Djob a ngwés le bagwélél bé ba ba mapubi

Hégda nyañ man a mbôñha hisiina hié hi man inyu suklu. A nugus nye, a ha nye mambot ma mpôp. A nyi le hala a yé loñge inyu mbôô wé. I ngéda mañge a yé mapubi, hala a ñéba le bagwal bé ba nyoñ ndun ni nye. Nlélém jam, Tata wés nugwéha a nsômbôl le di ba mapubi i pes minsôn, i pes mahoñol, i bipôdôl gwés yak ni maboñok més. I ngéda di mpôp, hala a yé nseñ inyu yés, hala a nti ki Yéhôva lipém.

1. Mapubi i pes minsôn

Yéhôva a nkal bés le: “Ni nlama ba bapubhaga.” (1 Pétrô 1:16) I ba bapubhaga, hala a nkobla le di bana maboñok, bipôdôl, ni mahoñol malam. Ndi hala a mbéñge yak mapubi ma nyuu yés. I ba mapubi i pes minsôn hala a nkobla le di bana lem i nogop, i jôa matôa més, mambot més, i bôñgôl ndap yés ni mbédgé yés. Di nla ki ti mahôla inyu pubus Ndap Ane. I ngéda di yé mapubi, di nti Yéhôva lipém.​—2 Korintô 6:3, 4.

2. Bimbe bilem di nlama tjôô?

Bibel i nti bés makénd le di “pubus bésbomede ni mam momasôna ma nhindis minsôn ni mbuu.” (2 Korintô 7:1) Hala a nkobla le di nlama tjél i gwom bi nla ti bés makon, ni i gwom bi nla tééñga mahoñol més ni boña wés. Inyu boñ le di lémél Yéhôva, di nlama bé nwas le mahoñol mabe ma yén ikété yés. (Tjémbi 104:34) Di nlama ki bana bipôdôl bilam.​—Añ Kôlôsé 3:8.

Kii ipe i nla hoo bés mahindi i pes minsôn ni i pes mahoñol? Mam kiki bo siba, hibañga, tramol, colle. I ngéda mut a ñôt bé i gwom bi, a ñunda le a ngwés niñ, a yé ki mbôô. Inyu ba mapubi i pes mahoñol, di nlama ki tjél bana lem i bôble gwom gwés bi mbôô, ni i béñge nyega malal. (Tjémbi 119:37; Éfésô 5:5) Hala a nla ba ndutu i nwas bilem bi. Ndi Yéhôva a yé bebee i hôla bés.​—Añ Yésaya 41:13.

KÔNDE TÉM

3. Mapubi ma nyuu ma nti Yéhôva lipém

Mambén Yéhôva a bi ti litén li Israel ma ñéba kii a nhoñol inyu mapubi. Añ Manyodi 19:10 ni 30:17-19, i mbus ni kwélél mambadga mana:

• Inoñnaga ni minlôñ mi Bibel mini, lelaa Yéhôva a ntehe mapubi ma nyuu?

• Kii di nlama boñ inyu ba mapubi?

I mbéda biliya ni ngéda inyu ba mapubi. Ndi, di nla pam i ba mapubi to di yiine numbe homa, to di nyep to di yé ngwañ. Tuk VIDÉÔ, i mbus ni kwélél mbadga ini:

VIDÉÔ: Nyambe a ngwés bôt ba mapubi (4:10)

• Ibale di yé mapubi, di bak mut a nyi bok gwom gwé, kii i bet di ntééne likalô ba ga hoñol?

4. Lelaa di nla tjôô ngim lem ibe di gwé?

I ngéda mut a ñôt siba tole hibañga, hala a nla ba jam li nlet i nwas. Ibale u gwé i ndutu i, noode ôt pék i mandutu ma nla kwél we. Añ Matéô 22:37-39, i mbus ni kwélél mbadga ini: I ngéda mut a ñôt siba, lelaa hala a nla tééñga . . .

• maada mé ni Yéhôva?

