1 Kronika
15 Dipajongjong si Daud do akka jabu di ibana di Kota ni si Daud. Jala diparade ibana do inganan ni poti parpadanan ni Debata na sittong dohot kemah lao tu poti i.+ 2 Dung i didok si Daud ma, “Holan halak Lepi do na boi mamboan poti parpadanan ni Debata na sittong. Ai nungnga dipillit Jahowa nasida lao mamboan poti parpadanan ni Jahowa dohot marhobas tu Ibana saleleng ni lelengna.”+ 3 Dipapungu si Daud ma sude halak Israel di Jerusalem lao mamboan poti parpadanan ni Jahowa tu inganan naung diparade ibana.+
4 Dipapungu si Daud ma akka pinoppar ni si Aron+ dohot halak Lepi.+ 5 Sian pinoppar ni si Kohat, i ma si Uriel dohot 120 pinoppar ni si Kohat na asing. Si Uriel ma pamimpin ni nasida. 6 Sian pinoppar ni si Merari, i ma si Asaya+ dohot 220 pinoppar ni si Merari na asing. Si Asaya ma pamimpin ni nasida. 7 Sian pinoppar ni si Gersom, i ma si Joel+ dohot 130 pinoppar ni si Gersom na asing. Si Joel ma pamimpin ni nasida. 8 Sian pinoppar ni si Elisapan,+ i ma si Semaya dohot 200 pinoppar ni si Elisapan na asing. Si Semaya ma pamimpin ni nasida. 9 Sian pinoppar ni si Hebron, i ma si Eliel dohot 80 pinoppar ni si Hebron na asing. Si Eliel ma pamimpin ni nasida. 10 Sian pinoppar ni si Usiel,+ i ma si Aminadab dohot 112 pinoppar ni si Usiel na asing. Si Aminadab ma pamimpin ni nasida. 11 Dung i dijou si Daud ma Malim Sadok+ dohot Malim Abiatar.+ Dijou ibana ma muse akka halak Lepi, i ma si Uriel, si Asaya, si Joel, si Semaya, si Eliel, dohot si Aminadab. 12 Didok si Daud ma tu nasida, “Hamu do akka pamimpin ni halak Lepi na saompu. Pabadia hamu ma dirimuna. Jala pabadia hamu ma halak na rap dohot hamu. Dung i boan hamu ma poti parpadanan ni Jahowa Debata ni Israel tu inganan naung huparade. 13 Dang hamu na mamboan poti parpadanan i tikki parjolo sahali i diboan.+ Alani i ma muruk Jahowa Debatanta tu hita.+ Ai dang jolo tasukkun songon dia cara na sittong mamboan poti parpadanan i.”+ 14 Alani i, dipabadia akka malim dohot halak Lepi ma diri ni nasida, asa boi nasida mamboan poti parpadanan ni Jahowa Debata ni Israel.
15 Diangkat halak Lepi ma hau pangusung ni poti parpadanan ni Debata na sittong i.+ Jala dibahen nasida ma i tu pundak ni nasida songon na nidok ni Jahowa marhite si Musa. 16 Disuru si Daud ma akka pamimpin ni halak Lepi mamillit akka parende. Dipillit ma muse akka parmusik na mangiringi nasida marende. Boi do nasida mamakke alat musik na martali, harpa,+ dohot simbal.*+ Jala ikkon las do roha ni nasida tikki na marende i.
17 Dung i, dipillit halak Lepi ma si Heman+ anak ni si Joel, si Asap+ anak ni si Berekia, dohot si Etan+ anak ni si Kusaria. Pinoppar ni si Merari do nasida. 18 Dipillit do muse halak Lepi na sian punguan na paduahon,+ i ma si Sakaria, si Ben, si Jaasiel, si Semiramot, si Jehiel, si Uni, si Eliab, si Benaya, si Maaseya, si Matitia, si Elipelen, dohot si Mikneya. Dipillit do muse si Obed-edom dohot si Jeiel akka panjaga ni gerbang i. 19 Si Heman ma parendena,+ si Asap+ dohot si Etan ma na mamakke simbal+ na sian tombaga. 20 Na mamakke alat musik na martali na dibahen tu nada na timbo,*+ i ma si Sakaria, si Asiel, si Semiramot, si Jehiel, si Uni, si Eliab, si Maaseya, dohot si Benaya. 21 Na mamakke harpa na dibahen tu nada rendah,*+ i ma si Matitia,+ si Elipelen, si Mikneya, si Obed-edom, si Jeiel, dohot si Asasia. Nasida ma na mamimpin akka parende. 22 Si Hanania+ ma na martanggung jawab mamboan poti parpadanan. Ai malo do ibana mangulahon i. Ibana do muse pamimpin ni halak Lepi. 23 Si Berekia dohot si Elkana do na manjaga poti parpadanan i. 24 Akka malim na martarompet di jolo ni poti parpadanan ni Debata na sittong,+ i ma si Sebania, si Josapat, si Netaneel, si Amasai, si Sakaria, si Benaya, dohot si Elieser. Ikkon gogo do soara ni tarompet ni nasida. Dohot do muse si Obed-edom dohot si Jehia manjaga poti parpadanan i.
25 Dung i, mardalan ma si Daud, akka pangituai* ni Israel, dohot akka pamimpin ni na sasaribu mangihutton akka halak na mamboan poti parpadanan ni Jahowa. Diboan nasida do i sian jabu ni si Obed-edom+ jala marlas ni roha do nasida mamboan i.+ 26 Diurupi Debata na sittong do halak Lepi mamboan poti parpadanan ni Jahowa i. Alani i, dipelehon halak Lepi ma pitu lombu jantan dohot pitu biru-biru jantan.+ 27 Dipakke si Daud do rompi na ganjang na sian kain na halus. Songon i ma nang halak Lepi na mamboan poti parpadanan, akka parende, dohot si Hanania. Si Hanania do na martanggung jawab mamboan poti parpadanan jala na mamimpin akka parende. Dipakke si Daud do muse baju epod na sian linen.+ 28 Dohot do sude halak Israel mamboan poti parpadanan ni Jahowa i. Tikki na mardalan i nasida, adong do na marsuraki alani las ni rohana.+ Jala adong do na martarompet,+ na marsimbal, na marharpa, na mamakke alat musik na martali,+ dohot na mamakke tarompet na sian tanduk.
29 Sahat ma poti parpadanan ni Jahowa di Kota ni si Daud.+ Dibahen Raja Daud ma pesta jala marinjaki ma ibana. Diida si Mikhal boru ni si Saul+ ma i sian jandela. Gabe leas ma rohana mangida si Daud.+