“Yéhôva a bi hôya bé me”

Me bi gwéé i nwii 1983, ndi i ngéda me bi pamna jôm li nwii, me bôdôl nok njôghe bilim i nyuu yem yosô. I ngéda me bi bolna jôm li nwii ni ima, me bi tôôde kegla yada, me la ha bé telep. Me bi boñ biliya gwobisôna i nyiñgis makôô mem, ndi to yom, ma bi wo. Ibôdôl ha ngéda i, me bi la ha bé ke. U kon u u bi boñ le me la ha bé nañ. I len ini me ngi yii kii isii mañge.

Ndék sôñ i mbus me bi kwo kon, Mbôgi Yéhôva iba i bi yuuga me. Kiki me bé pam bé, me bééna lem i solop i ngéda bôt ba bé lo i yuuga me. Ndi me bi neebe le i bôda ba ba kwel ni me. I ngéda ba bé añle me i mam ma ga bôña i Paradis, hala a bi hôñlaha me mam me bi nok i ngéda me bééna nwii mintan. Ha ngéda i, nsañal nu tôbôtôbô wada le Jethro, nu ba bi om i Suriname, a bé lo i mbai yés ngélé yada inyu ngim sôñ inyu niiga papa yem Bibel. Jethro a bé unda me loñgeñem, me bé gwés ki nye ngandak. Bagwal ba pua yem ba bé kena yak me i makoda ma Mbôgi Yéhôva. Jon Florence, wada mu bôda iba ba ba bé tééne me likalô yokela a bat me ibale me nsômbôl nigil, me timbhe le ñ.

Ha nyen Florence a bi lona nlô wé le Justus di bôdôl nigil Bibel ntôñ. I ngéda ba bi yimbe le me nyi bé añ, ba bôdôl niiga me i añ, kayéle i mbus ndék ngéda me bôdôl añ metama. Kel yada babiina ba ba kal me le ba ñep bo i sal kiki basañal i Suriname. Ngoo le, mut to wada a bé bé i mbai yés inyu kena yigil yem ni bisu. Ndi loñge jam i yé le Yéhôva a bi hôya bé me.

Ndék ngéda i mbus, nsañal wada le Floyd a bi lo i téé likalô i mbai yés, a boma me mu kii a bé téé likalô li mandap ni mandap. I ngéda a bi bat me ibale di nla nigil Bibel, me nwemla. A bat me le: “Inyuki u nwemla?” Me kal nye le inyule me bi nigil i man kaat nunu le Kii Djob a mbat le di boñ?, me bôdôl ki nigil La connaissance qui mène à la vie éternelle.a Me kal nye inyuki yigil i bi telep. Floyd a mehe yigil i kaat ini le La connaissance ni me, ndi yak nye ba bi om nye i sal homa numpe. Me témb me yén ibabé i bana mut a nigil ni me.

Ndi i nwii 2004, ba bi om basañal ba tôbôtôbô iba inyu sal i mbai yés Orealla, Granville bo Joshua. Ba bi boma me i ngéda ba bé téé likalô li mandap ni mandap. I ngéda ba bi bat me too me nsômbôl nigil Bibel, me nwemla, me soohe bo le di tiimba nigil i kaat ini le La connaissance qui mène à la vie éternelle. Me bé sômbôl tehe too b’a niiga me minlélém mi mam kiki bôt ba bisu ba bi niiga me. Granville a bi kal me le makoda ma bé tagbe ha i mbai. Tolakii me bi boñ jôm li nwii me pam bé me i ndap, me bééna ngôñ i ke makoda. Jon Granville a bi yoñ me ni yééne i bibôk bi bôt a tinde me ikepam i ndap Ane.

I mbus Granville a bi ti me makénd i tila jôl jem i suklu Ane. A kal me le: “U yé bôk ndi u nla pot. Kel yada, w’a tégbaha nkwel mbamba. W’a tehe.” Bibuk gwé bi bi lédés me.

Me bi bôdôl pam likalô ni Granville. Ndi kiki manjel ma mbai yés ma bé mabe ngandak, i bé ndutu i hiôm mu ni yééne i bibôk bi bôt, jon me bi bat Granville le a ha me i brouette. Hala a bi yik tômbôs bés mam. I sôñ Matôp i nwii 2005, me sôblana. Ndék ngéda i mbus, bilôk bikéé bi bi niiga me i sal homa ba nkap bikaat ni i sal i sônô.

Ngoo le, i nwii 2007, pua yem a bi wo i ngéda ba bé yap lép i môñgô. Hala a bi lôôha tééñga lihaa jés. Granville a bi soohe ni bés, a éñél bés minlôñ mi Bibel inyu lédés bés. Nwii ima mbus, kuu ipe i bi témb i kwél bés. Granville nyemede a wo mu kii ba bé yap lép ni môñgô.

Man wés likoda a bi yégle ngi mañ, a ban-ga ndik nhôla nson wada. Nyemb Granville i bi tihba me ngandak, inyule a bé toi liwanda jem li ñem nyuu. A bi yoñ ngéda i hôla me i pes mbuu ni i pes minsôn. Likoda li bé noñ i mbus nyemb yé, men me bé lama soñgol Nkum Ntat. Me bi soñgol maben ima ma bisu, i mbus me bôô maéa. Me la ha bé kena lisoñgol jem ni bisu.

Me bi bôdôl témbna i ngéda bilôk bikéé bi likoda lipe bi bi lo i hôla bés i Orealla. I mbus, hikuu hi loñ hi bi ep mankéé wada i sal kiki nsañal nu tôbôtôbô, le Kojo. Me bi kon maséé ngandak i tehe m’ma ni mankéé nu sôk mbus ba mbôdôl nigil, i mbus ba sôblana. I sôñ Matumb nwii 2015, me bi yila nhôla nson. I mbus ngim ngéda, ba ti me nkwel mbamba u bisu. Yokela gwiiha bi bé bi kulak, me nwemlaga inyule me bé hoñol i yom Granville a bi kal me ndék nwii bisu bi ngéda le: “Kel yada w’a tégbaha nkwel mbamba. W’a tehe.”

JW Nkuu Biliñgeliñge nu a mpam hiki ngéda a bi hôla me i nok le ngandak lôk kéé i bôda ni i bôlôm i nkoñ ’isi i gwé minlélém mi mandutu kiki me. To hala kiki ba nkon, ba yé maséé i yoñ ngaba minson mi Ane. Yak me me nla ke ni bisu i boñ ngim mam. Me bé sômbôl boñ kii yosôna me nla i nson Yéhôva, jon me bi yoñ nson u nsañal nu ngéda yosôna. Kinje nwin nlam me bi kôs i sôñ Dipos, nwii 2019! Ba bi yis me le me nyila mañ i man wés likoda nu 40 ma batéé likalô.

Me nti bilôk bikéé bi bôda ni bi bôlôm bi bi nigil Bibel ni me mayéga, bi hôla ki me i gwélél Yéhôva. Iloo ki hala, me nti Yéhôva mayéga inyule a bi hôya bé me.