1 Raja-Raja
9 Dung sae dipajongjong si Salomo jabu ni Jahowa, istanana,+ dohot sude bangunan na dihalomohon rohana,+ 2 dipataridahon Jahowa ma muse dirina tu si Salomo songon tikki na di Gibeon i.+ 3 Didok Jahowa ma tu si Salomo, “Nungnga hubege be tangiang dohot pangidoan na pinaboam di jolokku. Jala nungnga hupabadia jabu na pinajongjongmon lao parohon sangap tu goarhu saleleng ni lelengna.+ Sai na parrohahonokku do i toktong.+ 4 Jala taringot tu ho, molo diulahon ho sude parettakku+ jala dioloi ho aturanku dohot patikku+ songon na binahen ni bapakmu si Daud,+ na mangoloi Au sian nasa rohana+ jala na tulus manomba Au,+ 5 bahenokku ma hot harajaonmu di Israel saleleng ni lelengna, songon naung hujanjihon tu bapakmu si Daud. Hudok do tu ibana, ‘Sian pinopparmu ma na toktong hundul di tahta ni harajaon ni Israel.’+ 6 Alai molo dang diihutton ho dohot pinopparmu Au, jala dang toktong diulahon hamu parettakku dohot aturanku, jala gabe disomba hamu debata na asing jala dioloi hamu i,+ 7 palaookku ma halak Israel sian tano naung hulehon tu nasida.+ Tinggalhonokku ma jabu naung hupabadia lao pasangappon goarhu.+ Jala bahenokku ma halak Israel gabe direhei* jala dileai di tonga-tonga ni sude bangso.+ 8 Jabu on pe gabe maruppak ma.+ Longang jala mangupir ma halak mangida i. Direhei nasida ma i* jala didok ma, ‘Boasa songon on dibahen Jahowa tu luat on dohot tu jabu on?’+ 9 Dung i dohonon ni nasida ma, ‘Ala ditadikkon nasida do Jahowa Debata ni nasida, i ma Debata na mamboan akka ompu ni nasida kaluar sian Mesir. Diihutton, dioloi, jala disomba nasida do akka debata na asing. Alani i ma diparo Jahowa sude hasusaan on tu nasida.’”+
10 Saleleng 20 taon ma si Salomo pajongjokkon dua bangunan, i ma jabu ni Jahowa dohot istanana.+ 11 Dilehon si Hiram+ raja ni Tirus do hau ares dohot hau juniper tu si Salomo, jala dilehon do godang mas songon na pinangido ni si Salomo.+ Alani i, dilehon si Salomo ma 20 kota na di luat Galilea tu si Hiram. 12 Borhat ma si Hiram sian Tirus lao mangida akka kota na nilehon ni si Salomo i, alai hurang pas do i di rohana. 13 Didok ibana ma, “Ai kota aha do poang na nilehonmon tu au dongan?” Alani i ma digoari inganan i Luat Kabul* sahat tu sadari on. 14 Dilehon si Hiram do tu raja i 120 talenta* mas.+
15 Disuru Raja Salomo ma akka halak karejo+ pajongjokkon jabu ni Jahowa,+ istanana, benteng na sian tano,*+ tembok Jerusalem, Hazor,+ Megiddo,+ dohot Gezer.+ 16 (Kota Gezer on ma na hea ditaluhon si Firaun raja ni Mesir. Ditutung ibana do kota i jala dipamate do akka halak Kanaan+ na tinggal disi. Kota on ma na dilehon ibana tu* boruna,+ tikki dipamuli ibana boruna i tu si Salomo.) 17 Dibangun si Salomo do muse Gezer, Bet-horon na di toru,+ 18 Baalat,+ Tamar na di gurun na adong di luat i, 19 sude kota panimpananna, akka kota panimpanan ni kareta hoda,+ akka kota inganan ni halak na mamboan hoda, jala sude na lao pajongjongonna di Jerusalem, di Libanon, dohot di sude luat na nirajaanna. 20 Taringot tu akka pinoppar ni halak Amori, halak Het, halak Perisi, halak Hevi, dohot halak Jebus+ na mangolu dope, i ma akka halak na so sian bangso Israel,+ 21 na so dipamate halak Israel, nasida ma na dibahen si Salomo gabe hatobanna sahat tu sadari on.+ 22 Alai dang adong halak Israel na dibahen si Salomo gabe hatoban.+ Dibahen do nasida gabe tentara, pegawai, pejabat, ajudan, dohot pamimpin ni tentara na markareta hoda dohot tentara na marhoda. 23 Adong do 550 halak pejabat daerah na dipillit si Salomo lao mangatur akka parkarejona.+
24 Pinda ma boru ni si Firaun+ sian Kota ni si Daud+ tu istana na dipajongjong si Salomo di ibana. Dung i dipajongjong si Salomo ma muse benteng na sian tano.*+
25 Tolu hali sataon+ dibahen si Salomo do pelean situtungon dohot pelean pardamean* di langgatan na dipajongjong ibana tu Jahowa.+ Asing ni i, ditutung ibana do muse pelean di langgatan ni Jahowa i, gabe nakkok ma timus sian langgatan i. Songon i ma dibahen si Salomo pasaehon jabu i.+
26 Dibahen si Salomo do muse akka kapal di Esion-geber+ na jonok tu Elot di topi ni Laut Merah, huta ni halak Edom.+ 27 Dikirim si Hiram do kapalna tu si Salomo.+ Jala disuru do akka parkarejona na malo markapal lao mangurupi akka parkarejo ni si Salomo. 28 Lao ma nasida tu Opir,+ dibuat ma sian i 420 talenta mas, jala diboan ma i tu Raja Salomo.