Hesekiel

12 Dung i didok Jahowa ma muse tu au, 2 “Ale anak ni jolma, di tonga-tonga ni bangso pangalo do ho tinggal. Adong do mata ni nasida lao marnida, alai dang marnida nasida. Adong do pinggol ni nasida lao mambege, alai dang marbinege nasida.+ Ai bangso pangalo do nasida.+ 3 Alai anggo ho anak ni jolma, bukkusi ma akka barangmu dos songon na dibahen halak na naeng diboan musu tu luatna. Lao ma ho di tikki arian, di tikki diida halak ho. Lao ma ho songon halak na diboan tu luat ni musu. Lao ma ho sian jabum tu inganan na asing tikki diida nasida ho. Atik boha gabe dipikkiri nasida lapatan ni na diulahonmi, nang pe nasida bangso pangalo. 4 Di tikki arian, tikki diparrohahon nasida ho, boan ma akka barang-barang na dibukkusmi tu luar, dos songon halak na naeng diboan musu. Jala tikki borngin, tikki diida nasida ho, lao ma ho songon halak na lao diboan musu.+

5 “Tikki diida nasida ho, lubangi ma tembok ni jabum, jala kaluar ma ho mamboan akka barangmi sian lubang i.+ 6 Tikki diida nasida ho, bahen ma akka barangmi tu pundakmu. Boan ma i kaluar di tikki golap. Tutup ma bohim asa unang diida ho tano. Ai nungnga hubahen ho gabe tanda tu halak Israel.”+

7 Huulahon ma dos songon na diparettahon i tu au. Di tikki arian huboan ma kaluar akka barang i dos songon halak na naeng diboan musu. Di tikki botari, hulubangi ma tembok i mamakke tanganku. Jala dung golap ari, huboan ma kaluar akka barangki di pundakku di jolo ni nasida.

8 Manogotna i, didok Jahowa ma muse tu au, 9 “Ale anak ni jolma, disukkun halak Israel i do songon on tu ho kan, ‘Ai na marhua do ho?’ 10 Dok ma tu nasida, ‘Songon on ma hata ni Jahowa Tuan Natumimbul i, “Songon on ma hata na ikkon dipaboa tu pamimpin+ na di Jerusalem dohot sude halak Israel na di kota i.”’

11 “Dokkon ma naung gabe tanda ho di nasida.+ Songon dia naung dibahen ho, songon i ma na lao dibahen tu nasida. Ai diboan nama nasida tu luat ni musu.+ 12 Boanon ni pamimpin na di tonga-tonga ni nasida ma akka barangna di pundakna. Borhat ma ibana di tikki golap. Dilubangi ibana ma tembok ni jabuna, jala kaluar ma ibana mamboan akka barangna sian i.+ Ditutupi ibana ma bohina asa unang diida ibana tano. 13 Husappatton ma jaring lao manakkup ibana. Jala masuk ma ibana tu jaring i.+ Dung i huboan ma ibana tu Babel, tu luat ni halak Kasdim. Alai dang diida ibana i, jala laos disi ma ibana mate.+ 14 Bahenokku ma marserak sude na adong di sakalilingna, akka na mangurupi ibana dohot akka tentarana. Bahenokku ma nasida marserak tu sude inganan.*+ Pakaluarokku ma podang lao mangalele nasida.+ 15 Tikki hubahen nasida marserak tu tonga-tonga ni akka bangso, tu tonga-tonga ni akka luat, botoon ni nasida ma na Au do Jahowa. 16 Alai pasombuonku do malua piga-piga halak sian podang, sian haraparon, dohot sian sahit. Marhite songon i, manang tudia pe nasida lao, boi ma paboaon ni nasida akka ulaon ni nasida na mambahen Au magigi. Jala botoon ni nasida ma na Au do Jahowa.”

17 Didok Jahowa ma muse tu au, 18 “Ale anak ni jolma, ikkon makkahitir do ho alani biarmu di tikki mangan. Jala huhut ma ho marsak dohot busisaon di tikki minum.+ 19 Dokkon ma tu akka halak na di luat i, ‘Songon on ma hata ni Jahowa Tuan Natumimbul i tu penduduk ni Jerusalem na di luat ni Israel, “Mangallang roti do nasida huhut holsoan, jala minum do nasida mardongan biar. Ai nungnga tarulang situtu luat ni nasida+ alani sude hajahaton na diulahon akka halak na tinggal di luat i.+ 20 Hancur ma sude kota naung diingani, jala tarulang ma tano na di luat i.+ Botoonmuna ma na Au do Jahowa.”’”+

21 Didok Jahowa ma muse tu au, 22 “Ale anak ni jolma, adong do uppasa ni halak Israel na mandok, ‘Nungnga salpu akka ari, alai dang adong dope na saut akka parnidaan na dipaboa i.’+ 23 Alani i dokkon ma tu nasida, ‘Songon on do hata ni Jahowa Tuan Natumimbul i, “Huhapus nama uppasa i sian Israel. Jala dang dohonon ni nasida be i disi.”’ Alai dokkon ma tu nasida, ‘Nungnga jonok be akka ari i+ jala saut nama sude akka parnidaan i.’ 24 Ai dang na lao adong be parnidaan na so sittong manang ramalan na mangoto-otoi di tonga-tonga ni Israel.+ 25 ‘“Ai Au do Jahowa, Au sandiri do na lao makkatai. Manang aha pe na hudok, ikkon saut do i.+ Jala dang na lao sundat i.+ Ale bangso pangalo, di tikkimuna do dokkonokku hatakku jala pasautokku do i,” ninna Jahowa Tuan Natumimbul i.’”

26 Didok Jahowa ma muse tu au, 27 “Ale anak ni jolma, songon on do hata ni halak Israel, ‘Parnidaan na niidana i, leleng nai dope i masa. Jala taringot tu ari na naeng ro do na pinaboana i. Leleng nai dope i masa.’+ 28 Alani i, dokkon ma tu nasida, ‘Songon on do hata ni Jahowa Tuan Natumimbul i, “‘Dang adong sian hatakki na lao sundat. Manang aha pe na hudok, ikkon masa do i,’ ninna Jahowa Tuan Natumimbul i.”’”