Inyuki di nlama kodba inyu bégés Djob?

1-3. (a) Lelaa bikristen bi ñunda le bi nyamnda ni ngôñ i bomna i makoda? (Béñge titii i bibôdle.) (b) Kii di ga tehe munu yigil ini?

NGÉDA Kôrina a bééna 17 ñwii, ba bi gwel nyañ, ba kena nye i Wom u bôlô i loñ i Rusland. Mbus ngéda, Kôrina nyemede a gwéla, ba ep nye minkôm mi Sibéria, haa ngandak ni mbai yé. Ba bé sélés nye kiki nkol. Ngim mangéda ba bé ba nyéksa nye i sal i mbédgé i si lisuni likeñi ngi mambot ma kôli inyu nya ngéda. Tolakii lihep li bé nayak, Kôrina ni mankéé nu muda numpe ba kit le ba nke ndik makoda.

² Kôrina a ntoñol le: “Di bé di nyodi homa wés bôlô bikôkôa, di ke liké li makôô letee ni i het ba nyôñôl mashin, yom kiki bo 25 kilôméta. Mashin a bé a yoñ bés i ngeñ iba juu, di tégbaha ngeñ samal mukété ilole a ntéé bés. Mbus, di ke ki 10 li kilôméta ni makôô inyu bol i homa likoda.” Baa liké li, li bééna toi mahee? Kôrina nye: “I likoda, di bé di nigil Nkum Ntat, di tôbôk ki tjémbi di Ane. Hala a bé lédés hémle yés.” Tolakii ba bé huu bé i bisu bi dilo diaa, ñénél wom a bé yimbe bé le Kôrina bo liwanda jé ba bé ba ke haa.

³ Litén li Yéhôva li mbéna diihe mangéda ba ntégbaha i makoda. Kunda yada mbus le likoda li bikristen li bi tééba, banigil ba Yésu ba bi bôdôl “téñbe yaga ni maéba . . . ni adna.” (Minson mi baôma 2:42) Kiki bo, yak we u nôgda nlélém ngôñ i ke i makoda hiki ngéda. Ndi bikristen gwobisôna bi mboma mandutu. Ngim mangéda i mam di mbéna boñ hiki kel, bôlô yés, tole waa, bi nla boñ le hala a ba bés nledek jam i ke i makoda. Kii i ga tinde bés i yémbél mandutu ma, ni i tééda lem ilam i ke makoda?^[1] Lelaa di nla hôla ​—nnigil Bibel wés, ni bôt bape, i tehe nseñ i ke makoda? Munu yigil ini, di ga wan manjom juem ma ma ntinde bés i ke makoda inyu bégés Djob. Manjom ma, di nla kot mo môga imaa. Lelaa i ke i makoda i nla bane we nseñ? Lelaa i ke makoda i nla bane bôt bape nseñ? Ni lelaa hala a ntihba Yéhôva ngéda di nke i makoda?^[2]

LELAA I KE I MAKODA I NLA BANE WE NSEÑ?

4. Lelaa likoda li nhôla bés i yi njee a yé Yéhôva?

⁴ Makoda ma niiga bés. Hiki likoda li nhôla bés i yi njee a yé Yéhôva, Djob jés. Kiki héga, ikété yom kiki bo ñwii ima, libim li makoda li bi nigil kaat ni hop pulasi le Approchez-vous de Jéhovah (Ni kôôge Yéhôva bebee) i yigil i Bibel i likoda. I nigil bilem bi Yéhôva, mbôda ni mandimbhe ma ma nlôl miñem mi lôk kéé yés i bôda ni i bôlôm, baa i bi kéñbaha bé gwéha yoñ inyu Tata woñ nu a yé ngii? Yak yi yés i Bibel i nkônde hol i ngéda di ntibil emble minkwel, mandémbél, ni lisoñgol li Bibel. (Néhémia 8:8) Kiki héga, hoñol tik ngok i mbuu u nléba hiki sonde ngéda u nkôôba, ni ngéda u ñemble matode ma ma yé nseñ ma nlôl lisoñgol li Bibel li mpohlana.

