Inyuki di ñun ni inyuki di nwo?

Nyambe a bi kal Adam le: “I kel u nje [matam ma e i], wee u nwo.” (Bibôdle 2:17) I mbén i, i bé bé le i bana nseñ ibale Djob a hek Adam le a un, a wo ki. Adam nyemede a bé yi le, inyu boñ le a wo bañ, a bé lama bé je litam li e i.

Adam bo Éva ba bééna bé to ngôñ i je e i inyu niñ, inyule wom u bééna ngandak mintén mi bie mi mi bé num matam. (Bibôdle 2:9) Adam bo Éva ba bé le ba unda le ba nôgôl Djob ibale ba tjél je litam li e i. Manôgla map ma bé lama ki unda le Djob a kôli éga niñ yap.

INYUKI ADAM BO ÉVA BA BI WO?

Inyu nok inyuki Adam bo Éva ba bi wo, di nlama wan nkwel wada u u ntihba bés bobasôna. Satan Nsohop a bi gwélél nyoo inyu tembene Éva. Bibel i nkal le: “Ndi nyoo i ba likeñge iloo yo ki yo nuga bikai Yéhôva Nyambe a hek. Ni yo i kal muda le: ‘Baa hodo le Nyambe a kal le, ni je bañ matam ma bie gwobisôna mu wom?’”​—Bibôdle 3:1.

Éva a bi timbhe le: “Di yé le di je mu matam ma bie bi wom. Ndi mu matam ma e i i yé ngembe wom, Nyambe a bi kal le: ‘Ni je bañ mu, to tis ni tis bañ yo, ni tiga le ni wo.’” Ndi nyoo i kal muda le: “N’a wo yaga bé; inyule Nyambe a nyi le kel ni nje mu, ha nyen mis manan m’a yiblana, bé ki n’a ba kii Nyambe le ni yik loñge ni béba.” Satan a bé kal le Yéhôva a yé mut bitembee nu a ntop bé ti Adam bo Éva gwom bilam.​—Bibôdle 3:2-5.

Éva a bi neebe i yom a bi nok. A bok litam li e mis, li bôdôl lémél nye. Mbus a sambal woo, a ket litam, a bôdôl je. Bibel i nkal le: “A ti nlô wé nu a ba lôñni nye, yak nye ki a je.”​—Bibôdle 3:6.

Kinje njôghe Yéhôva a bi nôgda ngéda a bi tehe i bon a ngwés ba mpohol i ndogbene nye! Ndi kii a bi boñ? Yéhôva a bi kal Adam le: “W’a . . . témb biték, inyule u bi yôña mu; inyule u yé nluñ ték, w’a témb ki nluñ ték.” (Bibôdle 3:17-19) Inyu hala nyen, “dilo tjodisôna Adam a nom di ba 930 nwii, ni nye a wo.” (Bibôdle 5:5) I mbus nyemb yé, Adam a bi ke bé ngii, tole i homa mimbuu mi nyééne. Ilole Yéhôva a nhek Adam, a bé niñ bé homa numpe. Jon ngéda a bi wo, a bi témb nluñ ték kiki a bé ilole a nhéga. A bé niñ ha bé. Kinje ngoo!

TO WADA WÉS A TA BÉ PELES

Kiki ba bi kôôba ndogbene Nyambe, Adam bo Éva ba bi nimis libak jap li peles, yak niñ boga. Ba bi bôdôl un, ba yila kwéha. Ndi ngimanôgla wap a bi tihba yak mbôda yap, kayéle ba lôôs bo libak li kwéha. Rôma 5:12 a nkal le: “Béba i jôp nkoñ ’isi inyu mut wada [Adam], nyemb ki i lôl inyu béba, hala nyen nyemb i tôla bôt bobasôna, inyule bobasôna ba boñ béba.”

Bibel i nkal le béba ni nyemb bi yé kiki ‘hul mis i i nhô masu ma biloñ gwobisôna, ni kiñil i nkéñ masu ma matén momasôna.’ (Yésaya 25:7) Nyemb i yé kiki béba mbebi i mut to wada a nla bé keñgle. Ñ, “bobasôna ba nwél i Adam.” (1 Korintô 15:22) Ndi i mbadga yak ñôma Paul a bi bat i yé le: “Njee a’ tohol me ni nyuu ini i nkena i nyemb?”​—Rôma 7:24, MN.