Hesekiel
35 Didok Jahowa ma muse tu au, 2 “Ale anak ni jolma, ida ma doppak akka dolok na di Seir,+ jala paboa ma aha na lao masa tu ibana.+ 3 Dokkon ma tu ibana, ‘Songon on do hata ni Jahowa Tuan Natumimbul i, “Ale akka dolok na di Seir, Au ma na gabe alom. Angkatokku nama tanganku lao mangalo ho, jala bahenokku nama ho tarulang jala harsang.+ 4 Bahenokku ma hancur akka kotami, bahenokku ma i gabe tarulang jala harsang.+ Sian i botoonmuna ma na Au do Jahowa. 5 Ai torus do sogo roham+ mangida halak Israel i. Jala dipasombu ho do nasida dibunu di tikki ro hasusaan tu nasida, i ma di tikki masa panguhuman na parpudi tu nasida.”’+
6 “‘Alani i songon pastina Au Debata na mangolu,’* ninna Jahowa Tuan Natumimbul i, ‘Nungnga ditottuhon be ho lao dipamate. Ai sogo do roham tu halak na dipamatemi.*+ Alani i, dang boi be ho malua sian hamatean i. Ikkon mate do ho.+ 7 Bahenokku ma akka dolok na di Seir gabe tarulang jala harsang.+ Manang ise pe na lewat manang na mulak tusi, ikkon hupamate do. 8 Gabe gok ma bakke ni halak naung mate tarbunu di akka dolokna i. Jala marragean ma akka bakke ni halak naung mate hona podang di akka dolokmu, di akka ruram, dohot di sude sungemi. 9 Bahenokku ma akka luatmi tarulang saleleng ni lelengna. Jala dang diingani be akka kotami.+ Sian i botoonmu ma na Au do Jahowa.’
10 “Di tonga-tonga ni bangso na dua i do Jahowa, alai didok ho do, ‘Appunakku nama bangso dohot luat na dua i,+ jala tabuat nama i gabe appunatta.’ 11 ‘Alani i, songon pastina Au Debata na mangolu,’ ninna Jahowa Tuan Natumimbul i, ‘Songon dia murukmuna, songon dia cemburumuna, jala songon dia sogo ni rohamuna tu nasida, songon i ma bahenokku tu hamu.+ Di tikki huhukum hamu, botoon ni nasida ma ise Au. 12 Dung i botoonmuna ma na Au do Jahowa. Hubege do sude akka hatamuna lao mangaleai akka dolok ni Israel. Tikki didok hamu, “Nungnga tarulang be luat ni nasida. Saonari nungnga dapotta be tikki lao manghancurhon nasida.” 13 Ginjang do rohamuna tikki makkatai taringot Au. Jala godang do hatamuna taringot Au.+ Alai hubege do i sude.’
14 “Songon on do hata ni Jahowa Tuan Natumimbul i, ‘Marlas ni roha do liat portibi on di tikki hubahen ho gabe tarulang jala harsang. 15 Gabe tarulang ma luatmuna, ale akka huta na di Dolok Seir, tutu sude luat na di Edom.+ Dos songon las ni rohamuna di tikki tarulang dibahen luat parbagianan ni halak Israel, songon i ma bahenokku tu hamu.+ Sian i botoon ni nasida ma na Au do Jahowa.’”