5 Musa

15 “Di ganup ujung ni taon na papituhon, ikkon sesaonmuna* do utang ni halak na marutang tu hamu.+ 2 Songon on ma carana: Ikkon sesaon ni halak na papinjappon hepeng i do sisa ni utang ni na marutang tu ibana. Dang boi be jaloonna utang ni na marutang i manang utang ni donganna sabangso. Ai nungnga diumumhon be haluaon na sian Jahowa.+ 3 Boi do jaloonmuna utang ni halak na sian bangso na asing.+ Alai dang boi jaloonmuna utang ni donganmuna sabangso. 4 Alai nang pe songon i, dang na lao gabe pogos hamu. Ai pasu-pasuon ni Jahowa do hamu+ di luat na lao lehonon ni Jahowa Debatamuna i gabe appunamuna. 5 Alai ikkon marsitutu do hamu mangoloi hata ni Jahowa Debatamuna, dohot sude paretta na hupaboa tu hamu sadari on.+ 6 Ai Jahowa Debatamuna i do na lao mamasu-masu hamu dos songon janjina tu hamu. Hamu do na mangalehon pinjaman* tu godang bangso. Alai hamu dang porlu maminjam sian manang ise pe.+ Hamu do na lao mangarajai godang bangso. Alai dang adong bangso na lao mangarajai hamu.+

7 “Molo adong donganmuna sabangso, na gabe pogos di sada sian kota na dilehon Jahowa Debatamuna i, unang pajogal hamu rohamuna manang holit hamu tu donganmuna na pogos i.+ 8 Ikkon patuduonmuna do na asi rohamuna* tu ibana. + Lehon ma ibana maminjam* manang aha pe na porlu di ibana manang na hurang di ibana. 9 Manat ma hamu, unang adong sakkap na jahat di rohamuna ala didok rohamuna, ‘Satokkin nai nama taon na papituhon, i ma taon haluaon i.’+ Gabe dang asi rohamuna tu donganmuna na pogos i jala dang dilehon hamu manang aha tu ibana. Molo mangalu-alu ibana tu Jahowa alani hamu, gabe mardosa ma hamu.+ 10 Ikkon patuduonmuna do na asi rohamuna tu ibana.+ Unang borat rohamuna mangalehon i. Ai alani i do umbahen na dipasu-pasu Jahowa Debatamuna sude ulaonmuna dohot halojaonmuna.+ 11 Ai toktong do adong halak na pogos di luatmuna.+ Alani i do hupaboa paretta on tu hamu, ‘Ikkon patuduonmuna do na asi rohamuna tu donganmuna na susa dohot na pogos di luatmuna.’+

12 “Molo adong dijual tu hamu bawa manang borua halak Heber, i ma donganmuna sabangso, jala nungnga gabe hatobanmuna ibana saleleng onom taon, ikkon paluaonmuna do ibana di taon na papituhon.+ 13 Tikki dipalua hamu ibana, unang pasombu hamu ibana lao dang mamboan manang aha. 14 Unang holit hamu tu ibana. Lehon ma binatang na dipiaro hamu tu ibana, akka hasil na sian inganan pardegean, hasil na sian inganan pamoroan ni miak, dohot hasil na sian inganan pamoroan ni anggurmuna. Lehon ma i tu ibana dos songon pasu-pasu na dilehon Jahowa Debatamuna tu hamu. 15 Ingot hamu ma, najolo gabe hatoban do hamu di Mesir. Jala Jahowa Debatamuna i do na manobus hamu sian i. Alani i do huparettahon hamu sadari on lao mangulahon i.

16 “Alai molo lomo do rohana toktong rap tinggal dohot hamu, ala holong rohana tu hamu dohot tu keluargamuna, jala sonang rohana tikki rap tinggal dohot hamu,+ 17 boan ma ibana tu jolo ni pintu jala tusuk ma pinggolna. Dung i gabe hatobanmuna ma ibana saleleng ni ngoluna. Songon i ma muse bahen tu hatobanmuna borua. 18 Unang ma rugi dihilala hamu molo dipalua hamu ibana jala ditinggalhon ibana hamu. Ai ulaonna saleleng onom taon i, dos do i tu dua hali loppit ulaon ni sahalak parkarejo na digaji. Jala nungnga dipasu-pasu Jahowa Debatamuna sude na niulamuna.

19 “Ikkon papulikonmuna* do sude lombu jantan, biru-biru jantan, dohot hambing jantan na parjolo tubu. Papulik ma i tu Jahowa Debatamuna.+ Dang boi hamu karejo mamakke lombu jantan na parjolo tubu, manang manggusting ibbulu ni biru-biru na parjolo tubu. 20 Ganup taon ikkon allangonmuna do jagalna i di jolo ni Jahowa Debatamuna di inganan na pinillit ni Jahowa.+ Allang hamu ma i rap dohot keluargamuna. 21 Alai molo adong do cacat ni binatang i, lumpu, buta, manang adong cacat na asing na parah, unang pelehon binatang i tu Jahowa Debatamuna.+ 22 Allang ma i di akka kotamuna.* Halak na ramun* dohot na so ramun pe boi do mangallang i, dos songon tikki hamu mangallang jagal ni kijang manang rusa.+ 23 Alai unang allang hamu mudarna,+ ikkon diusehon hamu do i tu tano songon aek.+