Jeremia
17 “Nungnga disurat be dosa ni Juda mamakke pulpen na sian bosi.
Sian intan do mata ni pulpen* i, diukir ma dosa i di roha ni nasida
Dohot di akka tanduk na di langgatan ni nasida.
2 Haru akka anak ni nasida pe, diingot do akka langgatan dohot tiang sisombaon* ni nasida,+
Na adong di labbung ni akka hau na balga di pussu ni dolok-dolok,+
3 Dohot di akka dolok na dao sian kota.
Lehonokku ma hamoraon dohot sude artamuna i dibuat musu,+
Songon i nang akka inganan panombaonmuna* alani dosa na diulahon hamu di sude luat i.+
4 Alani pangalahomuna sandiri, mago ma sian hamu tano naung hulehon lao gabe parbagiananmuna.+
Bahenokku ma hamu gabe hatoban ni akka musumuna di luat na so ditanda hamu,+
Ai dibahen hamu do Au tarrimas dos songon api na marsigorgor,*
Na torus marsigorgor sahat tu saleleng ni lelengna.”+
5 Songon on ma hata ni Jahowa:
6 Dos songon sada hau na tubu di gurun ma ibana.
Molo adong na denggan dang boi idaonna,
Jala tubu di gurun do ibana di inganan na harsang,
Di tano na assim na so diingani manang ise pe.
8 Tudos do ibana songon hau na disuan di labbung ni aek,
Manjalar do uratna sahat tu sunge.
Tikki ro logo ni ari dang dihilala ibana na mohop,
Jala torus do lomak akka bulungna.+
Di tikki ro logo ni ari, dang marsak ibana,
Torus do ibana marparbue.
9 Massai akkal situtu do roha i, jala dang adong na songon i, sai naeng lomona do pasautonna.+
Ise ma na umboto roha ni jolma?
10 Au Jahowa, Au do na mamareso roha* ni jolma,+
Hupareso do pikkiran ni jolma na buni
Asa hubalos tu ganup jolma hombar tu pangalahona,
Jala hombar tu pambahenanna.+
11 Dos songon pidong liar* na mamodoppon tolor na so appunana,
Songon i ma halak na mandapot hamoraon marhite dalan na so sittong.*+
Dang matua dope ibana, nungnga mago sude hamoraonna i.
Ujungna takkas ma tarida na oto do ibana.”
12 Tahta ni Debata na mulia, naung dipasangap sian mulana,
Inganan na badia do i di hita.+
13 Ale Jahowa, tu Ho do halak Israel marhaposan, pailaonmu ma sude halak na manadikkon Ho.
Dos songon goar na disurat di atas ni tano.
Ai ditadikkon nasida do Jahowa, mual ni aek hangoluan.+
14 Ale Jahowa, molo dipamalum Ho au, pasti malum do au.+
Molo diselamatton Ho au, pasti selamat do au.
Ai holan Ho do na hupuji.
15 Ida ma! Adong do halak na mandok tu au,
“Boasa dang saut dope hata ni Jahowa i?+
Sai anggiat ma nian saut i saonari!”
16 Alai ianggo au, dang lao au manang na tudia, torus do au gabe parmahan na mangihutton Ho,
Dang hupaima-ima ari hasusaan i.
Ai takkas do diboto Ho sude na dihatahon ni pamangankon,
Masa do sudena i di jolom!
17 Unang ma bahen au mabiar.
Ai Ho do inganakku marlinggom tikki ro ari hasusaan.
18 Bahen ma marlea akka halak na kejam tu au,+
Unang ma pasombu au dibahen marlea.
Bahen ma nasida mabiar,
Alai unang pasombu au mabiar.
Paro ma ari hasusaan i tu nasida,+
Ropukkon jala hancurhon ma nasida sude.
19 Songon on ma hata ni Jahowa tu au, “Jongjong ma ho di gerbang ni halak Israel na dipakke akka raja ni Juda lao masuk dohot lao kaluar sian kota i. Dung i jongjong ma ho muse di sude gerbang ni Jerusalem.+ 20 Dokkon ma tu nasida, ‘Tangihon ma hata ni Jahowa, hamu akka raja ni Juda, sude halak Juda, dohot sude penduduk ni Jerusalem na masuk sian gerbang on. 21 Songon on ma hata ni Jahowa, parrohahon hamu ma hata on, “Molo adong barang na ikkon boanonmuna lewat sian gerbang ni Jerusalem, dang boi boanonmuna i lewat sian gerbang i di tikki ari Sabat.+ 22 Dang boi boanonmuna kaluar manang barang aha pe sian jabumuna di tikki ari Sabat, jala dang boi hamu karejo di ari i.+ Ikkon badia do di hamu ari Sabat i, dos songon naung huparettahon tu akka ompumuna.+ 23 Alai dang olo nasida manangihon manang mamparrohahon hata i. Takkang* do nasida, dang olo nasida mangoloi Au jala dang olo nasida manjalo sipasingot.”’+
24 “‘Didok Jahowa ma, “Alai molo torus do dioloi hamu Au, jala dang diboan hamu masuk akka barang sian gerbang ni kota on di ari Sabat, dipabadia hamu ari Sabat i marhite dang karejo di ari i,+ 25 na lao masuk ma raja dohot akka pejabatna na hundul di tahta ni si Daud+ sian gerbang ni kota on. Masuk ma nasida mamakke kareta hoda jala nakkok di atas ni hoda. Masuk ma nasida rap dohot akka pejabatna, halak Juda, dohot penduduk ni Jerusalem+ jala diingani ma kota on saleleng ni lelengna. 26 Marroan ma akka halak sian kota na di Juda, sian inganan na di sakaliling ni Jerusalem, sian luat ni marga Benjamin,+ sian huta na di rura,+ sian huta na di dolok, dohot sian Negeb.* Ro ma nasida mamboan pelean situtungon,+ pelean sipanganon,*+ haminjon,* pelean hamauliateon, dohot akka pelean na asing+ tu jabu ni Jahowa.+
27 “‘“Alai molo dang dioloi hamu parettakku lao pabadiahon ari Sabat i, molo diboan hamu do akka barang sian gerbang na di Jerusalem di ari Sabat, tutungokku ma akka gerbangna i. Rarat ma apina i manutung akka menara ni Jerusalem na marbenteng i,+ jala dang adong na boi pamatehon apina i.”’”+