Ulaon ni Apostel

15 Adong ma piga-piga halak na ro sian Judea tu Antiokia. Diajari nasida ma akka dongan sahaporseaon na disi. Didok nasida ma, “Dang boi hamu selamat molo dang disunat hamu mangihutton Patik ni si Musa.”+ 2 Alai dialo si Paulus dohot si Barnabas do pandapot ni nasida i. Dung lam balga parsalisian i, gabe disuru akka dongan ma si Paulus, si Barnabas, dohot piga-piga dongan na asing lao tu Jerusalem,+ asa disukkun nasida tu akka apostel dohot tu akka sintua parsoalan i.

3 Dung didongani akka dongan na di huria i nasida satokkin di pardalanan, ditorusson nasida ma muse pardalanan i mangalewati Penisia dohot Samaria. Diceritahon nasida ma tu akka dongan na disi songon dia akka halak na sian bangso na asing mambahen hamubaon lao manomba Debata. Mambege i, las situtu ma roha ni akka dongan i. 4 Dung sahat nasida di Jerusalem, denggan do nasida dijalo akka dongan na di huria, akka apostel, dohot akka sintua. Dung i, diceritahon nasida ma akka ulaon na dibahen Debata marhite nasida. 5 Alai jongjong ma piga-piga halak sian hundulan ni nasida. Sian sekte Parise hian do nasida alai nungnga gabe halak na porsea. Didok nasida ma, “Ikkon disunat do nasida jala ikkon diihutton nasida do Patik ni si Musa.”+

6 Dung i, marpungu ma akka apostel dohot akka sintua lao mambahas parsoalan i. 7 Dung leleng dibahas nasida parsoalan i, jongjong ma si Petrus jala ninna ma tu nasida, “Hamu akka dongan, takkas do diboto hamu, sian mulana dipillit Debata do au sian tonga-tongamuna lao paboahon barita na uli tu akka bangso na asing asa gabe porsea nasida.+ 8 Jala nungnga dipatuduhon Debata siboto roha i,+ na lomo rohana tu nasida. Ai dilehon Ibana do tondi parbadiana+ tu nasida songon na dilehon tu hita. 9 Dang dibeda-bedahon Debata hita dohot nasida.+ Alai dipabadia Debata do roha ni nasida alani haporseaon ni nasida.+ 10 Attong boasa ma diuji hamu Debata? Boasa pola talehon boban na borat tu akka sisean i?+ Hape haru hita dohot akka omputta pe dang tolap mamboan boban i.+ 11 Alai porsea do hita, holan marhite asi ni roha* ni Tuan Jesus+ na massai balga i do hita boi malua. Jala nasida pe songon i do dihaporseai.”+

12 Gabe hohom ma sude halak na pungu i. Dung i, ditangihon nasida ma si Barnabas dohot si Paulus paboahon akka tanda halongangan* na dibahen Debata marhite nasida di tonga-tonga ni akka bangso. 13 Dung sae nasida makkatai, didok si Jakobus ma, “Hamu akka dongan, tangihon hamu ma au. 14 Nungnga takkas dipaboa si Simeon,*+ naung diparrohahon Debata bangso na asing. Dipillit Debata do deba sian nasida gabe bangso na pasangappon goarna.+ 15 Jala sesuai do on tu na Sinurat ni Akka Panurirang,* ai tarsurat do, 16 ‘Dung salpu i, mulak ma au muse lao pajongjokkon kemah ni si Daud naung maruppak i. Pajongjongokku ma muse kemah naung sega i jala padengganokku, 17 asa toktong dilului akka na tinggal i Jahowa* rap dohot akka halak na sian sude bangso na pasangappon goarhu, ninna Jahowa* na pasautton akka i sude,+ 18 i ma akka naung ditottuhon sian najolo.’+ 19 Alani i ninna rohakku, dang bahenon be susa akka halak na sian bangso na asing na ro manomba Debata.+ 20 Alai, tabahen ma surat asa dipadao nasida diri ni nasida sian na ramun* na dibahen akka patung,+ sian seks na so patut,*+ sian binatang na mate na so jolo diseat,* dohot sian mudar.+ 21 Sian najolo, nungnga adong akka bukku ni si Musa na marisi akka paretta on di akka kota. Ai ganup ari Sabat do i dijahahon di akka sinagoga.”*+

