Parjamita
11 Sappatton ma rotim tu aek,+ jala dapotmu do i muse piga-piga ari nai.+ 2 Bagi ma artam tu pitu halak manang tu ualu halak.+ Ai dang diboto ho hasusaan* na lao masa di ari na naeng ro.
3 Molo nungnga gok aek di bagasan ombun, ro ma udan tu tano on. Molo maruppak hau tu arah selatan manang tu arah utara, laos disi do i peak.
4 Molo sai alogo do na dipaida-ida halak, dang saut be ibana manuan boni. Molo sai ombun do na dipaida-ida halak, dang saut be ibana mamanen.+
5 Dang boi diattusi ho songon dia dibahen* holi-holi ni poso-poso na di bortian* ni omakna dope.+ Suang songon i ma, dang boi diattusi ho akka ulaon ni Debata na sittong. Ai Ibana do na manoppa nasa na adong.+
6 Suan ma bonim tikki manogot, jala unang ma maradi ho sahat tu botari.+ Ai dang diboto ho na dia na lao tubu, on do manang na an, manang na rap tubu do duassa.
7 Las do roha mangida na tiur. Jala tung denggan do mangida mataniari marsinondang. 8 Molo tung pe ganjang umur ni sasahalak, lok ma las rohana saleleng mangolu ibana.+ Alai porlu do ingotonna, godang do akka ari hasusaan na lao masa. Jala dang marlapatan sude na lao masa i.+
9 Hamu akka na poso, marlas ni roha ma hamu. Marlas ni roha ma hamu tikki poso dope hamu. Bahen ma sude na dihalomohon roham, jala ulahon ma sude na niidam. Alai ingot ma, ikkon martanggung jawab do ho tu sude na binahenmu di jolo ni Debata na sittong.+ 10 Alani i, bolokkon ma sude arsak ni roham, jala bolokkon ma sude na boi mambahen sega dagingmu. Ai sia-sia do haposoonmi dohot hagogoonmi.+