Ulaon ni Apostel
25 Tolu ari dung mamaretta si Festus+ di provinsi i, borhat ma ibana sian Kaesarea tu Jerusalem. 2 Dung i ro ma malim kepala* dohot akka halak Jahudi na sangap paboahon hatorangan lao mangalo si Paulus.+ Dielek-elek nasida ma si Festus 3 asa ditangihon pangidoan ni nasida. Dipangido nasida do asa mulak muse si Paulus tu Jerusalem. Ai nungnga direncanahon nasida lao manakkup jala mambunu si Paulus di tonga dalan.+ 4 Alai didok si Festus ma, ikkon toktong do si Paulus di Kaesarea jala ibana sandiri pe na lao mulak nama satokkin nai tusi. 5 Didok ibana ma, “Suru hamu ma pamimpinmuna borhat rap dohot au tu Kaesarea, disi ma paboa hamu akka tuduhanmuna molo adong hasalaanna.”+
6 Dung adong hira-hira ualu manang sappulu ari si Festus rap dohot nasida, mulak ma ibana tu Kaesarea. Marsogotna i, hundul ma ibana di kursi pengadilan* jala disuru ma asa diboan si Paulus tu jolona. 7 Dung masuk si Paulus, jongjong ma sude halak Jahudi na ro sian Jerusalem i makkaliangi ibana. Godang ma dipandok nasida hasalaan ni si Paulus, alai dang boi dipatudu nasida na tutu hata ni nasida i.+
8 Didok si Paulus ma, “Dang adong na sala hubahen tu Patik ni halak Jahudi manang tu bagas joro manang tu Kesar.”+ 9 Alai ala naeng mambuat roha ni halak Jahudi+ si Festus, disukkun ibana ma tu si Paulus, “Olo do ho lao tu Jerusalem, asa disi ho diadili di jolokku taringot tu parsoalan on?” 10 Alai dialusi si Paulus ma, “Di jolo ni kursi pengadilan ni Kesar do au nuaeng jongjong, jala sasittongna ikkon dison do au diadili. Dang adong na sala hubahen tu halak Jahudi jala takkas do i diboto damang. 11 Molo na tutu adong na sala huulahon jala patut au ikkon dipamate,+ dang pola pangidookku asa dipalua au sian hamatean. Alai molo dang tutu hata ni nasida taringot tu au, dang adong na marhak pasahatton au tu nasida. Naik banding ma au tu Kesar!”+ 12 Dung makkatai si Festus dohot akka penasehatna, didok ibana ma, “Ala dipangido ho naik banding tu Kesar, borhat ma ho tu Kesar.”
13 Dung salpu piga-piga ari, sahat ma Raja Agrippa dohot si Bernike di Kaesarea lao manjuppangi si Festus. 14 Ala disi do nasida tinggal saleleng piga-piga ari, dipaboa si Festus ma parsoalan ni si Paulus tu raja i, ninna ma,
“Adong do dison sahalak tahanan ditadikkon si Feliks. 15 Tikki di Jerusalem au, ro do akka malim kepala dohot akka pangituai* ni halak Jahudi paboahon hatorangan taringot tu ibana.+ Dipangido nasida do asa dihukum ibana. 16 Alai hudok ma tu nasida, dang somal di halak Rom pasahatton sasahalak tu na mangaluhon ibana andorang so pajuppang ibana tu na mangaluhon i, jala ikkon dipaloas do ibana mangalehon alusna.+ 17 Alani i, dung sahat nasida dison dang pola hupaleleng-leleng be. Marsogotna i, hundul ma au di kursi pengadilan jala husuru ma asa diboan ibana. 18 Jongjong ma na mangaluhon i paboahon hatorangan lao mangalo ibana. Alai, dang adong hape diulahon ibana na jahat.+ 19 Parsalisian ni nasida holan alani agama+ dohot alani sasahalak na margoar Jesus do. Hape nungnga mate ibana, alai sai didok si Paulus do naung mangolu ibana muse.+ 20 Ala dang huboto be songon dia sibahenokku, husukkun ma manang na olo ibana lao tu Jerusalem asa disi ibana diadili taringot tu parsoalan on.+ 21 Alai dipangido si Paulus do asa torus ibana ditahan sahat tu na adong keputusan sian Kesar.+ Alani i husuru ma ibana ditahan paima hupaborhat ibana tu Kesar.”
22 Dung i didok si Agrippa ma tu si Festus, “Lomo do rohakku naeng mambege hatorangan ni bawa i.”+ Didok si Festus ma, “Marsogot ma boi begeonmu ibana.” 23 Marsogotna i, ro ma si Agrippa dohot si Bernike, dipatudu-tudu nasida do hasangaponna. Masuk ma nasida tu pengadilan i rap dohot akka komandan ni tentara, songon i nang akka halak na sangap di kota i. Dung i diparettahon si Festus ma asa diboan si Paulus. 24 Didok si Festus ma, “Ale Raja Agrippa dohot sude na pungu dison. Ida hamu ma, sude do halak Jahudi na di Jerusalem dohot na dison mangaluhon bawa on tu au. Jala marsuraki do nasida mandok tu au asa dipamate ibana.+ 25 Alai na huboto, dang adong diulahon ibana na jahat na mambahen ibana patut dipamate.+ Tikki dipangido ibana asa naik banding tu Kesar, hubahen ma keputusan asa diboan ibana tu Kesar. 26 Alai dang adong dope hatorangan taringot tu ibana na boi husurat tu Kesar.* Alani i do huboan ibana tu jolomuna, tarlumobi tu jolom, ale Raja Agrippa. Molo dung sae ibana dipareso di pengadilan on, adong ma na boi suratokku tu Kesar taringot tu ibana. 27 Ala huhilala, dang patut paborhaton sahalak tahanan molo dang jolo dipaboa akka hasalaanna.”