Mambadga ma basoñgol

Ngéda Satan a bi kal Éva le a ga wo bé ibale a nje e i yi loñge ni béba, baa a bé pôdôl i jam bôt ba ntôô i len ini le mbuu u nkônde niñ i ngéda mut a nwo?

I mpôna le to. Nsohop a bi kal bé Éva le ibale a nje litam li e Djob a bi sôñga, a ga wo, mbuu wé (hala wee ngim yom ikété yé) w’a ke ni bisu i niñ homa numpe. Satan a bi gwélél nyoo inyu kal Éva le ibale a nje litam li e, ‘a ga wo bé’ tjagda. A bé sômbôl kal le Éva a ga ke ni bisu i niñ loñge hana ’isi ibabé le Djob a énél nye.​—Bibôdle 2:17; 3:3-5.

Kiki bini bitembee le mbuu u nke ni bisu i niñ ngéda mut a nwo bi bi bôdôl bé i wom Éden, bi bi bôdôl ni hee? Di nyi bé. I jam di nyi li yé le, bikwéha bi biniigana gwobisôna bi bi mal i Ntida malép i dilo di Nôa, inyule ndik Nôa ni lihaa jé bon ba bi pei lakii ba bé bégés Yéhôva.

Jon i nene le bini biniigana bôt ba ntôô le ngeñ mut a nwo mbuu wé u nke ni bisu i niñ, bi bi gwéé i mbus Ntida malép. Ngéda Djob a bi yubda dilémb i Babel, bôt ba tjama ‘ni hisi hiosôna,’ ibabé pééna ha nyen ba bi kahal bana mana mahoñol le mbuu u nke ni bisu i niñ i mbus nyemb. (Bibôdle 11:8, 9) To kii i leñek, yom di nyi i yé le, Satan Nsohop “isañ bitembee” nyen a bi lona tembee i, a yé ki maséé ngéda ba ntôô yo ni nkoñ ’isi wonsôna.​—Yôhanes 8:44.