1 Samuel
20 Dung i lari ma si Daud sian huta Nayot na di Rama. Didapotton ibana ma si Jonatan jala ninna ma, “Aha huroha hubahen tu bapakmu?+ Aha salakku tu ibana? Aha dosakku tu bapakmu umbahen sai naeng dipamate ibana au?” 2 Didok si Jonatan ma tu si Daud, “Dang mungkin pamateon ni bapakku ho.+ Sai dipaboa bapakku do tu au manang aha pe na lao bahenonna. Jadi, pasti paboaon ni bapakku do tu au molo naeng pamateonna ho.” 3 Alai marsumpa ma si Daud, ninna ma, “Diboto bapakmu do na holong roham tu au.+ Jadi dang paboaonna i tu ho asa unang marsak ho. Alai songon pastina Jahowa mangolu* jala songon pastina ho mangolu,* pamateonna nama au satokkin nai!”+
4 Alai, didok si Jonatan ma tu si Daud, “Attong, saonari paboa ma pangidoanmu. Huulahon pe i.” 5 Didok si Daud ma tu si Jonatan, “Molo denggan di roham, loas ma au martabuni tu luar ni kota on saleleng tolu ari sahat tu botarina i. Ai pesta bulan baru do marsogot.+ Somalna, ikkon rap mangan do au dohot raja. 6 Molo dilului bapakmu au, dokkon ma, ‘Nungnga parmisi si Daud tu au. Naeng mangalehon pelean siganup taon ibana dohot keluargana.+ Jadi ikkon hatop ninna ibana borhat tu hutana di Betlehem.’+ 7 Molo didok ibana, ‘Dang pola boha i,’ attong aman nama au naposomon. Alai molo muruk do ibana, porsea ma ho pamateonna nama au. 8 Nungnga marjanji au dohot ho di jolo ni Jahowa.+ Alani i, patudu ma holong ni roham* tu au naposomon.+ Unang ma loas au dipamate bapakmu. Molo sala au,+ ho ma na pamatehon au.”
9 Didok si Jonatan ma, “Unang ma dok songon i! Molo huboto naeng dipamate bapakku ho, hupaboa pe tu ho.”+ 10 Dialusi si Daud ma, “Attong, ise ma na paboahon tu au na muruk do bapakmu manang na dang?” 11 Didok si Jonatan ma tu si Daud, “Beta, tu luar ni kota ma jo hita.” Alani i, lao ma nasida na dua tu luar ni kota i. 12 Dung i didok si Jonatan ma tu si Daud, “Jahowa Debata ni Israel ma na gabe saksi di hita. Marsogot manang dua ari nai, huida pe atik na muruk do bapakku manang na dang alani ho. Molo dang muruk ibana, pasti paboaokku do i tu ho. 13 Jala molo naeng pamateon ni bapakku pe ho, paboaokku do i tu ho. Molo dang hupaboa jala gabe mate ho, massai borat ma au dihukum Jahowa. Sai didongani Jahowa ma ho+ songon Ibana mandongani bapakku najolo.+ 14 Haholongi ma au saleleng mangolu songon holong* na dipatudu Jahowa. Nang dung mate pe au,+ 15 toktong ma patudu holong ni roham* tu keluargakku,+ nang pe nungnga dipamate Jahowa sude musum sian tano on.” 16 Alani i, dibahen si Jonatan ma parjanjian tu keluarga ni si Daud, ninna ma, “Hukumon ni Jahowa ma akka musu ni si Daud.” 17 Dung i, disuru si Jonatan ma asa marsumpa muse si Daud lao patuduhon na holong roha ni si Daud tu ibana. Ai dihaholongi si Jonatan do si Daud songon ibana makkaholongi dirina.+
18 Didok si Jonatan ma muse tu si Daud, “Marsogot, di pesta bulan baru i,+ luluan ni bapakku ma ho ala kosong do kursimi. 19 Di ari patoluhon, sukkunonna ma taringot ho. Jadi, lao ma ho tu inganan partabunianmu hian, jala toktong ma ho jonok tu batu on. 20 Hupanah pe tolu hali tu labbung ni batu on, songon na mamanah manang aha. 21 Dung i, dohonokku ma tu parkarejokku, ‘Lao ma ho. Lului ma anak panah i.’ Molo hudok tu ibana, ‘Di labbungmi do anak panah i, buat ma,’ mulak ma ho. Ai songon pastina Jahowa mangolu, molo hudok songon i aman do ho jala dang adong na lao pamatehon ho. 22 Molo hudok tu parkarejokki, ‘Dao dope panah i sian ho,’ lao ma ho. On patuduhon na lomo do roha ni Jahowa asa lao ho. 23 Jahowa ma na gabe saksi di janjitta i+ saleleng ni lelengna.”+
