Lelaa Yéhôva a ntimbhe masoohe més

1-2. Kii di nla badba inyu masoohe més?

BAA i ma pam le u badba too Yéhôva a ntimbhe toi masoohe moñ? Ibale hala, u ta bé wetama. Ngandak lôk kéé i bôda ni i bôlôm i ma badba nlélém mbadga, téntén i ngéda ba ntégbaha mangéda mabe. I ngéda di ntégbaha mangéda mabe, i nla ba yak bés ndutu i yimbe lelaa Yéhôva a ntimbhe masoohe més.

² Di tehe inyuki di nla ba nkwoog nkaa le Yéhôva a ntimbhe masoohe ma bagwélél bé. (1 Yôhanes 5:15) Di ga timbhe yak mana mambadga: Inyuki ngim mangéda di nla nôgda we Yéhôva a ntimbhe bé masoohe més? Mambe manjel Yéhôva a ngwélél inyu timbhe masoohe més i len ini?

YÉHÔVA A NLA TIMBHE MASOOHE MÉS I NYA DI NHÉGDA BÉ

3. Inyuki Yéhôva a ngwés le di soohe nye?

³ Bibel i nyis bés le Yéhôva a ngwés bés ngandak, di nlôôha ki ba mahee i mis mé. (Hagai 2:7; 1 Yôhanes 4:10) Inyu hala nyen a naña bés i soohe nye inyu bat nye mahôla. (1 Pétrô 5:6, 7) A gwé ngôñ i hôla bés i tééda maada malam ni nye ni i yémbél mandutu di mboma.

4. Kii i nyis bés le Yéhôva a ntimbhe masoohe ma bagwélél bé? (Béñge yak titii.)

⁴ Di mbéna añ ikété Bibel le Yéhôva a bé timbhe masoohe ma bagwélél bé. Baa hihéga hiada hi nlo we mahoñol? Di yoñ le hihéga hi Kiñe David. David a bi bana ngandak baoo i niñ yé, jon a bi bat Yéhôva mahôla. Lisañga jada, a bi soohe le: “A Yéhôva, emble masoohe mem; sédne minyemhe nwem ôô. Timbhe me inyule u téé sép, u bak maliga.” (Tjémbi 143:1) Yéhôva a bi timbhe masoohe ma David i ngéda a bé bat nye le a sôñ nye. (1 Samuel 19:10, 18-20; 2 Samuel 5:17-25) Inyu hala nyen David a bé a kôli kal le: “Yéhôva a yé bebee ni ba bobasôna ba nlôndôl nye.” Yak bés di yé nkwoog nkaa ni i jam li.—Tjémbi 145:18.

5. Baa Yéhôva a bé timbhe ndik masoohe ma bagwélél bé ba kôba kiki ba bé gwés? Ti hihéga. (Béñge yak titii.)

⁵ I nla pam le Yéhôva a timbhe bé masoohe més kiki di hoñlak. A bi boñ hala ni ñôma Paul. Paul a bi bat Nyambe le a héya nye i ‘loo i bé nye ikété minsôn.’ Paul a bi soohe tôbôtôbô inyu jam li, jam kiki bo ngélé aa. Baa Yéhôva a bi timbhe nye? Ñ, ndi ha kiki nye a bé hoñol bé. Iloole Yéhôva a héya nye i ndutu i, a bi ti nye ngui i ke ni bisu i gwélél nye tolakii a bé nok njôghe.—2 Korintô 12:7-10.

6. Ngim mangéda inyuki i nla nene bés wee Yéhôva a ntimbhe bé masoohe més?

⁶ Kiki ñôma Paul, i nla pam le yak bés di kôhna ndimbhe masoohe més ki le yo bé yon di bemek. Di ba nkwoog nkaa le Yéhôva a yi i yom i nlôôha ba loñge inyu yés. A nla “boñ i mam ma nlôôha yaga loo mam momasôna di mbat tole di nhégda.” (Éfésô 3:20) Inyu hala nyen a nla timbhe masoohe més i ngéda tole i nya di bemek bé.

