Yéñ mam u nyi bé i ngéda u nigil

I ngéda di nkôôba inyu nigil, di nla badba le: ‘Kii m’a nigil munu?’ Ndi di nlama yoñ yihe le i jam di nhoñol le yigil yés i ga pôdôl, i boñ bañ le di nimis mam ma mondo Yéhôva a ngwés niiga bés. Lelaa di nla ni ba bebee i nwas le Yéhôva a niiga bés?

Soohe inyu bana pék. Bat Yéhôva le a nhôla we i yimbe i jam a ngwés le u nigil hanano. (Yakôbô 1:5) Keñgle lem i hoñol le litehge li mam u bééna behee jon li yé lilam.​—Bingéngén 3:​5, 6.

Nwas le bañga i Nyambe i éga we. “Bañga i Nyambe i yé yômi.” (Lôk Héber 4:12) Hiki ngéda di nigil “bañga” i Nyambe, i nla hôla bés i yi ngim jam di yik bé, kayéle di lona mahéñha i ngim makas ma niñ. Hala a ga bôña ndigi ibale di yé bebee i nwas le Bibel i éga bés.

Ti mayéga inyu mam momasôna Yéhôva a ngwélél inyu niiga bés. Bijek gwé bi mbuu bi yé kiki “ngand bijek bilam.” (Yésaya 25:6) U keñgle bañ bijek bi mbuu u nhégda le w’a gwés bé. U ga ôt bé ndigi nseñ ni i yom u nigil, ndi u ga nok ki lingoñoo i nigil bañga i Nyambe!