bé bagal bés ni gwéha [yé].”—Añ Rôma 8:38, 39.

KÔNDE TÉM

Béñge lelaa u nla yémbél mandutu momasôna ma nla kéñ we i kôs sôble, ni lelaa u nla tibil yi Yéhôva, u neebe ki mahôla mé.

Collage: Njohok muda wada a nyémbél mandutu, a nkôs sôble. I yigil ini i ñéba i jam li.

4. Tibil nigil i yi Yéhôva

Ipam limbe likala u nlama yi Yéhôva ilole u nkôs sôble? U nlama tibil yi nye, kayéle i yi i, i tinde we i gwés nye ni i lémél nye. Tuk VIDÉÔ u tehe lelaa i nkoñ ’isi, ngandak bôt i bi pam i gwés Yéhôva, i kôs ki sôble. I mbus, ni kwélél i mbadga ini:

VIDÉÔ: Njel i nkena sôble (3:56)

Mu vidéô, kii i bi hôla ngim bôt i kôôba i kôs sôble?

Añ Rôma 12:2, i mbus, ni kwélél mambadga mana:

Baa u mpééna ngim biniigana bi Bibel? Tole u mbadba le baa Mbôgi Yéhôva i niiga toi maliga?
Ibale u gwé i pééna i, kii u nla boñ?

5. Yémbél mandutu ma ma nla kéñ we i kôs sôble

I ngéda di nyoñ makidik le di nti bésbomede nkikip yak Yéhôva, di kôs ki sôble, di nlama yi le di ga kôhna mandutu. Inyu tehe hihéga hiada, tuk VIDÉÔ, i mbus, ni kwélél mambadga mana:

VIDÉÔ: Gwéha i Yéhôva i nyémbél ngolba (5:22)

Ilole a nyila kristen, mambe mandutu Narangerel a bi kôhna?
Lelaa gwéha yé inyu Yéhôva i bi hôla nye i yémbél mandutu ma?

Añ Bingéngén 29:25 ni 2 Timôtéô 1:7, i mbus ni kwélél mbadga ini:

Kii i nla ti bés makénd i yémbél mandutu?

6. Bôdôl Yéhôva ñem

A yé tééne ñunuk muda wada likalô. I sita bo nye ba nigil Bibel ba yé ntoñ.

Yéhôva a ga hôla we i boñ i mam ma nlémél nye. Tuk VIDÉÔ, i mbus, ni kwélél mambadga mana:

VIDÉÔ: Yéhôva Nyambe a ga hôla we (2:50)

Munu vidéô, kii i bé kéñ nnigil Bibel wada i kôs sôble?
Kii i bi hôla nye i lédés hémle yé ipañ Yéhôva?

Añ Yésaya 41:10, 13, i mbus, ni kwélél mbadga ini:

Inyuki u nla ba nkwoog nkaa le u nla yônôs mbônga u bi ti Yéhôva i ngéda u bi ti wemede nkikip i nyeni?

7. Kee ni bisu i ti Yéhôva mayéga inyu gwéha yé

Ibale u nke ni bisu i ôt pék mu gwéha Yéhôva a ñunda we, hala ki nyen w’a bana ngôñ i ti nye mayéga ni i gwélél nye niñ yoñ yosôna. Añ Tjémbi 40:5, i mbus ni kwélél mbadga ini:

Mambe mam Yéhôva a bi boñ ma ma nlôôha lémél we?

Mpôdôl Yérémia a bi kal le a ngwés Yéhôva ni lipôdôl jé, ni le a nti Yéhôva mayéga inyu nsima i ba ngwélél wé. A bi kal le: “Bibañga gwoñ bi nlona maséé ni mahak i ñem wem, inyule me bééga jôl joñ, a Yéhôva Nyambe nu mintôñ mi gwét.” (Yérémia 15:16) Ni kwélél mambadga mana: