Jeremia

33 Tikki dihurung dope si Jeremia di penjara na di Alaman ni Panjaga,+ makkatai ma muse Jahowa tu ibana. Didok ma, 2 “Songon on ma didok Jahowa Sitoppa tano on, Jahowa na membentuk jala na pajongjokkon togu tano on, Jahowa do goarna, 3 ‘Jou ma Au, alusakku do ho jala rade do Au paboahon akka na palongang roha, na so boi diattusi ho, jala na so hea dope diboto ho.’”+

4 “Nungnga dipaboa Jahowa Debata ni Israel aha na lao masa tu akka jabu na di kota on dohot taringot tu istana ni akka raja ni Juda. Nungnga diruppakkon be i asa boi nasida martahan mangadopi podang ni musu dohot tembok na dibangun musu i.+ 5 Dipaboa Ibana do muse taringot tu akka halak na lao ro marporang mangalo halak Kasdim. Jala dipaboa Ibana do muse taringot tu kota na lao digohi Ibana dohot bakke ni akka halak na hona bunu di tikki na muruk situtu Ibana. Nungnga ditadikkon Ibana kota on alani hajahaton ni akka jolma i. 6 Didok Ibana do, ‘Pamalumokku ma kota on jala bahenokku ma i sehat muse.+ Pamalumokku ma nasida jala lehonokku ma gok hadameon dohot hasonangan.+ 7 Boanokku ma mulak halak Juda dohot halak Israel na diboan musu i.+ Jala hulehon ma muse gok pasu-pasu tu nasida dos songon na huulahon najolo.+ 8 Paiasokku ma nasida sian sude hasalaan, ala nungnga mangulahon dosa nasida tu Au.+ Jala sesaokku ma sude dosa dohot hasalaan na diulahon nasida tu Au.+ 9 Parohon las ni roha ma tu Au goar ni kota on. Gabe dipuji ma Au alani kota on jala gabe lam uli ma Au di tonga-tonga ni akka bangso, na mambege akka na denggan na hubahen tu bangsokki.+ Mabiar do sude bangso jala hitir-hitir+ alani akka na denggan na hubahen dohot alani hadameon na huparo tu kota i.’”+

10 “Songon on do hata ni Jahowa, ‘Inganan na harsang do didok hamu luat on. Dang diingani jolma manang binatang. Jala akka kota na di Juda dohot akka dalan na di Jerusalem nungnga tarulang. Dang adong jolma, manang penduduk, manang binatang disi. Alai na lao tarbege ma muse di akka inganan i 11 soara ni na marlas ni roha dohot soara ni na marsonang-sonang,+ soara ni pengantin bawa dohot soara ni pengantin borua. Dohot soara ni halak na mandok, “Mandok mauliate ma tu Jahowa, ai na burju do Jahowa.+ Toktong do dipatudu Ibana holong ni rohana* sahat tu saleleng ni lelengna!”’+

“‘Boanon ni nasida ma pelean hamauliateon tu jabu ni Jahowa.+ Ai nungnga huboan nasida sian luat ni musu, jala hubahen do muse nasida songon na parjolo i,’ ninna Jahowa.”

12 “Songon on ma hata ni Jahowa Pamimpin ni Akka Tentara,* ‘Bahenokku ma inganan panjappalan di inganan na harsang on, di inganan na so diingani jolma dohot binatang, dohot di sude kotana, asa diboan akka parmahan tusi biru-biruna.’+

13 “‘Di akka kota na di dolok, di akka kota na di rura, di akka kota na di sabola selatan, di akka inganan na di luat ni marga Benjamin, di akka inganan na di sakaliling ni Jerusalem,+ dohot di akka kota ni halak Juda,+ na lao adong ma muse akka parmahan na mangetong biru-biruna,’ ninna Jahowa.”

14 “Ninna Jahowa ma, ‘Na lao ro ma tikkina, pasautokku ma akka na denggan na hujanjihon taringot halak Israel dohot halak Juda.+ 15 Di tikki i, bahenokku ma sahalak na tigor marroha sian pinoppar ni si Daud*+ mandalatton hukum na tigor dohot na sittong di luat i.+ 16 Di ari i paluaokku ma Juda+ jala aman ma penduduk ni Jerusalem tinggal.+ Jala digoari ma kota i: Jahowa Mual ni Hatigoran.’”+

17 “Ai songon on do hata ni Jahowa, ‘Na lao toktong do adong sahalak sian pinoppar ni si Daud na hundul di tahta ni Israel.+ 18 Jala na lao toktong do adong pinoppar ni si Lepi lao gabe malim di jolokku. Lao mangalehon pelean situtungon, manutung pelean sipanganon,* jala mangalehon pelean na asing.’”

19 Dung i makkatai ma muse Jahowa tu si Jeremia, 20 “Songon on ma hata ni Jahowa, ‘Adong do parjanjiakku tu arian dohot tu borngin asa boi masa di tikkina be arian dohot borngin i. Autsugari ma boi disundati hamu parjanjian i,+ 21 baru pe boi disundati hamu parjanjian na hubahen tu naposokku si Daud,+ asa unang adong sian anakna na boi mamaretta gabe raja di tahtana.+ Suang songon i ma nang tu parjanjian na hubahen dohot akka malim halak Lepi na marhobas di jolokku.+ 22 Dos songon godang ni sude akka na di langit na so taretong godangna jala songon pasir di laut na so boi ditakkari, songon i ma bahenokku godang ni pinoppar ni si Daud naposokki dohot halak Lepi na marhobas di jolokku.’”

23 Makkatai ma muse Jahowa tu si Jeremia. Didok ma, 24 “Na so hea do dibege hamu hata na mandok, ‘Dang dijalo Jahowa be dua keluarga naung pinillitna i’? Leas do roha ni nasida mangida bangsokki. Jala dang sada bangso be di nasida akka naposokki.

25 “Songon on ma hata ni Jahowa, ‘Dos songon parjanjian naung hutottuhon tu arian dohot borngin,+ jala dos songon aturan taringot tu langit dohot tano on+ na so boi disundati, 26 songon i ma bahenokku tu akka pinoppar ni si Jakkob dohot tu pinoppar ni si Daud naposokki. Pasti jalookku do nasida jala sian pinopparna do bahenokku lao mamaretta pinoppar ni si Abraham, si Isak, dohot si Jakkob. Ai na lao papunguokku nama muse nasida sian luat ni musu,+ jala asi nama rohakku tu nasida.’”+