5. Lelaa makoda ma bi hôla we i bii matiñ ma Bibel i bisélél, ni lelaa ma nla hôla we inyu hôlôs likeñge joñ li likalô?

⁵ Makoda ma niiga bés lelaa di bii matiñ ma Bibel i bisélél ikété makas ma niñ yés momasôna. (1 Tésalônika 4:9, 10) Kiki héga, Nkum Ntat nu yigil a yé nkôôbaga inyu ngôñ i bagwélél ba Djob. Baa yigil yada i Nkum Ntat i ma tinde we i témb wan i mam u bi téé le u mboñ, i nwéhél mankéé wada, tole i kônde lémés masoohe moñ? Likoda li ñem sonde li nti bés biniigana inyu nson u likalô. Mu nyen di nigil lelaa di añal ñañ nlam, ni lelaa di niiga matiñ ma Bibel loñge loñge.​—Matéô 28:19, 20.

6. Lelaa makoda més ma nti bés makénd, ni lelaa ma nhôla bés i tééda hémle i ngui?

⁶ Makoda ma nti bés makénd. I hiai hini hi nla tômbôs mahoñol més ni maada més ni Yéhôva. Mahéñha ni hala, makoda ma nlédés bés, ma tinak ki bés makénd. (Añ Minson mi baôma 15:30-32.) Libim li ngéda i makoda més, di yé di kônde nigil lelaa mbañ i Bibel i nyon. Hala a yé a lédés hémle yés le mimbônga mi Yéhôva inyu dilo di nlo, yak nwo mi ga yon. I yé mbale le, i bet ba niiga bés i hikôma botama ndik bé bon ba nti bés makénd. Ngéda di ñemble mandimbhe ni tjémbi bi nlôl i ñem u bilôk bikéé gwés, hala a nhôlôs hémle yés. (1 Korintô 14:26) Yak ngéda di nkwel ni bilôk bikéé gwés bi bôlôm ni bi bôda i bisu ni i mamélél ma likoda, di nôgda wengoñle di yé ikété lihaa jés, di nôgdaga ki hogbe.​—1 Korintô 16:17, 18.

7. Inyuki i nlôôha ba nseñ i ba makoda més?

⁷ Mbuu mpubi u ñéga bés ni njel makoda. Yésu Kristô i mbus le a ma témbna lipém jé, a kal le: “Nu a gwé maôô a nok jam mbuu u nkal mintôñ.” (Masoola 2:7) Yésu a ñéga likoda ni njel mbuu mpubi. Di gwé ngôñ ni mbuu mpubi inyu hôla bés i kolba manoodana, inyu ti bés makénd ni kôôba bés inyu likalô. Won u nti ki bés pék i yoñ makidik malam. Baa di nlama bé ôt nseñ mu bitelbene gwobisôna Yéhôva a nyoñ​—kiki bo makoda​—inyu kôhna mbuu mpubi?

LELAA HALA A NLA BANE BÔT BAPE NSEÑ?

8. Ngéda bilôk bikéé gwés bi ntehe bés i makoda, bi ñemblege mandimbhe més, ni tjémbi di ntôp, lelaa hala a nhôla bo? (Béñge yak nkéñég matila le, “A bé nôgdaga makénd i mbus hiki likoda.”)

⁸ Makoda ma néhne bés ngandak manjel i unda bilôk bikéé gwés le di ngwés bo. Yoñ ngéda i hoñol mandutu bilôk bikéé bi bôda ni bi bôlôm i likoda joñ bi nhônba. Hala a nhélés bé bés le ñôma Paul a tila le: “Di béngna ki bés ni bés. Di nwas bañ likoda jés li mitin.” (Lôk Héber 10:24, 25) Ngéda di nke makoda, di ñunda le bilôk bikéé gwés bi kôli ni ngéda yés, ni le di ntôñ bo. Jam lipe li yé le, mandimbhe di nti ni i tjémbi di ntôp ni ñem wés wonsôna, bi nti bilôk bikéé gwés makénd.​—Kôlôsé 3:16.

9, 10. (a) Toñol lelaa bibañga bi Yésu bi bi yé i kaat Yôhanes 10:16, bi nhôla bés i nok nseñ i kodba ni bilôk bikéé gwés. (b) Ibale di nke i makoda hiki ngéda, lelaa di nla hôla i mut nu lihaa jé li bi tjél?

