2 Samuel
21 Masa ma haraparon+ saleleng tolu taon tikki mamaretta si Daud gabe raja. Dipangido ibana ma tudu-tudu tu Jahowa, jala didok Jahowa ma, “Na mardosa do si Saul dohot keluargana. Ai dipamate nasida do halak Gibeon.”+ 2 Dijou Raja Daud ma halak Gibeon+ jala makkatai ma nasida. (Anggo halak Gibeon i, dang halak Israel. Halak Amori+ do nasida. Dang dohot nasida dipamate halak Israel, ai nungnga marsumpa halak Israel asa unang pamatehon nasida.+ Alai, sai dilului si Saul do cara pamatehon nasida, ala holan halak Israel dohot halak Juda do na rikkot di ibana.) 3 Didok si Daud ma tu halak Gibeon i, “Aha do na ikkon bahenokku tu hamu asa mardame hita? Ai nungnga marsala hami. Songon dia do bahenonnami asa olo hamu mangido tu Debata asa dipasu-pasu naposo* ni Jahowa on?” 4 Didok halak Gibeon ma, “Dang cukkup perak manang mas+ lao manggarar pambahenan ni si Saul dohot keluargana i tu hami. Jala hami pe dang marhak pamatehon halak Israel.” Didok si Daud ma, “Attong, dokkon hamu ma aha pangidoanmuna, bahenokku do i.” 5 Didok halak Gibeon i ma, “Tikki i, sai dilului si Saul do cara lao pamatehon hami, asa unang adong be hami na tinggal di huta ni halak Israel.+ 6 Alani i, pasahat hamu ma pitu pinoppar ni si Saul tu hami. Dung i, gattungonnami ma bakke ni nasida*+ di jolo ni Jahowa, di kota Gibea+ huta ni si Saul halak na pinillit ni Jahowa i.”+ Didok raja i ma, “Olo. Hupasahat pe nasida tu hamu.”
7 Alai, asi do roha ni si Daud tu si Mepiboset,+ anak ni si Jonatan pahoppu ni si Saul. Ai adong do sumpa ni si Daud tu si Jonatan+ anak ni si Saul i di jolo ni Jahowa. 8 Alani i, diboan Raja Daud ma dua anak ni si Saul na ditubuhon si Rispa+ boru ni si Aya. Goarna si Armoni dohot si Mepiboset. Diboan raja i ma muse lima anak ni si Adriel,+ na ditubuhon si Mikhal*+ boru ni si Saul. (Anak ni si Barsilai halak Mehola i do si Adriel.) 9 Dipasahat ma nasida tu halak Gibeon. Dipamate halak Gibeon ma nasida jala digattung ma bakkena i di sada dolok di jolo ni Jahowa.+ Rap mate do na pitu halak i. Nasida dipamate tikki baru mulai musim panen barli.* 10 Dung i dibuat si Rispa+ boru ni si Aya i ma abit goni jala dipahembang ibana ma i di ginjang ni sada batu. Disi ma ibana manjaga akka bakke i. Tikki arian, dijaga ibana ma akka bakke i sian akka pidong. Jala dung borngin, dijaga ibana ma bakke i sian akka binatang buas. Disi ma ibana mulai sian musim panen sahat tu na turun udan sian langit tu bakke i.
11 Dibege si Daud ma na diulahon ni si Rispa boru ni si Aya gundik ni si Saul i. 12 Dibuat si Daud ma holi-holi ni si Saul dohot holi-holi ni si Jonatan anakna i sian akka pamimpin* ni Jabes-gilead.+ Halak Jabes-gilead do na manakko bakke ni nasida sian tano lapang na di Bet-sean. Ai di tikki i, dung ditaluhon halak Palistim si Saul di Gilboa, digattung halak Palistim do bakkena di Bet-sean.+ 13 Diboan si Daud ma holi-holi ni si Saul dohot holi-holi ni si Jonatan sian kota i. Jala dipapungu ma muse holi-holi ni akka halak na mate targattung i.*+ 14 Dikubur ma holi-holi ni si Saul dohot holi-holi ni si Jonatan anakna i di kuburan ni si Kis,+ bapak ni si Saul. Di kota Zela do nasida dikubur di huta ni halak Benjamin.+ Dung diulahon nasida paretta ni raja i, ditangihon Debata ma pangidoan ni nasida taringot tu bangso i.+
15 Masa ma muse porang di halak Palistim dohot halak Israel.+ Gabe lao ma si Daud dohot akka tentarana mangalo halak Palistim i. Alai loja do si Daud di parporangan i. 16 Adong ma sahalak bawa pinoppar ni si Repaim+ na margoar si Isbi-benob. Tikki i, diboan ibana do sada tombak* na sian tombaga, boratna hira-hira tolu satonga kilogram.*+ Diboan ibana do muse sada podang na baru. Naeng dipamate ibana ma si Daud. 17 Pittor ro ma si Abisai+ anak ni si Seruya mangurupi+ si Daud jala dipamate ibana ma halak Palistim i. Dipaksa akka tentarana i ma* si Daud asa unang dohot be marporang. Didok nasida ma, “Unang dohot be ho marporang!+ Ai molo mate ho, mittop ma palito ni bangso Israel!”+
18 Dukkon i, marporang ma muse halak Israel mangalo halak Palistim+ di Gob. Tikki i, dipamate si Sebekkai+ halak Husa ma si Sep pinoppar ni si Repaim.+
19 Marporang ma muse halak Israel mangalo halak Palistim+ di Gob. Tikki i, dipamate si Elihanan anak ni si Jare-oregim halak Betlehem i ma si Goliat halak Gat i. Balga ni hau ni tombak ni si Goliat i songon balga ni hau ni partonun.+
20 Marporang ma muse halak Israel mangalo halak Palistim di Gat. Tikki i, adong ma sahalak bawa na massai bolon, pinoppar ni si Repaim do ibana. Dua pulu opat ma jari-jarina, ai onom be jari-jari ni tanganna dohot patna.+ 21 Sai dileai bawa i do halak Israel.+ Alani i, ro ma si Jonatan anak ni si Simei+ abang ni si Daud pamatehon ibana.
22 Akka pinoppar ni si Repaim na sian Gat do na opat halak i. Alai mate do nasida dibahen si Daud dohot akka tentarana.+