7. Inyuki i nla pam le di héñha i yom di mbat Yéhôva ikété masoohe? Ti hihéga.

⁷ I nla pam le di héñha i yom di mbat Yéhôva ikété masoohe i ngéda di ntibil nok kii i yé sômbôl yé. Di yoñ hihéga hi Martin Poetzinger. Ndék ngéda i mbus libii jé, ba bi ep mankéé Poetzinger i ñamb mok mi mbanda i ngéda Nazi. I bibôdle, a bé soohe Yéhôva le a hôla nye i pam i mok inyu yoñ ndun ni nwaa ni inyu tiimba bôdôl i nson wé likalô. I mbus sonde iba, a nôgda le Yéhôva a ta bé bebee i pémés nye mu mok mi. Ha nyen a bi bôdôl soohe le: “A Yéhôva, unda me i yom u gwé ngôñ le me boñ.” Ha nyen a bi bôdôl hoñol mandutu momasôna bilôk bikéé bi bé boma i ñamb mok. Ngandak yap i bé tôñ inyu bon bap ni baa bap. Ha nyen mankéé Poetzinger a bôdôl soohe le: “A Yéhôva me nyéga inyu nson mondo u nti me. Hôla me i lédés lôk kéé ni i ti bo makénd.” I nson u won a bi gwel mu nwii bôô a bi yik tégbaha i mok!

8. Kii di nlama bé hôya i ngéda di nsoohe?

⁸ Di nlama bé hôya le Yéhôva a bi téé ngim mam a nlama yônôs i téak wé ngéda. Ikété mam a nsômbôl yônôs di nla sima mandutu momasôna ma ntééñga bôt i len ini, a gwé ngôñ i héya mo ngélé yada inyu ngélé yosôna. Mam kiki bo bikuu, makon, ni nyemb. Inyu yônôs sômbôl yé Yéhôva a ga gwélél Ane yé. (Daniel 2:44; Masoola 21:3, 4) Ndi ilole i ngéda i i nkola, Yéhôva a nwas le Satan a énél nkoñ ’isi.b (Yôhanes 12:31; Masoola 12:9) Ibale Yéhôva a mélés mandutu ma bôt ba binam nano, i ga nene wee Satan a ñénél loñge. Tolakii di nlama bem inyu tehe mimbônga mi Yéhôva mihogi mi nyon, hala a nkobla bé le a nwas bés ngi mahôla. Di wan le ngim manjel Yéhôva a ngwélél inyu hôla bés.

MANJEL YÉHÔVA A NGWÉLÉL INYU TIMBHE MASOOHE MÉS LEN

9. Lelaa Yéhôva a nhôla bés i ngéda i mpam le di yoñ makidik? Ti hihéga.

⁹ A nti bés pék. Yéhôva a mbôn le a nti bés pék di gwé ngôñ inyu yoñ makidik. Di nlôôha bana ngôñ ni pék i Yéhôva i ngéda di nlama yoñ makidik ma ma ntihba niñ yés, kiki bo i biiba tole i yén ngi biiba. (Yakôbô 1:5) Di yoñ hihéga hi sita yada le Maria nu a yé ngi biiba.c A bé nsañal nu ngéda yosôna i ngéda mankéé wada a bat nye libii. A nkal le: “Kiki di bé ke ni bisu i yina, me nôgda le di nkahal gwéhna. Ha nyen me bi nôgda le ngeñ i nkola le me yoñ makidik. Me bi soohe ngandak mu jam li. Me bééna ngôñ le Yéhôva a éga me, ndi i nlélém ngéda me yik le Yéhôva bé nyen a ga yôñôl me makidik.” I sita i, i bi nôgda le Yéhôva a bi timbhe masoohe mé, a ti nye pék. Lelaa? Mu kiki a bé boñ nyiña mu bikaat bi ntôñ, a bi léba gwigil bi bi hôla nye i kôhna ndimbhe i mambadga mé. A noñ ki maéba ma pék nyañ a bi ti nye. Maéba ma ma bi hôla nye i wanba. Sôk i nsôk, a bi yoñ makidik malam.

