Parjamita

6 Adong muse huida na asing na mambahen marsak* di tano on, on ma na jotjot masa tu jolma: 2 Dilehon Debata na sittong do tu jolma hamoraon, arta, dohot hasangapon, asa dapotna sude lomo ni rohana. Alai dang diloas Debata na sittong i sonang roha ni jolma alani i sude. Gabe halak na asing do na mandapot i jala na makkilala las ni roha. Alai dang marlapatan on sude jala mambahen marsak. 3 Didok rohakku, nang pe adong saratus gelleng ni sahalak bawa jala ganjang umurna, hape dang hea dihilala ibana las ni roha sahat tu na mate, undangol ma ibana sian poso-poso na mate tikki ditubuhon.+ 4 Dang marguna poso-poso i ditubuhon, lao do ibana tu na holom. Jala buni do goarna di na holom. 5 Dang hea diida poso-poso i mataniari jala dang diboto agia aha, alai nang pe songon i ussonang do ibana sian bawa i.+ 6 Aha ma gunana molo mangolu sasahalak 2.000 taon alai dang hea dihilala na sonang? Ai ujungna, tu inganan na sarupa do sude jolma lao.+

7 Loja pe jolma karejo, asa adong do allangonna.+ Alai dang marna puas nasida. 8 Ai dang dumenggan halak na marbisuk sian halak na oto.+ Attong aha ma labana diboto halak na pogos songon dia asa toktong mangolu? 9 Tumagon do las roha alani na adong di jolo niba sian apala mangalului na so adong. On pe dang marlapatan, dos do i songon na manakkup alogo.

10 Sude naung adong i, nungnga adong hian goarna. Jala sude do mamboto, dang tolap jolma mangalo* na umgogo sian ibana. 11 Lam godang hata,* lam so adong do gunana. Aha ma laba ni i di jolma? 12 Jeppek do ngolu ni jolma jala dang marlapatan i dos songon bayangan. Attong ise ma na mamboto aha na dumenggan ulahonon ni jolma saleleng ni ngoluna?+ Ai dang adong na boi paboahon tu ibana aha na masa di tano on molo dung mate ibana.