Di unda le di ndiihe niñ

I niñ yés, di nla boñ ngandak mam i i nkônha bés maséé. To i ngéda di mboma mandutu, ngim mam i nla kônha bés maséé. Lelaa di nla éba le di ndiihe niñ? Imbe njom i ntinde bés i boñ hala?

1. Inyuki di nlama diihe niñ?

Di nlama diihe niñ inyule niñ i yé likébla li li nlôl yak Isañ wés nugwéha le Yéhôva. Nyen a yé “lingen li niñ,” a bi hek mam momasôna. (Tjémbi 36:9) “Nyemede nyen a nti bôt bobasôna niñ, nhébék, ni gwom gwobisôna.” (Minson mi baôma 17:25, 28) Yéhôva a nti bés mam momasôna ma mbéda bés inyu boñ le di kee ni bisu i niñ. A mboñ ki le niñ i lémél bés.​—Añ Minson mi baôma 14:17.

2. Lelaa di nla éba Yéhôva le di ndiihe niñ?

Yéhôva a ndiihe niñ i mut ibôdôl nu nyañ a nyoñ jém jé. Djob a bi tinde ngwélél wé David i tila le: “Mis moñ ma bi tehe me ikété libum.” (Tjémbi 139:16) Niñ yés i nlôôha bana mahee i mis ma Yéhôva. (Añ Matéô 10:29-31.) Jon hala a nlôôha tééñga nye i ngéda mut a nitba tole a nol mut numpe.a (Manyodi 20:13) Hala a ntééñga ki nye i ngéda di nyoñ bé matat, ndi di boñ ngim mam i i nla boñ le di nimis niñ yés tole di boñ le bôt bape ba wo. I ngéda di nyoñ ndun ni niñ yés, ni i bôt bape, di ñéba le di ndiihe niñ Yéhôva a bi ti bés.

KÔNDE TÉM

3. Yoñ ngéda ni mbôô woñ

I ngéda kristen i nti yomede nkikip yap Yéhôva, wee a nti nye niñ yé yosôna. Hala a yé wengoñle a nti nye nyuu yé kiki sesema. Añ Rôma 12:1, 2, i mbus ni kwélél mambadga mana:

• Kii i nlama tinde we i yoñ ndun ni mbôô woñ?

• Mambe mam u nla boñ inyu éba le u nyoñ ndun ni mbôô woñ?

4. Yoñ yihe ni niñ yoñ ni i bôt bape

Bibel i nti bés makénd le di boñ bañ ngim yom i i nla babaa bés, i nol bés tole i nol mut numpe. Tuk VIDÉÔ inyu yi i mam u nla boñ ma ma ñéba le u ndiihe niñ.

VIDÉÔ: Yoñ yihe (8:34)

Añ Bingéngén 22:3, i mbus ni kwélél i mam we ni bôt bape ni nla boñ inyu éba le ni ndiihe niñ . . .

• i ndap.

• i ngéda ni yé i bôlô.

• i ngéda ni nhiañda minsôn.

• i ngéda ni yé luk matôa.

5. Diihe niñ i man ikété libum li nyañ

David a bi gwélél bibuk bilam inyu éba le Yéhôva a ndiihe niñ, yak niñ i man nu a yé ikété libum li nyañ. Añ Tjémbi 139:13-17, i mbus ni kwélél i mbadga ini:

• Inyu Yéhôva, niñ i mut i mbôdôl imbe ngéda, i kel nyañ a nyoñ jém jé tole i kel a ngwéé?

Mbén Yéhôva a bi ti bon ba Israel i ñéba le Yéhôva a ndiihe niñ i nyañ yak niñ i man a nlama gwéé. Añ Manyodi 21:22, 23, i mbus ni kwélél mambadga mana:

• Lelaa Yéhôva a bé tehe i mut a nol man ikété libum li nyañ ibabé i kôôba?

• Kii a bé a nôgda i ngéda mut a bé a kôôba nol man ikété libum li nyañ?b

• Baa yak we u ntehe lisôs mém kiki Yéhôva a ntehe jo?

Tuk VIDÉÔ.

VIDÉÔ: Ndiihe niñ kiki Yéhôva (5:00)

Yak muda nu a ndiihe niñ, a nla hoñol le ngim mangéda i yé nseñ i sôs jém. Añ Yésaya 41:10, i mbus ni kwélél mambadga mana:

• I ngéda ba nyégsa muda i sôs jém, njee a nla hôla nye? Inyuki?

I SEM KWEP

Bibel i niiga le niñ i yé likébla li Yéhôva. Jon di nlama diihe niñ yés, di yoñ ki matat ni niñ i bôt bape.

Mambadga ma mbigda

• Inyuki niñ i gwé mahee i mis ma Yéhôva?

• Kii Yéhôva a nôgda i ngéda mut a nitba tole a nol mut numpe?

• Inyuki di nlama ti Yéhôva mayéga inyu likéba li niñ?

KÔNDE YÉÑ

Lelaa di nla ti Yéhôva mayéga inyu likébla li niñ?

Hiémbi 141​—Niñ i yé hélha jam (2:41)

Léba ndimbhe i mbagda ini le: Baa Yéhôva a nla nwéhél muda nu a bi sôs jém?

“Kii Bibel i nkal inyu lisôs mém?” (Kee i jw.org)

Béñge lelaa litehge li mam li Djob li nla hôla bés i tibil pohol mintuk nwés.

“‘Sports de l’extrême’​—doit-on faire abstraction des risques?” (Réveillez-vous!, 8 Octobre, 2000)

Lelaa Bibel i nla hôla mut nu a gwé ngôñ i nitba.

“Me nsômbôl wo, baa Bibel i nla hôla me i ngéda me gwé i nya mahoñol i?” (Kee i jw.org)