⁹ Makoda ma ñat bés ni bilôk bikéé gwés. (Añ Yôhanes 10:16.) Yésu a hégha nyemede kiki ntééda mintômba, ni banigil bé kiki bémba mintômba. Hoñol le: Ibale mintômba ima mi yé je i ngii hikôa hiada, mii mimpe ima mi jek ikété nsôsôgô, u umpe u jek homa mpe yaga, baa di nla kal le mintômba mintan mi, mi yé bémba yada? Jôga li ngélé inyu boñ le mintômba mi yégle bémba yada, i yé i sômbla ntééda inyu éga nwo. Nlélém, di nla bé noñ Ntééda wés ibale hiki wada wés a nyén i yé pés. Di gwé ngôñ i kodba ni bikristen bipe inyu ba “bémba yada” i si “ntééda wada.”

¹⁰ Ngéda di nke i likoda, di nlédés adna i yé ipôla bés ni bilôk bikéé gwés. (Tjémbi 133:1) Ngim bilôk bikéé gwés i yé lana le, bagwal bap ni lôk kéé yap i minsôn ba bi tjôô bo, inyule ba bi neebe maliga. Ndi, Yésu a bôn le a ga ti bo lihaa li mbuu li li ga gwés bo, li tôñôg ki bo. (Markô 10:29, 30) Jon, ngéda u nke makoda hiki ngéda, u ñunda toi le u yé bañga isañ, nyañ, mankéé nu munlôm tole nu muda inyu bilôk bikéé gwés bi gwéha. Baa hala a nti bé bés makénd i boñ biliya gwés gwobisôna inyu ba i makoda momasô?

LELAA HALA A NTIHBA YÉHÔVA NGÉDA DI NKE I MAKODA

11. Lelaa i ke makoda li nhôla bés i ti Yéhôva i jam a kôli kôs?

¹¹ Ngéda di nke makoda, di nti Yéhôva jam a kôli kôs. Nye kiki Nheg wés, Yéhôva a kôli ni bibégés, ni lipém, ni mayéga. (Añ Masoola 7:12.) Ngéda di nsoohe, di tôbôk tjémbi, di pôdlak ki mam ma mbéñge Yéhôva i makoda més, di nti nye i jam a kôli kôs​—bibégés gwés. Djob a nlôôha boñ ngandak inyu yés; jon di ndiihe bisai di gwé i ti nye lipém.

12. Kii Yéhôva a nôgda ngéda di nôgôl mbén yé i ke makoda?

¹² Yéhôva a kôli ki ni manôgla més. A bi ti bés oda le di nwas bañ makoda més, téntén i masuk ma ngéda mana. Ngéda di nôgôl mbén i ni ñem wés wonsô, hala a nkônha Yéhôva maséé kiyaga. (1 Yôhanes 3:22) A ntehe, a diihege ki, biliya di mboñ i ke makoda momasôna.​—Lôk Héber 6:10.

13, 14. Lelaa di nla nkôôge Yéhôva bo Yésu bebee i makoda?

¹³ Ngéda di nke makoda més, di ñunda le di nsômbôl kôôge Yéhôva ni Man wé bebee. I makoda més, Nniiga wés Nunkeñi a ñéga bés ni njel Bañga yé, le Bibel. (Yésaya 30:20, 21, MN) Yak i bôt ba ta bé Mbôgi Yéhôva, ba ba nlo i makoda més, ba nla sôk kal le: “Nyambe a yé toi ikété nan.” (1 Korintô 14:23-25) Yéhôva a nsayap makoda ni njel mbuu mpubi wé, ni le nyen a ñéga biniigana di nkôs i makoda. Ngéda di yé makoda més, di ñemble kiñ i Yéhôva, di nôgdaga ki le a ntôñ bés ni gwéha. Sôk i nsôk, di ga kôôge nye bebee.