22 Dung i ditottuhon akka apostel, akka sintua, dohot sude na di huria i ma asa dipillit sian tonga-tonga ni nasida na lao borhat rap dohot si Paulus dohot si Barnabas tu Antiokia. Dipillit nasida ma dua halak sian akka halak na manguluhon dongan di huria. Dipillit ma si Judas na laos digoari si Barsabas dohot si Silas.+ 23 Songon on ma isi ni surat na ditongosson marhite nasida,

“Sian hami akka donganmuna, akka apostel, dohot akka sintua, tu akka dongan na sian bangso na asing na adong di Antiokia,+ di Siria, dohot di Kilikia: Horas ma di hamu! 24 Nungnga hubege hami na adong ro sian tonga-tonganami mandapotton hamu, na manusai hamu, jala na mambahen ganggu rohamuna marhite hata ni nasida,+ hape so adong hulehon hami tudu-tudu songon i tu nasida. 25 Alani i, nungnga sada rohanami lao mamillit dua halak donganta na disuru mandapotton hamu raphon si Barnabas dohot si Paulus na tahaholongi, 26 na mangalehon ngolu ni nasida lao mampartahatton goar ni Tuanta Jesus Kristus.+ 27 Alani i ma husuru hami si Judas dohot si Silas, asa dipatorang nasida isi ni surat on tu hamu.+ 28 Marhite tondi parbadia,+ diurupi do hami lao manottuhon asa unang hutambai hami be boban tu hamu, asing ni akka na porlu on: 29 Padao hamu ma dirimuna sian naung dipelehon tu akka patung,+ sian mudar,+ sian binatang na mate na so jolo diseat,*+ dohot sian seks na so patut.*+ Molo toktong dipadao hamu dirimuna sian akka i, denggan ma hamu. Sai anggiat ma hamu toktong sehat!”

30 Dung i dipaborhat ma nasida tu Antiokia. Dijou nasida ma asa marpungu akka sisean na disi jala dipasahat ma surat i tu nasida. 31 Dung dijaha nasida surat i, las ma roha ni nasida jala lam togu ma haporseaon ni nasida. 32 Marhite akka jamita, diurupi si Judas dohot si Silas do akka dongan na disi asa lam togu haporseaon ni nasida. Ai panurirang do nasida.+ 33 Dung piga-piga leleng nasida disi, dipaborhat akka dongan i ma nasida di bagasan dame mulak tu Jerusalem. 34* —— 35 Alai tinggal dope anggo si Paulus, si Barnabas, dohot akka dongan na asing di Antiokia. Mangajari do nasida disi jala paboahon barita na uli taringot tu hata ni Jahowa.*

36 Dung manang na piga ari, didok si Paulus ma tu si Barnabas, “Beta ma hita mulak tu ganup kota naung hea tadalani lao mambaritahon hata ni Jahowa.* Lao ma hita tusi asa taida songon dia akka dongan na disi.”+ 37 Lomo do roha ni si Barnabas asa dohot si Johannes na laos digoari si Markus.+ 38 Alai dang lomo roha ni si Paulus diboan nasida si Markus. Ai hea do nasida ditinggalhon ibana di Pampilia, jala dang rap ibana dohot nasida di ulaon marbarita.+ 39 Gabe tubu ma parbadaan di nasida. Alani i, marsirang ma si Paulus dohot si Barnabas. Diboan si Barnabas+ ma si Markus jala markapal ma nasida tu Siprus. 40 Alai ditogihon si Paulus ma si Silas. Ditangiakkon akka dongan i ma asa didongani asi ni roha ni Jahowa* na massai balga i si Paulus jala dipaborhat ma nasida.+ 41 Dung i, borhat ma ibana tu Siria dohot tu Kilikia lao patoguhon akka huria na disi.