Jeremia

43 Disuru Jahowa ma si Jeremia pasahatton hatana tu sude rakyat i. Dung sae si Jeremia paboahon sude na diparettahon Jahowa Debata ni nasida i, 2 ro ma si Azaria anak ni si Hosaya, si Johanan+ anak ni si Karea, dohot sude akka halak na ginjang rohana mandapotton ibana. Didok nasida ma, “Na margabus do ho! Dang adong disuru Jahowa Debatanta i ho lao mangorai hami asa unang lao tu Mesir jala tinggal disi. 3 Alai na dijujui si Baruk+ anak ni si Neria i do ho lao mandok songon i tu hami. Ai lomo do rohana mangida hami dipasahat tu halak Kasdim, asa dipamate jala diboan tu Babel.”+

4 Alani i, dang dioloi si Johanan anak ni si Karea hata ni Jahowa, songon i do nang sude pamimpin ni akka tentara, dohot sude rakyat i. Dang olo nasida toktong tinggal di luat ni halak Juda. 5 Gariada, diboan si Johanan anak ni si Karea dohot sude pamimpin ni akka tentara i do sude halak Juda na tinggal i dope. Dohot ma i akka halak naung mulak sian luat ni bangso na asing, i ma inganan ni nasida marserak i.+ 6 Diboan nasida do akka bawa, borua, dakdanak, akka boru ni raja, dohot sude halak naung dipasahat si Nebusaradan+ kepala ni panjaga i tu si Gedalia+ anak ni si Ahikam+ pahoppu ni si Sapan.+ Diboan nasida do muse Panurirang* Jeremia dohot si Baruk anak ni si Neria. 7 Borhat ma nasida tu luat Mesir, ai dang dioloi nasida hata ni Jahowa. Lao ma nasida sahat tu Tahpanhes.+

8 Dung i makkatai ma muse Jahowa tu si Jeremia di Tahpanhes. Didok ma, 9 “Buat ma akka batu na balga, tabunihon ma i di toru ni lante na sian batu bata na di jonok ni pintu ni istana ni si Firaun di Tahpanhes. Dung i, tutup ma sudena i pakke semen. Ulahon ma songon i di jolo ni akka halak Jahudi. 10 Dokkon ma songon on tu nasida, ‘Songon on ma hata ni Jahowa Pamimpin ni Akka Tentara* Debata ni Israel, “Jouokku ma naposokku si Nebukadnesar* raja ni Babel.+ Bahenokku ma tahtana di ginjang ni akka batu na hutabunihon on. Paherbangonna ma kemah ni harajaonna di atas ni akka batu i.+ 11 Ro nama ibana mangalo Mesir.+ Adong ma deba na mate alani sahit na posi, deba diboan tu luat ni musu, jala na deba nai mate alani podang.+ 12 Tutungokku ma akka inganan panombaon ni halak Mesir.+ Tutungon ni raja i ma akka inganan i jala diboan ma akka debata ni nasida. Mura do raja ni Babel i manaluhon sude luat ni Mesir i, dos songon sahalak parmahan mamakke bajuna, dang pola maol i di ibana. Tutu, borhat do ibana sian i, jala dang adong na mangabbati ibana. 13 Tutungonna ma akka tiang* ni Bet-semes* na adong di Mesir, jala tutungonna ma sude inganan panombaon ni halak Mesir.”’”