Jeremia

40 Dung dipalua si Nebusaradan+ kepala ni panjaga i si Jeremia di Rama,+ makkatai ma muse Jahowa tu ibana. Di tikki i diborgol do tangan ni si Jeremia, jala rap do ibana dohot sude halak Jerusalem dohot halak Juda na lao diboan tu Babel. 2 Dung i, diboan kepala panjaga i ma si Jeremia jala didok ma tu ibana, “Nungnga dipaboa Jahowa Debatam hian na lao diparo jea tu inganan on. 3 Dipasaut Jahowa ma sudena i songon na nidokna i. Ai nungnga mardosa bangsomuna i tu Jahowa jala dang dioloi nasida hatana. Alani i ma masa on sude tu hamu.+ 4 Saonari bukkaokku ma borgol na di tanganmi. Molo olo ho, ihutton ma au lao tu Babel asa huurus ho. Alai molo dang olo ho mangihutton au tu Babel, unang pola dohot ho. Ida ma sude luat na di jolomon, lao ma ho manang na tudia pe lomo ni roham.”+

5 Di tikki marpikkir dope si Jeremia na lao mulak do ibana manang na dang, pittor didok si Nebusaradan ma tu ibana, “Alai mulak ma ho tahe muse tu si Gedalia+ anak ni si Ahikam+ pahoppu ni si Sapan+ na dipillit raja ni Babel lao mangawasi akka kota ni Juda. Rap tinggal ma ho dohot ibana di tonga-tonga ni rakyat i, jala lomom ma manang na tudia ho lao.”

Dung i dilehon kepala ni panjaga i ma tu ibana akka sipanganon dohot hadiah, jala dipasombu ma ibana lao. 6 Dung i lao ma si Jeremia tu Mispa+ mandapotton si Gedalia anak ni si Ahikam. Maringanan ma ibana disi, di tonga-tonga ni akka halak na tinggal dope di luat i.

7 Di pudian ni ari, diboto sude pamimpin ni tentara na di luat i dohot akka tentara ni nasida ma naung dipillit raja ni Babel si Gedalia anak ni si Ahikam mangawasi sude luat i. Diboto nasida ma naung dipillit si Gedalia lao mangawasi akka na pogos na so dohot diboan tu Babel, dohot ma i akka bawa, borua, dohot dakdanak.+ 8 Dung i ro ma nasida manjuppangi si Gedalia di Mispa.+ Akka halak na ro i, i ma si Ismael+ anak ni si Netania, si Johanan+ dohot si Jonatan akka anak ni si Karea, si Seraya anak ni si Tanhumet, dohot akka anak ni si Epai halak Netopa, rap dohot si Jersania+ anak ni halak Maakat, rap dohot akka tentara ni nasida. 9 Marsumpa ma si Gedalia anak ni si Ahikam pahoppu ni si Sapan tu nasida dohot tu akka tentara ni nasida. Ninna ma, “Unang pola mabiar hamu mangoloi halak Kasdim. Tinggal ma hamu di luat on, jala oloi hamu ma raja ni Babel. Pasti dang manang na mahua hamu.+ 10 Alai ianggo au, toktong do au di Mispa, asa adong gabe wakilmuna* di jolo ni halak Kasdim na ro lao manjuppangi hita. Alai ianggo hamu, papungu hamu ma anggur, akka parbue ni hau di musim panas, dohot miak. Pamasuk hamu ma sudena i tu inganan panimpanan, jala tinggal ma hamu di akka kota naung ditaluhon hamu.”+

11 Dung i, dibege sude halak Jahudi na adong di Moab, di Ammon, di Edom, dohot di akka luat na asing ma na dipasombu raja ni Babel akka halak na mangolu i dope tinggal di Juda. Diboto nasida do muse na dipillit raja ni Babel i si Gedalia anak ni si Ahikam pahoppu ni si Sapan mangawasi nasida. 12 Alani i, marmulakan ma sude halak Jahudi na marserak di piga-piga inganan tu luat ni Juda. Ro ma nasida manjuppangi si Gedalia di Mispa. Dipapungu nasida ma godang situtu anggur dohot akka parbue ni hau di musim panas.

13 Ro ma si Johanan anak ni si Karea dohot sude pamimpin ni akka tentara na di sude luat i mandapotton si Gedalia di Mispa. 14 Didok nasida ma tu ibana, “Ai na so diboto ho do naung disuru si Baalis raja ni halak Ammon i+ si Ismael anak ni si Netania lao pamatehon ho?”+ Alai dang porsea si Gedalia anak ni si Ahikam tu nasida.

15 Ro ma sip-sip si Johanan anak ni si Karea mandapotton si Gedalia di Mispa. Didok ibana ma, “Lao nama au naeng mambunu si Ismael anak ni si Netania, dang adong na mamboto i. Ai boasa pola huroa pamateonna ho? Boasa pola ikkon marserak muse halak Juda naung marpungu i? Jala boasa pola ikkon mate akka halak Juda na mangolu on dope?” 16 Alai didok si Gedalia+ anak ni si Ahikam ma tu si Johanan anak ni si Karea, “Unang pola ulahon songon i, ai dang tutu na nidokmi taringot tu si Ismael.”