24 Dung i martabuni ma si Daud di luar ni kota i. Dung dapot tikkina pesta bulan baru, hundul ma raja i lao mangan.+ 25 Songon na somal, hundul ma raja i di kursina na jonok tu tembok. Si Jonatan ma di jolona, jala si Abner+ ma di sapping ni raja i. Alai kosong do kursi ni si Daud. 26 Di tikki i, dang adong didok si Saul manang aha. Ai ninna rohana do, ‘Na adong do ra na mambahen ibana ramun.*+ Pasti na ramun do ibana.’ 27 Di ari na paduahon di pesta bulan baru i, kosong dope kursi ni si Daud. Alani i, disukkun si Saul ma si Jonatan anakna i, “Boasa dang ro anak ni si Isai i mangan?+ Nattoari dang ro, saonari pe dang ro.” 28 Didok si Jonatan ma tu si Saul, “Nungnga parmisi si Daud tu au. Naeng lao ninna ibana tu Betlehem.+ 29 Didok ibana do, ‘Mangalean pelean siganup taon keluargakku di kota, jala dijou abangku do au asa ro. Molo denggan di roham, paloas ma au lao manjuppangi nasida.’ Alani i do dang dohot ibana mangan di meja ni raja on.” 30 Gabe muruk hian ma si Saul tu si Jonatan. Didok ibana ma, “Botul-botul ma ho pangalo. Huboto do na mamihak ho tu anak ni si Isai i. Dipaila ho do dirim dohot inangmu! 31 Saleleng mangolu anak ni si Isai i di tano on, dang boi ho gabe raja. Tung gabe raja pe ho, dang boi martahan harajaonmi.+ Saonari, suru ma halak mamboan ibana tuson, asa hupamate ibana.”*+
32 Alai didok si Jonatan ma tu si Saul bapakna i, “Boasa ikkon dipamate ibana?+ Aha huroa dibahen ibana?” 33 Gabe naeng dipamate si Saul ma si Jonatan. Ditullangkon ibana ma tombakna* i tu si Jonatan.+ Gabe diboto si Jonatan ma na naeng pamateon ni si Saul do si Daud.+ 34 Alani i, jut ma roha ni si Jonatan jala pittor lao ma ibana sian i. Marsak do si Jonatan mamikkiri si Daud.+ Jala lungun do rohana ala nungnga dipaila bapakna ibana. Alani i, laos so mangan do ibana di ari na paduahon di pesta bulan baru i.
35 Manogotna i, lao ma si Jonatan mandapotton si Daud songon janji ni nasida i. Diboan ibana do sahalak bawa na poso lao mangurupi ibana.+ 36 Didok ibana ma tu bawa parkarejona i, “Naeng mamanah au sian on. Marlojong ma ho tusan. Annon buat ma anak ni panah i.” Dung marlojong parkarejona i, dipanah si Jonatan ma dao sian parkarejona i. 37 Dung sahat parkarejona tu inganan na dipanah ni si Jonatan i, didok si Jonatan ma, “Dao nai dope sian i anak ni panah i!” 38 Didok si Jonatan ma muse tu parkarejona i, “Pahatop, unang paleleng-leleng!” Dibuat parkarejona i ma anak ni panah i jala dilehon ma tu tuanna. 39 Dang diboto parkarejona i boasa dibahen si Jonatan songon i. Holan si Jonatan dohot si Daud do na mamboto i. 40 Dung i, dilehon si Jonatan ma panahna i tu parkarejona i jala didok ma, “Mulak ma ho, jala boan ma on tu kota.”
41 Dung lao parkarejona i, kaluar ma si Daud sian inganan partabunianna na jonok tusi di sabola selatan. Dung i, marsomba ma ibana tolu hali. Marsihaolan ma si Daud dohot si Jonatan jala tangis ma nasida. Alai ullungun do roha ni si Daud sian si Jonatan. 42 Didok si Jonatan ma tu si Daud, “Lao ma ho di bagasan dame. Nungnga marsumpa hita+ di bagasan goar ni Jahowa. Tadok do, ‘Sai didongani Jahowa ma ho dohot au. Jala sai didongani ma pinopparmu dohot pinopparhu saleleng ni lelengna.’”+
Dung i, lao ma si Daud jala mulak ma si Jonatan tu kota.