Baa ni ngi hoñlak?

Baa matiñ ma Mbén Môsi ma bé hôla i kéés mindañ mi mi bé kwo hiki kel i nlômbi Israel?

DI NLA timbhe le, ñ, ngim mangéda. Di yoñ hihéga hiada. I kaat Ndiimba Mbén 24:14, 15 Bibel i nkal le: “U tééñgaga bañ mboñnson a nkôs nsaa, nu a yé hiyeyeba hi nsamb, to a ba yaa wada ikété lôkisoñ, to wada ikété biyoyo bi yé hisi hioñ, mu minkoñ nwoñ . . . A tiga lôndôl Yéhôva ikolba we, ndi hala a ba we béba.”

Ñañ u nkaa wada kiki bo u, u bi tilba i hiai hi nyônôs isaambok B.N.Y. Ba bi léba wo ipañ Asdôd. I nene le ba bi tila wo inyu pôdôl ngim ngwelnson nu a bi la bé ti libim li blé ba bé bémél nye, matila mana, ma ma bé ntilga i ngii pes himbôga, ma nkal le: “Mbus ndék dilo nlimil woñ [u u ntjelel] u bi mal kot matam ma libumbul, Hoshayahu man Shobay a bi lo i yoñ mbot u nlimil woñ. . . . Baso gwelnson bobasôna ba ba nsal i si hiañgaa ni me b’a bok mbôgi . . . le maliga mon me mpot. Me yé ngi nsohi wo ki wo. . . . Ibale ngomin a ntehe le i ta bé nyégsaga i timbhe mbot i nlimil woñ, boñ hala inyu ngoo u nkônôl wo! U nlama bé yén nwee ngéda nlimil woñ u yé nso, ngi mbot.”

Mut miñañ wada le Simon Schama a nkal le: “Nkaa unu ngwelnson a bé kaa, u gwé mahee i mis més iloo nso njelel u ngwelnson u u nsômbôl le ba timbis wo mbot yé. Hala a ñunda le a bé yi mbén i Bibel, téntén mam bikaat bi Lôk Lévi ni bi Ndiimba Mbén bi bé bat le ba boñ ni bôt ba bé tét diyeyeba.”