Surat tu si Pilemon
1 Sian si Paulus na tarhurung+ alani Kristus Jesus dohot sian donganta si Timoteus,+ mandapotton si Pilemon dongan saulaon na huhaholongi hami, 2 si Appia donganta borua, si Arkippus+ donganta rap tentara ni Kristus, dohot huria na adong di jabum:+
3 Anggiat ma dilehon tu hamu asi ni roha na massai balga i dohot hadameon na sian Debata, i ma Amangta dohot sian Tuan Jesus Kristus.
4 Toktong do au mandok mauliate tu Debatakku tikki hudok goarmu di tangiakku.+ 5 Ai jotjot do hubege taringot tu haporseaon dohot holong na dipatudu ho tu Tuan Jesus dohot tu sude akka na badia i. 6 Hutangiakkon do asa boi haporseaonmu dohot haporseaon ni na asing mangonjar roham lao mamikkiri akka na denggan naung tajalo marhite Kristus. 7 Ai las situtu do rohakku jala tarapul do au mambege holong ni roham, ai nungnga dipatogu ho roha ni* akka na badia i.
8 Ala apostel ni Kristus au, marhak do nian au mamaretta ho mangulahon manang aha na ikkon sibahenonmu, 9 alai dumenggan ma au mangelek-elek tu ho marhite holong. Ai au si Paulus, nungnga matua jala saonari dipenjarahon alani Kristus Jesus. 10 Mangelek-elek do au tu ho alani anakku si Onesimus.+ Nungnga gabe songon amangna+ au saleleng dipenjara* au. 11 Dang marguna ibana najolo di ho, alai saonari marguna do ibana di ho dohot di au. 12 Husuru do ibana mulak tu ho, haholongan ni rohakku do ibana.
13 Lomo do nian rohakku dison ibana rap dohot au, manggattihon ho mangurupi au saleleng di penjara au alani barita na uli.+ 14 Alai dang olo au mangulahon manang aha pe anggo dang sian pamotoanmu. Dang lomo rohakku mamaksa ho mangulahon akka na denggan, ai naeng ma nian sian na nionjar ni roham ulahononmu i.+ 15 Alani i do ra ditadikkon ibana ho satokkin,* asa boi ibana di ho saleleng ni lelengna. 16 Saonari dang holan songon hatoban be ibana,+ alai nungnga gabe dongan sahaporseaon.+ Holong do rohakku tu ibana, alai umholong ma nian roham, ai hatobanmu do ibana jala dongan sahaporseaonmu. 17 Alani i molo donganmu do au didok roham, denggan ma jalo ibana songon na manjalo au. 18 Alai molo adong dibahen ibana na sala tu ho manang marutang ibana tu ho, au ma mananggung i. 19 Au si Paulus, au sandiri do na manuratton surat on jala marjanji do au manggarar utangna i tu ho. Alai ho pe marutang hosa do tu au. 20 Ale dongan, urupi ma au alani Tuan i. Patogu ma rohakku* di bagasan Kristus i.
21 Pos do rohakku oloanmu pangidoakki. Alani i ma hubahen surat on tu ho, ai huboto do bahenonmu lobi sian na hupangido i. 22 Asing ni i, parade ma inganan di au. Ai dipangido rohakku do paluaonna au alani akka tangiangmuna.+
23 Sahat ma tabe ni si Epapras+ tu ho, donganku na tarhurung alani Kristus Jesus, 24 dohot tabe ni akka donganku saulaon, i ma si Markus, si Aristarkus,+ si Demas,+ dohot si Lukas.+
25 Anggiat ma dijalo hamu asi ni roha ni Tuan Jesus Kristus na massai balga i alani haburjuon na dipatudu hamu.