Lelaa u nla boñ le yigil yoñ Bibel i ba Lam ni mahee

Yôsua a yé añ Mbén; mapénd ma Yérikô ma nkwo ndi ndap Rahab i nkwo bé; Yôsua a mpaa moo mé ngii inyu soohe Djob

YÔSUA a yé bisu bi ndutu ikeñi. A nlama kena loñ Israel Hisi Likak, ndi inyu pamba a ga boma mandutu makeñi. Yéhôva a bi bôn nye le a ga hôla nye i yémbél mandutu ma, jon a kal nye le: “Ha ndigi ngui, u lédés yaga ñem, i tééda i boñ kingéda Mbén yosôna. W’a hoñol [añ] yo njamuha ni juu, le ndi u tééda i boñ kingéda mam momasôna ma yé ntilbaga mukété. Hala nyen w’a boñ le njel yoñ i too, w’a kôs ki loñge.”—Yôsua 1:7, 8.

Munu “dilo di nsôk” tini, yak bés di mboma mandutu makeñi. (2 Timôtéô 3:1) Nlélém kiki Yôsua yak bés di nla yembél mandutu més ibale di noñ maéba Yéhôva a ti nye. Di nla añ Bibel hiki kel, di yoñok ki ngéda i ha matiñ mé bisélél mu manoodana di mboma.

Ndi yigil i ta bé jam li ntomb inyu ngandak ikété yés, i nyi bé to lelaa i nigil. Kiki yigil Bibel i nlôôha ba mahee, béñge minkéñék mi matila le: “Noode maéba mana,” inyu kôhna biloñge bi maéba bi bi nla lémés yigil yoñ, ni bi bi mboñ le yigil yoñ i bane we mahee.

Ntôp tjémbi a kal le: “Boñ me le me kil njel matiñ moñ, inyule mu nyen me nkônôl maséé.” (Tjémbi 119:35) U nla nôgda ngandak maséé i wan Bañga i Djob. Mu kii u nke ni bisu i tém yo, u ga sôk léba tik ngok i mbuu.

I yé maliga le, u gwé bé le u éga ngim loñ kiki Yôsua, ndi u mboma mandutu. Jon kiki Yôsua, nigil, u bii mam u nigil i bisélél inyu loñge yoñ. Ngéda u mboñ hala, yak we u ga yoñ makidik malam, u yémbél ki mandutu.

NOODE MAÉBA MANA

Soohe ilole u nigil. Bibel i gwé mahoñol ma Djob bayemlikok ma ma bi tilba inyu loñge yés. Jon ngéda u ñañ Bibel, boñ biliya inyu nok yo, i tééda yo ni i bii yo bisélél i niñ yoñ.—Esra 7:10.
Badba mambadga ngéda u ñañ Bibel tole mimbamble nwés: ‘Kii unu nlôñ kaat u niiga me inyu Yéhôva? Lelaa u nkiha ni nwin u Bibel? Lelaa me nla gwélél mahoñol ma inyu hôla bôt bape?’
Soñda mam u nigil. Mu kii u mba ñañ, telep ngim bahoma, u badba le: ‘Kii me nôgda ngéda me añ ini kaat? Inyuki me nôgda hala? Mambe maada nlôñ u u gwé ni mam ma bi pémél me, ni ma me mboma i len ini, tole ni ma me ga boma? Lelaa me nla bii matiñ ma Bibel ni maéba mana bisélél?’ (Hiôb 23:5; Tjémbi 49:4) Wan ibale u nla toñol inyuki Yéhôva a nyigye bagwélél bé i keñgle ngim maboñok, tole bimbe bikuu di nla kôs ngéda di nôgôl bé Bañga yé.—Ndiimba Mbén 32:28, 29.
Noode hégda mam ngéda u ñañ miñañ mi Bibel. Kiki hihéga, hégda le u téé ha ipañ lôkisañ i Yôsep i i yé nuñul nye yak Lôk Ismael. (Bibôdle 37:18-28) Kii u ntehe? Kii u nok? Imbe jiñ u nok? Boñ wengoñle wen u yé i bôt ba. Kii ba nhoñol, ni kii ba nôgda? Mahoñol ma, m’a nlémés yigil yoñ kayéle i bane we nseñ.
Gwélél bisélél inyu yigil bi ntôñ u nti we inyu lémés yigil yoñ. Meya bisélél bi yé ni hop woñ, i internet tole i mapep. U kon bañ woñi i bat bape mahôla inyu yi lelaa u nla gwélél bisélél bi. Kiki hihéga, bisélél ni Pulasi le Index des publications des Témoins de Jéhovah, tole Guide de recherche pour les Témoins de Jéhovah, bi ga hôla we i léba i yom ba bi tila inyu miño mi minkwel, tole i léba ndoñi i ngandak minlôñ mi Bibel. Gwélél ndoñi bibuk i Les Saintes Écritures—Traduction du Monde Nouveau ibale u nla léba yo ni hop woñ. Ndoñi i, i nti we ngandak biniigana inyu biloñ ni mambok ma ngéda Bibel, inyu yi ngéda miñañ mi mi bé tagbe, yét, ntel tole ndamba i gwom, ni mam mape.
Tééda balôm ba matode mu mam u nsoñgol, ma ma ga hôla we i bigda i yom u nigil. I nlôôha ki ba loñge le u kabna yo ni bôt bape. Baa ngim litode i yé mu le u nla gwélél mu likalô joñ? Ngéda u mboñ hala, u ntééda ndik bé balôm ba mam ndi u ngwélél ki i yom u nigil inyu hôla bôt bape.