• lihaa jé ni bôt bape?

Boñ ngim ntjéga u u nla hôla we i nwas ngim lem ibe.a Tuk VIDÉÔ.

VIDÉÔ: Kee ni bisu i bana hôtnyuu (2:47)

Añ Filipi 4:13, i mbus ni kwélél mbadga ini:

• I ngéda mut a njôs lem ibe, lelaa masoohe, yigil i Bibel, ni makoda bi nla hôla nye?

5. Jôs mahoñol mabe ni maboñok mabe

Añ Kôlôsé 3:5, i mbus ni kwélél mambadga mana:

• Inyuki i béñge malal ma nyega, i ômle bôt manwin ma nyega ni njel internet, ni i bôble gwom bi mbôô bi yé béba i mis ma Yéhôva?

• Baa u nhoñol le Yéhôva a kôli bat bés le di ba mapubi i pes mahoñol? Inyuki?

Di nla jôs mahoñol mabe. Tuk VIDÉÔ.

VIDÉÔ: Yoñ makidik i tééda mahoñol malam (1:51)

Yésu a bi gwélél hihéga inyu éba kii mut a nla boñ inyu ba mapubi i pes mahoñol. Añ Matéô 5:29, 30, i mbus ni kwélél mbadga ini:

• Yésu a bé gwés bé kal le di kit bijô gwés bi nyuu, ndi a bé gwés kal le di nlama yoñ makidik ma ngui inyu nwas lem ibe. Mambe makidik ma ngui mut a nla yoñ inyu héya mahoñol mabe ikété yé?b

Ibale u njôs mahoñol mabe, yi le Yéhôva a ntehe biliya gwoñ. Añ Tjémbi 103:13, 14, i mbus ni kwélél mbadga ini:

• Ibale u gwé ngôñ i nwas ngim lem ibe, lelaa minlôñ mi Bibel mini mi nla hôla we?

Ibale u ntiimba boñ i béba i, kee ni bisu i boñ biliya!

Mut a nla pala kal le, ‘kiki me nla bé, wee me nwahak.’ Ndi, di yoñ hihéga hi mut nu a yé pémsan i ngwéé. To ibale a nsendi, to a nkwo, hala a ngwés bé kal le a nimis libôndô jé. Hala a ngwés bé ki to kal le a nlama tiimba bôdôl ngwéé i tén. Nlélém jam, ibale u ntiimba boñ ngim béba u yé jôs, hala a ngwés bé kal le w’a la bé yémbél yo. Hala a ngwés bé to kal le biliya gwobisôna u mbôk u boñ, bi ta bé to yom. Hala a nla pémél hiki mut. Kiki u mba u nkwo, u telbak, ndék ni ndék, w’a sôk u let. Jon u tomb bañ, ni mahôla ma Yéhôva, w’a sôk u yémbél i lem ibe i.

I SEM KWEP

Ibale di ntééda manyuu més mapubi, di ban-ga mahoñol ni maboñok malam, di ga lémél Yéhôva.

Mambadga ma mbigda

• Inyuki i yé nseñ i ba mapubi?

• I ba mapubi wee kii?

• Kii di nla boñ inyu bana maboñok ni mahoñol malam?

KÔNDE YÉÑ

Inyu ba mapubi, béñge jam u nla boñ to ibale u gwé bé ngandak moni?

Mbôô ni mapubi​—Lem i jôa moo (3:01)

Béñge kii u nla boñ inyu waa ôt siga.

“Lelaa u nla nwas siga?” (Tôde ’ilo!, Mpuye 2010)

Bikuu u nla bana ibale u mbéñge nyega malal.

“Bititii bi malal​—Baa bi nla tééñga bés?” (Nkum Ntat 1 Hikañ, 2013)

Béñge lelaa mut wada a bi yémbél lem yé i béñge malal ma nyega.

“Ilole me mpamba, me bi kwo ngandak ngélé.” (Nkum Ntat No. 4 2016)