Josua

18 Dung ditaluhon halak Israel akka bangso na di luat i, marpungu ma nasida sude di Silo.+ Jala dipajongjong nasida ma disi+ kemah parpunguan ni nasida.+ 2 Alai adong dope pitu marga nai na so mandapot tano parbagianan. 3 Alani i, didok si Josua ma, “Boasa dang lao dope hamu mambuat tano na nilehon ni Jahowa Debata ni akka ompumuna tu hamu?+ 4 Pillit ma tolu halak sian ganup marga asa husuru nasida makkalilingi tano i. Jala bahenon ni nasida ma hatorangan taringot tu tano na lao gabe parbagianan ni nasida. Dung i mulak ma muse nasida tu au. 5 Ikkon bagion ni nasida do tano i gabe pitu bagian.+ Alai molo marga Juda, toktong do tinggal di sabola selatan.+ Jala pinoppar ni si Josep toktong di sabola utara.+ 6 Bagi hamu ma tano i gabe pitu bagian, jala bahen ma hatoranganna. Dung i, lehon ma i tu au asa hubahen undi+ dison, di jolo ni Jahowa Debatanta. 7 Alai dang adong tano parbagianan ni halak Lepi.+ Ai nungnga adong parbagianan ni nasida,+ i ma gabe malim ni Jahowa. Jala nungnga dilehon si Musa naposo ni Jahowa i tano parbagianan tu marga Gad, marga Ruben, dohot tu satonga sian marga Manasse.+ Tano parbagianan ni nasida, i ma di sabola timur ni Sunge Jordan.”

8 Tikki naeng borhat akka bawa i, didok si Josua ma tu nasida, “Lao ma hamu jala kalilingi hamu ma luat i. Bahen hamu ma hatorangan taringot luat i jala mulak ma hamu tuson,*+ asa hubahen undi tu hamu di jolo ni Jahowa.” 9 Lao ma nasida jala dikalilingi nasida ma luat i. Dibagi nasida ma i gabe pitu bagian, dibahen ma hatorangan taringot tu akka kota na disi, jala disurat ma i di sada bukku. Dung i, mulak ma nasida mandapotton si Josua di perkemahan na di Silo. 10 Dibahen si Josua ma undi tu nasida di Silo di jolo ni Jahowa.+ Jala dibagi ibana ma tano parbagianan ni halak Israel.+

11 On ma tano parbagianan ni akka keluarga na sian marga Benjamin mangihutton undi. Di holang-kolang ni tano parbagianan ni pinoppar ni si Juda+ dohot pinoppar ni si Josep+ do tano parbagianan ni nasida. 12 Parbatasan tano parbagianan ni nasida di sabola utara dimulai ma i sian Sunge Jordan sahat tu inganan na mardolok-dolok di Jeriko+ sabola utara. Sahat ma i muse tu dolok na di sabola barat, jala torus ma i muse tu gurun na di Bet-apen.+ 13 Sian i torus ma i muse tu Lus, i ma Betel+ di inganan na mardolok-dolok di Lus sabola selatan. Turun ma muse tu Atarot-adar+ di dolok na di sabola selatan ni Bet-horon+ na di toru. 14 Sian i, torus ma muse tu parbatasan di sabola barat. Mulai ma i sian dolok na di jolo ni Bet-horon na di sabola selatan. Jala marujung ma i di Kiriat-baal, i ma Kiriat-jearim+ sada kota parbagianan ni marga Juda. On ma parbatasan di sabola barat.

15 Parbatasan di sabola selatan dimulai sian ujung ni Kiriat-jearim. Sian i torus ma tu sabola barat jala torus ma i muse tu Mual Neptoa.+ 16 Sian i, turun ma tu ujung ni dolok na di jolo ni Rura Anak ni Hinnom,+ i ma na di utara ni Rura Repaim.+ Turun ma muse tu Rura Hinnom, torus ma muse tu huta ni halak Jebus+ na mardolok-dolok di sabola selatan. Jala sian i turun ma muse tu En-rogel.+ 17 Sian i torus ma muse tu utara, i ma tu En-semes. Jala torus ma muse tu Gelilot na di jolo ni Tanjakan Adumim.+ Dung i turun ma muse tu Batu+ Bohan.+ (Bohan i ma goar ni anak ni si Ruben.) 18 Sian i, torus ma muse tu utara ni huta na mardolok-dolok na di jolo ni Araba. Jala turun ma muse tu Araba. 19 Sian i, torus ma muse tu huta na mardolok-dolok di Bet-hoglah+ na di sabola utara. Jala pantai ni Laut Sira*+ ma ujung ni parbatasan i, i ma na di ujung ni Sunge Jordan na di sabola selatan. On ma parbatasan di sabola selatan. 20 Jala parbatasan di sabola timur, i ma Sunge Jordan. Akka i ma tano parbagianan ni akka keluarga na sian marga Benjamin dohot sude parbatasanna.

21 On ma akka kota parbagianan ni akka keluarga na sian marga Benjamin: Jeriko, Bet-hoglah, Emek-kesis, 22 Arbati,+ Semaraim, Betel,+ 23 Awi, Para, Opra, 24 Keper-hamonai, Opni, dohot Geba.+ Sude 12 kota dohot akka hutana.

25 Dohot do muse Gibeon,+ Rama, Beerot, 26 Mispe, Kepira, Mosa, 27 Rekem, Irpel, Tarala, 28 Zelah,+ Ha-elep, Jebus i ma Jerusalem,+ Gibea,+ dohot Kiriat. Sude 14 kota dohot akka hutana.

Akka i ma tano parbagianan ni akka keluarga na sian marga Benjamin.