PES 43
Lelaa bikristen bi ntehe moog?
Ikété nkoñ ’isi, bôt bobasôna ba gwé bé nlélém litehge li mam inyu moog. Ngim bôt i ngwés i ntégbaha loñge ngéda ni mawanda map, i nyok ndék. Bape ba bi pohol le ba nyo bé hies. Ndi bape ba nyo letee ba hiôô. Kii Bibel i nkal inyu moog?
1. Baa i yé béba i nyo moog?
Bibel i nsôña bé moog, maselna ni hala, ikété makébla Djob a bi ti bés, di gwé ‘yak wai i i nkônha ñem wés maséé.’ (Tjémbi 104:14, 15) Ngim bagwélél ba Djob ba kôba ba bé nyo moog.—1 Timôtéô 5:23.
2. Mambe maéba Bibel i nti i bet ba mpohol i nyo moog?
Yéhôva a nsôña ngandak nyôba, ni lihiua. (Galatia 5:21) Lipôdôl jé li nkal le: “U yén bañ i ti i bôt ba nyôba.” (Bingéngén 23:20) Ibale u nyo moog, to ibale u yé wetama, u nlama bé nyo kayéle boña a yôm we, u laa ha bé gwel wemede, u kahal popoda, tole u kwoo kon. Ibale u nla bé gwel wemede i ngéda u yé i bisu bi moog, nseñ u yé le u yoñ makidik le u nyo ha bé.
3. Lelaa di nlama tehe makidik ma bôt bape inyu moog?
Hiki mut nyen a mpohol too a nyo tole a ntjél nyo. Ibale mut a mpohol le a nyo ndék, di nlama neebe makidik mé. Ndi ibale mut a mpohol le a nyo bé, di nlama bé nyégsa nye le a nyo ndigi. (Rôma 14:10) Ibale me nyo ndi, hala a tééñgaga mut numpe, me nlama tjél nyo. (Añ Rôma 14:21.) Di nlama yéñ ‘ha nseñ [wés] bésbotama bé, ndi yak nseñ u bôt bape.’—Añ 1 Korintô 10:23, 24.
KÔNDE TÉM
Di wan ndék matiñ i i ga hôla bés i pohol i nyo tole i tjél nyo, ni limbe libim li moog di nla nyo. Di béñge ki ngim matiñ i i nla hôla mut nu a mbéna hiôô.
4. Pohol ibale w’a nyo tole w’a nyo bé
Lelaa Yésu a bé tehe moog? Inyu tibil yi jam li, béñge manyaga ma bisu a bi boñ. Añ Yôhanes 2:1-11, i mbus ni kwélél mambadga mana:
Inoñnaga ni ñañ unu, lelaa Yésu a ntehe moog? Lelaa a ntehe i bôt ba nyo moog?
To hala kiki Yésu a nsôña bé moog, lelaa kristen i nlama tehe i mut a mpohol i nyo moog?
Bibel i nkal le di yé kunde i nyo moog, ndi ngim mangéda, i nla ba loñge le di nyo bañ moog. Añ Bingéngén 22: 3, i mbus béñge lelaa litiñ lini, li nla hôla we munu mangéda mana:
U nsômbôl luk matôa tole u nsômbôl gwélél mashin.
U yé jém.
Dokta a nkal we le u nyo ha bañ moog.
U mpam bé i gwel wemede i ngéda u yé i bisu bi moog.
Mbén i loñ yoñ i nsôña moog.
U yé ni mut nu a mpohol le a nyo ha bé inyule a bi kôhna ndutu ni moog.
Baa u nlama ti bôt moog, kiki ’héga i ngand libii? Inyu tehe kii i nla hôla we i yoñ makidik malam, tuk VIDÉÔ.
Añ Rôma 13:13 ni 1 Korintô 10:31, 32. I mbus le ni ñañ hiki pes kaat, ni kwélél mbadga ini:
Lelaa litiñ di nléba munu pes kaat ini li nla hôla we i yoñ makidik ma ma ga lémél Yéhôva?
Hiki kristen yon i mpohol too i ga nyo tole i ga nyo bé. Ngim mangéda i nla pohol i nyo, mangéda mape i tjél nyo.
5. Tééne wemede minwaa
Ibale mut a mpohol i nyo moog, inyuki a nlama bigda le Yéhôva a ñoo ngandak nyôba ni lihiua? Añ Hôséa 4:11, 18, i mbus ni kwélél i mbadga ini:
I ngéda mut a nyo ngandak, kii i nla pémél nye?
Kii i nla hôla bés kayéle di nyo bañ ngandak? Di nlama yi minwaa nwés. Añ Bingéngén 11:2, i mbus ni kwélél i mbadga ini:
Inyuki di nlama yi tééne bésbomede minwaa inyu yi libim li moog di nlama nyo?
6. Kii nla hôla mut i waa nyo ngandak
Béñge kii i bi hôla mut wada i waa nyo ngandak. Tuk VIDÉÔ, i mbus ni kwélél mambadga mana:
Kii Dmitry a bé a boñ i ngéda a bé nyo moog?
Baa a bi waa nyo moog kunda yada?
Kii i bi hôla nye i nwas lihiua?
Añ 1 Korintô 6:10, 11, i mbus ni kwélél mambadga mana:
Mambe mandutu lihiua li nla lona?
Kii i ñéba le mut nu a nyo moog ngandak a nla héñha?
Añ Matéô 5:30, i mbus ni kwélél mbadga ini:
Bibañga bini le, kit woo woñ, bi ngwés kal le mut a nlama boñ bisesema inyu lémél Yéhôva. Kii u nla boñ inyu waa nyo ngandak?a
Añ 1 Korintô 15:33, i mbus ni kwélél mbadga ini:
Kii i bôt we ni bo ni hiôm ba nla boñ inyu tinde we i nyo ngandak tole ndék?
BÔT BAPE BA NLA BAT LE: “Baa i yé béba i nyo moog?”
We u nhoñol lelaa?
I SEM KWEP
Yéhôva a bi ti bés moog, le ma kôhna bés maséé, ndi a ngwés bé ngandak nyôba ni lihiua.
Mambadga ma mbigda
Kii Bibel i nkal inyu moog?
Mambe mandutu mut a nla kôhna ibale a nyo ngandak?
Lelaa di nlama tehe makidik ma bôt bape inyu jam li moog?
KÔNDE YÉÑ
Lelaa njohok mañge i nla yoñ makidik malam inyu moog?
Béñge maéba ma ma nla hôla we le u ba ha bañ nkol moog.
“Lelaa di nla tééda litehge lilam li maog” (Nkum Ntat 1 Kondoñ 2010)
Baa bikristen bi nla tôômaha bitôblô gwap i ngéda bi nyo moog?
Munu ñañ unu le “J’étais une barrique sans fond,” béñge lelaa mut wada a bi waa nyôba.
a Ngim mangéda, i bôt ba ngwés waa nyo moog, ba nlama yéñ mahôla ma dokta. Mangéda mape, bidokta bi yé bi kal i bôt ba gwé ndutu ni moog, le ba waa nyo.