Mambadga ma basoñgol

I mage mut ba mpôdôl i kaat 2 Tésalônika 3:​14, mimañ nwon mi nyoñ makidik i boñ hala tole batéé likalô bobasôna bon ba nla boñ hala?

Ñôma Paul a tilna bikristen bi Tésalônika, a kal le: “Ibale mut a nôgôl bé bibañga gwés bi bi yé munu i kaat ini, ni mage nye.” (2 Tésalônika 3:14) Behee, di bi kal le mimañ nwon mi nlama boñ hala. Ibale ngim mut i bé ke ni bisu i tjél matiñ ma Bibel, to hala kiki ba bé ti nye maéba ngandak ngélé, mimañ mi bé le mi ti nkwel inyu béhe likoda. I mbus ngéda, bini bilôk bikéé bipe bi bé nlama ha bé kiha ni nye.

Ndi, di nlama kodol ngim jam. Maéba ma Paul ma yé makidik batéé likalô ba nla yoñ bomede ngim mangéda. Jon mimañ mi nlama ha bé ti nkwel u mabéhna. Inyuki nogna yés i nhéñha? Di wan kii Paul a bé pôdôl i ngéda a bi ti maéba ma.

Paul a kal le ngim bôt mu likoda i bé ‘ke nkoda.’ Ba bi nôgôl bé maéba ma Bañga i Nyambe. I mayuuga mé ma bisu, a bi ti i oda ini: “Ibale mut a ngwés bé sal, wee to je, a je bañ.” Ndi, bikristen bihogi bi bé top bé sal inyu bana i gwom bi mbéda bo inyu niñ, to hala kiki ba bé le ba boñ hala. Ba hak manyo map ikété mam ma mbéñge bé bo. Kii bikristen bi bé nlama boñ ni i nya biyubda bi bôt i?​—2 Tésalônika 3:​6, 10-12.

Paul a kal le: “Ni mage nye.” I buk i Grikia i i nkobla le i tibil yimbe ngim mut, ni i yoñ yihe le u adbe bañ nye. Mimañ wotama bé nwon Paul a bi ti maéba ma, ndi likoda jolisôna. (2 Tésalônika 1:1; 3:6) Jon bikristen bi bi bé yimbe le mankéé a nôgôl bé Bañga i Nyambe, bi bé le bi kit le bi “waa ki kiha lôñni” i mankéé a nke nkoda.

Baa hala a nsômbôl kal le, ba bé yoñ nye kiki ba nyoñ mut ba mpémés i ntôñ? To, inyu hala nyen Paul a kônde le: “Kena ni bisu i ti nye maéba kiki mankéé.” Jon bikristen bi bé lama ba ni mut ba mage i makoda ni i nson likalô, ndi bi bé lama bé tégbaha loñge ngéda ni nye tole tuk ni nye. Inyuki? Paul a kal le: “Inyu boñ le a wo nyuu.” I ngéda ba bé mage mut a nke nkoda, hala a bé le a boñ le, a wo nyuu inyu liboñok jé libe, a héñha.​—2 Tésalônika 3:​14, 15.

Lelaa bikristen bi len bi nla noñ maéba ma? Pog, di nlama ba nkwoog nkaa le maboñok ma mut nu ma yé “nkoda” kiki Paul a bi unda. A bé pôdôl bé i bikristen bi yé maselna ni bés inyule ba mboñ mam kiññem yés i neebe bé tole bi ntehe bé mam kiki bés. A bé pôdôl bé i bôt ba bi babaa bés. Ndi, Paul a bé pôdôl téntén i bet ba ntjél nôgôl maéba ma Bibel.

I len ini, ibale di nyimbe le mankéé wada a ntjél nôgôl i yom Bibel i nkal,a di nla kit le di nkiha bé ni nye, to tégbaha loñge ngéda ni nye. Kiki makidik més ma, di ga kwélél bé mu ni bôt ba ba ta bé bôt bés ba lihaa. Ndi di nla ba ni i mut nu i makoda tole i likalô. Ibale a nhéñha i libak li, di nla bôdol ki kiha ni nye.