¹⁴ Yésu a kal le: “Inyule homa iba to baa ba nkodba i jôl jem, me mba ha ikété yap.” (Matéô 18:20) Inoñnaga ni litiñ lini, Yésu a bé pôdlak makoda més. Nye Kristô, nu a yé ño ntôñ, “a nkiiña” ikété makoda ma litén li Djob. (Masoola 1:20–2:1) Hoñol le jam li! Yéhôva bo Yésu ba nsal bañga bañga i lédés bés i makoda ma bikristen. Baa u nhoñol le Yéhôva a nôgda lelaa ngéda a ntehe bés di nyamnda ni ngôñ i kôôge nye ni Man wé bebee?

15. Lelaa i ke makoda li ñunda Djob le di ngwés nôgôl nye?

¹⁵ Ngéda di nke makoda més, di ñunda le di nit kahap i Djob i ngii bihégél gwé. Tolakii Yéhôva a nti bés oda i ke makoda, a nyéksa bé bés i boñ hala. (Yésaya 43:23) Jon, bésbomede bon di nlama unda Yéhôva le di ngwés nye ni ñem wés wonsôna, ni le di nit énél yé bañga linidik. (Rôma 6:17) Kiki héga, i nla pam le nwet wés bôlô a énél bés le di ti ngéda yés yosôna i bôlô yé, kayéle di la ha bé ke makoda momasôna. Di nla boma ngolba i baane ba loñ, ba ba nhan le ba ga fane bés, ba leñ bés i mok, tole ba boñ bés béba ipe i i nloo bi, inyule di nkodba inyu bégés Djob. Tole i nla pam le ñem u tinde bés i ke i ngim ngand ilole di ke likoda. Mu ikété mam di ntip sima, di gwé le di pohol: Njee di ga bégés? (Minson mi baôma 5:29) Ngéda di mpohol i nit kahap i Yéhôva i ngii bihégél gwé, di nkônha ñem wé maséé.​—Bingéngén 27:11.

KE NI BISU I UNDA LE U NTÉÑBE I KE MAKODA

16, 17. (a) Kii i nyis bés le makoda ma bé nseñ ngandak inyu bikristen bi hiai bisu? (b) Mankéé George Gangas a bé hoñol laa inyu makoda?

¹⁶ Bikristen bi hiai bisu bi bi kodba ndik bé ngim ngéda mbus hélha jam i bi pémél bo i Pentékôt i ñwii 33 N.Y. “Ba téñbe yaga ni maéba ma baôma ni adna.” (Minson mi baôma 2:42) Bibuk bi Lôk Grikia le “ba téñbe yaga,” bi ntoñol mban, tole i ke ni bisu i boñ biliya bi ngui. I si énél i Lôk Rôma, ni ngolba i baéga ba Lôk Yuda, hala a bé bé jam li ntomb inyu bikristen bi ngéda i, i ke makoda. Ndi, ba bi téñbe i kodba.

¹⁷ I len ini, ngandak bagwélél ba Yéhôva ba ñunda le ba ndiihe makoda ma bikristen. Mankéé wada le George Gangas, nu a bi sal i Juu li Bakena Ntôñ jam kiki bo 22 ma ñwii, a kal le: “Inyu yem, i kodba ni bilôk bikéé i yé yom i maséé kiyaga, ni homa me nkôhna makénd. Ibale me nla, me yé me ngwés ba i nsoñgi u bôt ba bisu ba nlo makoda, ni ba ba nsôk huu. Me nlôôha nôgda maséé ikété yem ngéda me nkwel ni bagwélél ba Djob. Ngéda me yé i pôla yap, me nôgda wengoñle me yé ni lihaa jem ikété paradis i mbuu. Mahoñol mem ma kété kété ni ngôñ yem, bi yé ndik le me ke i makoda.”

18. Mahoñol moñ inyu makoda més ma yé le kii? Makidik moñ ma yé le kii?

¹⁸ Baa yak we u nhoñol nlélém jam inyu makoda més, het di mbégés Yéhôva ni bape? Ibale ñ, we yoñ makidik ma ngui i boñ biliya i ba i makoda hiki ngéda. U ga unda le u gwé minlélém mi mahoñol ni Kiñe David, nu a kal le: “A Yéhôva, me ngwés liyééne li ndap yoñ.”​—Tjémbi 26:8.