10. Inoñnaga ni kaat Filipi 4:13, kii Yéhôva a mboñ inyu hôla bagwélél bé? Ti hihéga. (Béñge yak titii.)

¹⁰ A nti bés ngui i hônba. Ndik kiki a boñ ni ñôma Paul, Yéhôva a nti bés ngui di gwé ngôñ inyu hônba mandutu. (Añ Filipi 4:13.) Di yoñ hihéga hi mankéé wada le Benjamin nu Yéhova a bi hôla i hônba mandutu. Benjamin a bi tégbaha bebee le niñ yé i mañge wanda yosôna i ñamb u bôt ba nke gwét ngwéé i Afrika. Benjamin a nkal le: “Me bé soohe Yéhôva hiki ngéda, me badak nye le a hôla me i boñ mam ma nlémél nye. Yéhôva a bi timbhe masoohe mem, a ti me ñem nwee, a ti yak me ñem ngui inyu kena nson likalô ni bisu, a hôla me i bana bikaat bi bi bé hôla me i tééda hémle i ngui. I ngéda me bé añ miñañ mi bilôk bikéé bipe, me tehge lelaa Yéhôva a bi hôla bo, hala a bi hôla me i téñbe lôñni nye.”

11-12. Lelaa Yéhôva a nla gwélél bilôk bikéé bi bôda ni bi bôlôm inyu timbhe masoohe més? (Béñge yak titii.)

¹¹ A ngwélél bilôk bikéé bi bôda ni bi bôlôm inyu hôla bés. I u u nsôk u Yésu hana ’isi, a bi yemhe Yéhôva ni ñem wé wonsôna, a badak nye le a boñ le bôt ba ôm bañ nye nsohi le a ñôbôs jôl li Nyambe. Iloole a timbhe nye kiki a bé hoñlak, Yéhôva a bi ômle nye añgel yada inyu lédés nye. (Lukas 22:42, 43) Nlélém ni bés, Yéhôva a nla gwélél mankéé wada, a tinde nye i sébél bés i téléfôn, tole i yuuga bés inyu lédés bés. Bésbobasôna di nlama yéñ manjel i lédés bilôk bikéé ni “bibuk bilam.”—Bingéngén 12:25.

¹² Di yoñ hihéga hi sita yada le Miriam. Ndék sonde ndigi i mbus nyemb nlô wé, Miriam a bé i ndap nyetama a nôgdaga binyuu, a bé ndik kiki mut a nhel likanda, a tôñôk iloo hihéga. A bé ee ibabé waa, a ban-ga ngôñ ni mut a nsédne nye ôô. A nkal le: “Me bééna bé ngui i sébél mut, jon me bi bôdôl soohe Yéhôva. Me bé me ngi soohege me eek, téléfôn yem i kôt. Mañ wada u u bé liwanda jem li ñem nyuu jon li bé sébél me.” Mañ u bo nwaa ba bi lédés sita Miriam. Miriam a yé nkwoog nkaa le Yéhôva nyen a bi tinde mañ u i sébél nye.

13. Ti hihéga hi hi ñunda lelaa Yéhôva a nla gwélél i bet ba mbégés bé nye inyu timbhe masoohe més.

¹³ A nla gwélél bôt ba mbégés bé nye. (Bingéngén 21:1) Ngim mangéda, inyu hôla bagwélél bé, Yéhôva a ntinde i bôt ba ngwélél bé nye i lôl bo mahôla. Kiki hihéga, a bi tinde Kiñe Artaxerxes i ti Néhémia kunde i témb i Yérusalem inyu tiimba oñ tison. (Néhémia 2:3-6) Yak i len ini, Yéhôva a nla tinde i bet ba mbégés bé nye i lôl bés mahôla i ngéda di yé ikété mandutu.

