Job
4 Dialusi si Elipas+ halak Teman i ma,
2 “Gabe muruk do ho molo adong na mandok hata tu ho?
Ai dang tarbahen au be holan na sip.
3 Tutu, nungnga godang halak dipissang ho,
Jala dipatogu ho do halak na gale.
4 Togu do roha ni halak na tartuktuk mambege hatam,
Jala dipatogu ho do dugul-dugul ni halak na hitir-hitir.
5 Alai saonari masa ma sitaonon tu ho, gabe mandele ma ho.
Ro ma i tu ho, jala gabe marsak ma ho.
6 Boasa dang pos be roham? Hape dihabiari ho do Debata
Boasa dang porsea be ho tu janji ni Debata? Hape setia do ho tu Ibana.+
7 Ingot ma jo: Hea do haroa hatop mate halak na so marsala?
Hea do haroa dipamate halak na tigor marroha?
8 Nungnga huida halak na manuan* hajahaton
Dohot halak na manabur jea, ikkon i do tapuonna.
9 Mate do nasida alani hosa ni Debata,
Jala suda do nasida ala diombusson rimasna tu nasida.
10 Marauang do singa jala marsoara do anak ni singa,
Alai haru ngingi ni singa na gogo pe boi do ponggol.
11 Mate do singa molo so adong mangsa dapotna,
Jala marserak ma akka anakna.
12 Adong do na sip-sip paboahon hatana tu au,
Jala dihusippon do i tu pinggolhu.
13 Tikki borngin, tikki renges halak modom,
Dapottu ma parnidaan na mambahen au busisaon.
14 Gabe mabiar ma au,
Jala hitir-hitir.*
15 Adong* ma na lewat sian jolokku,
Gabe marsisir ma ibbulukku.
16 Dung i jongjong ma i di jolokku,
Alai dang huboto songon dia rupana.
Adong bayangan di jolo ni matakku,
Gabe hohom ma di sakalilingku, jala hubege ma soara mandok,
17 ‘Boi do haroa uttigor roha ni jolma sian Debata?
Boi do haroa ubbadia jolma sian Sitoppa ibana?’
18 Ida ma! Haru tu akka naposona dang porsea Debata,
Sai dilului Ibana do sala ni akka suru-suruanna.
19 Lam tu jolma na mardosa ma, na songon jabu na sian tano liat,
Na dipajongjong di ginjang ni tano,+
Na mura dilisatton songon serangga!
20 Mangolu dope nasida tikki manogot alai dung botari mate ma nasida.
Mate do nasida saleleng ni lelengna, jala dang adong na parduli.
21 Songon kemah na maruppak do nasida ala dibukka talina.
Mate do nasida ala so marbisuk.