Jeremia
41 Di bulan na papituhon, ro ma tu Mispa si Ismael+ anak ni si Netania anak ni si Elisama. Sahalak sian pinoppar ni raja do ibana jala halak na sangap di harajaon i. Ro ma ibana rap dohot sappulu halak donganna mandapotton si Gedalia anak ni si Ahikam. Di tikki mangan nasida di Mispa,+ 2 jongjong ma si Ismael anak ni si Netania dohot sappulu halak donganna i. Dipamate nasida ma si Gedalia anak ni si Ahikam pahoppu ni si Sapan pakke podang. Songon i ma ibana pamatehon halak naung dipillit raja ni Babel lao mangawasi luat i. 3 Dibunu si Ismael do muse sude halak Jahudi na rap dohot si Gedalia di Mispa. Songon i nang sude akka tentara ni halak Kasdim na adong disi.
4 Andorang so diboto akka halak na masa i, sadari dung na mate i si Gedalia, 5 ro ma 80 halak sian Sikem,+ sian Silo,+ dohot sian Samaria.+ Nungnga dicukkur nasida be sude janggut ni nasida jala nungnga diribak nasida pakkean ni nasida. Diseati nasida do muse daging ni nasida.+ Jala diboan nasida do pelean sipanganon* dohot haminjon*+ lao diboan tu jabu ni Jahowa. 6 Lao ma si Ismael anak ni si Netania sian Mispa mandapotton nasida. Tangis do ibana saleleng na mardalan i. Dung pajuppang nasida, didok si Ismael ma, “Ro ma hamu, dapotton ma si Gedalia anak ni si Ahikam.” 7 Alai dung sahat nasida sude di kota i, pittor dibunu si Ismael anak ni si Netania dohot akka donganna i ma nasida. Disappatton ma bakke ni nasida tu panampungan ni aek.
8 Alai adong do sappulu halak sian nasida na mandok tu si Ismael, “Unang pamate hami, ai adong do disippan hami gandum, barli,* miak, dohot madu di ladang.” Alani i, dang jadi dipamate si Ismael nasida rap dohot akka dongan sabangso ni nasida. 9 Disappatton si Ismael ma bakke ni akka halak naung dibunu ibana i tu panampungan ni aek na balga, na dibahen Raja Asa tikki marporang ibana dohot si Baesa raja ni Israel.+ Digohi ibana ma panampungan ni aek i dohot bakke ni halak naung dibunu ibana.
10 Diboan si Ismael ma akka halak na mangolu dope di Mispa,+ dohot ma i akka boru ni raja dohot sude halak na adong di Mispa, i ma akka halak naung dipasahat si Nebusaradan kepala ni penjaga i lao diawasi si Gedalia+ anak ni si Ahikam. Diboan si Ismael anak ni si Netania i ma nasida sude jala lao ma nasida manaripar tu luat ni halak Ammon.+
11 Dung dibege si Johanan+ anak ni si Karea dohot sude pamimpin ni tentara akka ulaon na jahat na diulahon si Ismael anak ni si Netania i, 12 diboan nasida ma sude akka bawa jala lao ma nasida mangalo si Ismael anak ni si Netania. Juppang ni nasida ma ibana di jonok ni kolam na balga di Gibeon.
13 Diida akka halak naung ditakkup si Ismael i ma naung ro si Johanan anak ni si Karea dohot sude pamimpin ni tentara, gabe las ma roha ni nasida. 14 Marbalik ma sude akka halak na ditakkup sian Mispa+ i mangalo si Ismael. Dung i mulak ma nasida rap dohot si Johanan anak ni si Karea. 15 Alai lari do si Ismael anak ni si Netania dohot ualu halak donganna i. Lao do nasida tu luat ni halak Ammon.
16 Diboan si Johanan anak ni si Karea dohot sude akka pamimpin ni tentara i ma akka halak na mangolu dope, i ma akka halak na sian Mispa na dipalua sian si Ismael anak ni si Netania. Dung na dipamate i si Gedalia+ anak ni si Ahikam, diboan ma akka bawa, tentara, borua, dakdanak, dohot pejabat ni istana mulak sian Gibeon. 17 Dung i lao ma nasida jala tinggal di inganan marborngin appuna ni si Kimkana na jonok tu Betlehem.+ Naeng lao do nasida tu Mesir.+ 18 Ai nungnga mabiar nasida tu halak Kasdim i. Mabiar do nasida ala nungnga dipamate si Ismael anak ni si Netania i si Gedalia anak ni si Ahikam, i ma halak naung dipillit raja ni Babel lao mangawasi luat i.+