14. Kii i nlémél we mu ñañ nu sita Soo Hing? (Béñge yak titii.)

¹⁴ Sita yada le Soo Hing a bi nôgda le Yéhôva a bi gwélél dokta jé inyu hôla nye. Lok yé i bé kônôl i ño. I ngéda i lok yé i i bi boñ béba accident, Soo Hing ni nlô wé ba bé nyégsaga i téé bôlô yap inyu yoñ ndun ni nye. Hala a bi boñ le mam ma moni ma ba bo ndutu ngandak. Soo Hing a bi kal le a bé nôgda wee njôghe i mpam nye i héya bitamb. Jon a bi yible Yéhôva ñem, a bat nye mahôla. Dokta li bi yoñ ndutu yap i moo, a yéñ manjel i hôla bo. Hala a bi boñ le ba kôhna mahôla ma ngomin, ni loñge homa liyééne. Jon i mbus ngéda, Soo Hing a kal le: “Di bi nôgda toi mahôla ma Yéhôva mu jam li. A yé toi Nu a ‘ñemble masoohe.’”—Tjémbi 65:2.

I MBÉDA BÉS HÉMLE INYU YÉÑ NI NEEBE NDIMBHE I MASOOHE MÉS

15. Kii i bi hôla sita yada i tehe le Yéhôva a bé timbhe masoohe mé?

¹⁵ I nla pam ngim mangéda le masoohe més ma kôs bé ndimbhe i tôbôtôbô. Ndi to hala, mandimbhe di nkôs ma nhôla bés i téñbe ni Tata wés nungingii. Jon, di nlama ba péé inyu tehe lelaa Yéhôva a ntimbhe masoohe més. Sita yada le Yoko a bé hoñol le Yéhôva a ntimbhe bé masoohe mé, ndi a bi bôdôl tila i mam a bé bat Yéhôva ikété masoohe. I mbus ndék ngéda, a bi témb a kahal béñge kaat yé, a nôgda le ngo Yéhôva a bi timbhe libim li masoohe mé, yak ma nyemede a bi hôya. Ñ, i nla ba loñge le di bana lem i yoñ ngéda i ôt pék inyu tehe lelaa Yéhôva a ntimbhe masoohe més.—Tjémbi 66:19, 20.

16. Lelaa di nla unda le di gwé toi hémle i ngéda di nsoohe? (Lôk Héber 11:6)

¹⁶ Hémle yés i nene ndik bé i ngéda di nsoohe Yéhôva, ndi yak i ngéda i mbéda le di neebe ndimbhe a nti bés. (Añ Lôk Héber 11:6.) Di yoñ hihéga hi mankéé Mike bo nwaa Chrissy. Njômbi yap i bé le ba sal i Bétel. Mike a nkal le: “Di bi yônôs mapep ngandak ngélé inyu bat le di jôp i Bétel, di soohe ki Yéhôva soohe ni soohe inyu jam li, ndi ba sébél bé bés i Bétel kekikel.” Mike bo Chrissy ba bi ke ni bisu i boñ kii yosôna ba bé la i nson u nsañal, ba kenek i ti mahôla i het ngôñ i batéé likalô i yé ikeñi tole i nson maoñ. I len ini, ba nsal kiki bagwélél ba makiiña. Mike a nkal le: “Hiki ngéda bé nyen Yéhôva a ntimbhe masoohe més kiki di ngwés, ndi a ntimbhe mo i nya i nlôôha ilam inyu yés, ngim mangéda, kiki bésbomede di hégdaga bé.”

17-18. Inoñnaga ni kaat Tjémbi 86:6, 7, di yé nkwoog nkaa ni kii?

¹⁷ Añ Tjémbi 86:6, 7. Ntôp tjémbi le David a bé nkwoog nkaa le Yéhôva a ñemble masoohe mé, a timbhege mo. Yak we u nlama bana nlélém bôdôl. Dihéga di ntehe munu yigil ini, di ñunda le Yéhôva a nla ti bés pék ni ngui i hônba mandutu. A nla gwélél bilôk bikéé bi bôda ni bi bôlôm, yak i bet ba ngwélél bé nye inyu lôl bés mahôla.

¹⁸ To hala kiki Yéhôva a ntimbhe bé masoohe més hiki ngéda kiki di ngwés, di yé nkwoog nkaa le a ga timbhe mo. A ga ti bés i yom i mbéda bés i ngéda i kôli. Jon, kee ni bisu i soohe Yéhôva, u hémlege le a’ yoñ ndun ni we nano, ni le a ga yônôs ki “ngôñ i bihégél gwobisôna” i mbok yondo.—Tjémbi 145:16.