Job
27 Didok si Job ma muse,
2 “Songon pastina Debata mangolu,* na mambahen na so sittong tu au,+
Jala songon pastina Pargogo na So Hatudosan i mangolu, na mambahen susa ngolukku,+
3 Saleleng marhosa au
Jala saleleng dibahen Debata dope au marhosa,+
4 Dang hatahonon ni babakku akka na jahat,
Jala dang olo dilakku margabus!
5 Dang mungkin dohonokku na tigor marroha hamu!
Sappe mate au, toktong do au setia tu Debata!+
6 Toktong do au marsitutu asa tigor marroha jala sai bahenokku do songon i.+
Saleleng mangolu au, ias ma panggora ni rohakku.*
7 Sai anggiat ma dihukum akka musukku songon parjahat,
Jala dihukum akka alokku songon halak na jahat.
8 Adong dope haroa na dipaima-ima ni halak na jahat* molo dung mate ibana,+
Jala molo dung dibuat Debata ngoluna?
9 Olo haroa Debata manangihon angguk-anggukna
Molo masa sitaonon tu ibana?+
10 Boi do haroa Pargogo na So Hatudosan i gabe haroro ni las ni rohana?
Martangiang do haroa ibana tu Debata ganup tikki?
11 Huajari pe hamu taringot huaso* ni Debata,
Jala dang olo au manabunihon manang aha pe taringot Pargogo na So Hatudosan i.
12 Molo sude do hamu mandapot parnidaan,
Boasa ma dohononmuna akka na so marguna?
13 On ma upa na sian Debata tu akka parjahat,+
Parbagianan ni halak na kejam sian Pargogo na So Hatudosan i.
14 Nang pe godang anakna, na lao dipamate do i mamakke podang,+
Jala na lao hurangan mangan do akka pinopparna.
15 Nang pe adong dope pinopparna na mangolu, na lao mate do i alani sahit,
Jala dang na lao mangandungi istri ni nasida molo masa i.
16 Nang pe dipapungu ibana godang perak songon godang ni orbuk,
Jala disippan ibana godang abit na denggan songon godang ni tano liat,
17 Nang pe dipapungu ibana i sude,
Pakkeon ni halak na tigor marroha do i,+
Jala bagi-bagion ni halak na so marsala do perakna i.
18 Jabu na dipajongjong ibana pe dang togu dos songon asar ni ngitngit,
Songon sopo-sopo+ na dibahen sahalak panjaga.
19 Mora dope ibana tikki modom, alai dang hot artana i.*
Jala tikki dungo ibana, dang disi be sude artana i.
20 Marroan do jea tu ibana songon banjir,
Jala diboan haba-haba do ibana tikki borngin.+
21 Lao mago do ibana bahenon ni alogo na sian timur,
Ai dihabangkon do ibana sian ingananna.+