Hesekiel

14 Dung i ro ma piga-piga pangituai* ni Israel jala hundul di jolokku.+ 2 Didok Jahowa ma muse tu au, 3 “Ale anak ni jolma, marsitutu do akka halak on manomba patung ni nasida na mambahen Au magigi.* Dibahen nasida do akka halak tartuktuk jala mangulahon dosa. Alani i, tama dope Au mangalusi sukkun-sukkun ni nasida?+ 4 Saonari dokkon ma tu nasida, ‘Songon on do hata ni Jahowa Tuan Natumimbul i, “Molo adong halak Israel na marsitutu manomba patung ni nasida na huhagigihon i, mambahen halak na asing tartuktuk jala mangulahon dosa, dung i ro ibana mangido tudu-tudu tu panurirang,* Au do Jahowa, Au sandiri ma na mangalusi ibana. Alusakku ma ibana hombar tu sadia godang patung na disomba ibana. 5 Bahenokku ma mabiar halak Israel. Ai nungnga mandao nasida sian Au jala diihutton nasida do pangidoan ni akka patung ni nasida na huhagigihon i.”’+

6 “Alani i, dokkon ma tu halak Israel, ‘Songon on do hata ni Jahowa Tuan Natumimbul i, “Mulak ma hamu jala tinggalhon hamu ma akka patungmuna na huhagigihon i. Unang be ulahon hamu sude ulaonmuna na huhagigihon i.+ 7 Ai molo adong halak Israel manang penduduk na sian bangso na asing di Israel manadikkon Au, jala marsitutu ibana manomba patung na huhagigihon i, dibahen ibana halak na asing tartuktuk jala mangulahon dosa, jala ro ibana mangido tudu-tudu tu panurirangku,+ Au do Jahowa, Au sandiri ma na mangalusi ibana. 8 Alookku do halak sisongon i. Bahenokku ma na masa tu ibana gabe sipasingot tu halak na asing. Jala bahenon ni halak ma ibana gabe tudosan. Pamateonku ma ibana sian tonga-tonga ni bangsokki.+ Sian i botoonmuna ma na Au do Jahowa.”’

9 “‘Alai molo hona tipu do panurirang i, jala gabe dialusi panurirang i ibana, Au do Jahowa, Au sandiri do na manipu panurirang i.+ Angkatokku ma tanganku jala pamateonku ma ibana sian tonga-tonga ni Israel bangsokki. 10 Ikkon martanggung jawab do halak Israel tu hasalaan ni nasida. Ai sarupa do hasalaan ni halak na mangido tudu-tudu i tu hasalaan ni halak na gabe panurirang i. 11 Alani i, dang manirpang be halak Israel sian Au. Jala gabe dang ramun* be diri ni nasida alani dosa ni nasida. Gabe bangsokku ma nasida jala Au ma na gabe Debata ni nasida,’+ ninna Jahowa Tuan Natumimbul i.”

12 Alani i, didok Jahowa ma muse tu au, 13 “Ale anak ni jolma, molo adong sada bangso di sada luat, mardosa ala dang setia nasida tu Au, angkatokku ma tanganku mangalo nasida. Jala hancurhonokku ma inganan panimpanan* ni sipanganon ni nasida.+ Parookku ma haraparon+ jala pamateonku ma jolma nang binatang na adong di luat i.”+ 14 “‘Autsugari maringanan disi si Noak,+ si Daniel,+ dohot si Job,+ holan diri ni nasida sandiri do na boi dipalua nasida. Ai mangulahon na sittong do nasida,’+ ninna Jahowa Tuan Natumimbul i.”

15 “‘Manang autsugari huparo binatang buas na ganas mardalan makkalilingi luat i, jala dipamate sude halak na di luat i, gabe tarulang ma luat i. Jala dang adong be na lewat sian i alani binatang buas i.+ 16 Songon pastina Au Debata na mangolu,’* ninna Jahowa Tuan Natumimbul i, ‘nang pe maringanan halak na tolu i disi, dang boi paluaon ni nasida anak ni nasida manang boru ni nasida. Holan diri ni nasida do na boi dipalua nasida jala gabe tarulang ma luat i.’”

17 “‘Manang autsugari huparo podang tu luat i,+ jala hudok, “Lok ma mate sude halak na di luat i dibahen podang,” pamateonku ma sude jolma dohot akka binatang na disi.+ 18 Songon pastina Au Debata na mangolu,’ ninna Jahowa Tuan Natumimbul i, ‘nang pe maringanan halak na tolu i disi, dang boi paluaon ni nasida nanggo anak ni nasida manang boru ni nasida. Holan diri ni nasida do na boi dipalua nasida.’”

19 “‘Manang autsugari huparo sahit tu luat i+ jala huusehon rimashu tusi, gabe use mudar ni godang halak dohot akka binatang na di luat i jala ujungna gabe mate nasida, 20 songon pastina Au Debata na mangolu,’ ninna Jahowa Tuan Natumimbul i, ‘nang pe maringanan si Noak,+ si Daniel,+ dohot si Job+ disi, dang boi paluaon ni nasida nanggo anakkonna manang boru ni nasida. Holan diri ni nasida do na boi dipalua nasida. Ai mangulahon na sittong do nasida.’”+

21 “Ai songon on do hata ni Jahowa Tuan Natumimbul i, ‘Songon i ma na masa molo huparo opat hukuman tu Jerusalem.+ Molo huparo podang, haraparon, binatang buas na ganas, dohot sahit na masa di godang inganan+ lao pamatehon jolma dohot binatang na di luat i.+ 22 Alai selamat do piga-piga halak sian luat i jala kaluar sian i.+ Dohot ma i anak ni nasida dohot boru ni nasida. Ro ma nasida tu hamu jala tikki diida hamu pangalaho dohot pambahenan ni nasida, diattusi hamu ma boasa huparo hukuman tu Jerusalem. Jala boasa huulahon sudena i.’”

23 “‘Molo diida hamu pangalaho dohot pambahenan ni nasida, diattusi hamu ma boasa masa i. Botoonmuna ma dang na so adong alana umbahen na huulahon sudena i tu nasida,’+ ninna Jahowa Tuan Natumimbul i.”